920033973
16342
article

خد العميل وطار

December 31, 2016    

المشكلة دى واجهت أكتر من حد فقلت أعرضها للكل علشان الفايدة تعم .

دايمًا حد يشتكى إن فيه حد كان شغال معاه وبعد ما خد خبرة خرج وفتح لوحده بنفس فكره وكمان ممكن يكون بدأ يكلم نفس العملاء اللى هو بيشتغل معاهم علشان يبقى عملاء للمكان الجديد وده طبعًا بيعمل إحباط لصاحب العمل ويبقي مش عارف يتصرف إزاى ..

وعلشان كده أنا هوضح شوية نقط مهمه جدًا .

أولًا العلاقة بين الموظف وصاحب العمل مؤقتة مهما طالت مش علاقة جواز ولا نسب ولا صداقة ولا حتى شراكة وإن كانت حتى كل العلاقات اللى فاتت أحيانًا كتير بتنتهى .

ثانيًا العلاقة بين صاحب العمل والموظف هى علاقة نفعية وتبادل مصالح لفترة مؤقتة ومش ذنب حد إن طرف من الأطراف حمل العلاقة أكبر مما تحتمل .

ثالثًا كل موقف بتتعرض ليه لازم تاخد منه خبرة كويسة وتبص لقدام وتفكر إزاى ميتكررشى تانى وإزاى شغلك مايتأثرشى لما حد يسيبك ويفتح مكان تانى وينافسك .

رابعًا مفيش داعى إنك تعادى الشخص ده لأن أكيد كان فيه ناس هاتفتح وتنافسك متعرفهاش فحاول تعمل معاه علاقة كويسة تفيدك وتفيده كمنافسين (طبعًا ده لو ساب الشغل بشكل محترم وأخلاقى) .

خامسًا حاول إنك لما تجيب حد يبقى حد جاهز ومحترف ويديك من أول يوم وهاتدفع مقابل ده أفضل من إنك تسترخص وتجيب حد مايعرفشى حاجة وتعلمه لأن غالبًا أول مايفهم الشغل ومش هاتقدره هايسيبك سواء لمكان تانى أو لمشروعه الشخصى .

سادسًا مهم جدًا إنك تجدد فى مشروعك وتكبره من خلال جودة الخدمة أو البضاعة أو التركيز فى الشريحة المستهدفة بحيث إن أى حد هايقلد مشروعك النهاردة بعد سنة هاتكون إنت جددت فيه .

الحمد لله خرج من عندى موظفين فتحوا أكتر من 30 شركة كل شركة بتمثل شركتى فى مرحلة معينة بس الحمد لله كل سنة بعمل حاجة جديدة بخللى النسخة بتاعتهم قديمة جدًا .

سابعًا فيه علم مهم جدًا درسته فى الماجستير كعلم مستقل وهو علم (التوريث) وده بيهتم بإن كل حد فى الشركة لازم يكون له حد احتياطى علشان لو مشى فى أى وقت (موت - حادثة شغل أحسن فتح مشروع خاص ) الشغل يمشي بدون تأثر Succession planing .

ثامنًا التميز والثبات هايخللى العملاء بعد شوية فاهمين مين الأصل ومين التقليد والعميل فى النهاية ذكى وبيفرق .

تاسعًا عايزك تبص لقدام وإزاى تخللى شركتك شركة عظيمة ومتخليش حد يمثلك أى ضغط أو تشتيت ركز علي شغلك وكبره وجوده .

عاشرًا آخر حاجة بقى أبويا وأبوك علموهالنا بس إحنا بننساها ... محدش بياخد رزق حد بس المهم إننا نسعى بجدية ونتوكل على الله .

وربنا يوفق الجميع والحياة مبتقفشى على حد


مقالات مشابهة

المزيد
المال السايب
المال السايب

موضوع سريع ... مشكلة كبيرة وحلها بسيط ... حدث بالفعل :-

الأكثر قراءة

المزيد
خد العميل وطار
خد العميل وطار

المشكلة دى واجهت أكتر من حد فقلت أعرضها للكل علشان

كاش ولا آجل
كاش ولا آجل

  تجارة" الأرضية ..... عارف يعنى إيه تسيب أرضية للعميل

أنا الرئيس
أنا الرئيس

فى سنة 2010 كانت شركتنا للبرمجيات اللى أنا رئيس مجلس

أهم 15 خطأ يقع فيه أصحاب المشاريع الصغيرة وكيفية تجنبهم؟
أهم 15 خطأ يقع فيه أصحاب المشاريع الصغيرة وكيفية تجنبهم؟

وفقًا لتقرير أعده باحثو جامعة كاليفورنيا في بيركلي

المال السايب
المال السايب

موضوع سريع ... مشكلة كبيرة وحلها بسيط ... حدث بالفعل :-

إفلاس ساوند كلاود
إفلاس ساوند كلاود

"ساوند كلاود" .. هل تواجه مصير كوداك؟ من 2017 واحنا بنسمع

أسباب فشل الشركات الناشئة - ج (1)
أسباب فشل الشركات الناشئة - ج (1)

فيه شخص أعرفه قعد في الخليج فترة كبيرة من حياته ورجع

أسباب فشل الشركات الناشئة - ج (3)
أسباب فشل الشركات الناشئة - ج (3)

عدم الجاهزية الكاملة ... سنة 2006 عجبني فكرة برنامج كانت

يا ترى ايه الأسباب اللى تخلى شركة ناشئة تقفل ؟
يا ترى ايه الأسباب اللى تخلى شركة ناشئة تقفل ؟

فى الانفوجرافك ده بنعرض أكتر من سبب لغلق الشركات