خطوات الحفاظ على الجودة فى شركتك

اتكلمنا قبل كده عن مدى أهمية إن البيزنس بتاعك يكون مرتبط دايما بتقديمه أعلى مستوى من الجودة، وعن كون ده سبب أساسي في زيادة ولاء العملاء لعلامتك التجارية وحفاظك عليهم وكمان تقليل المخاطر والنفقات اللي ممكن تحصل من تقديمك لمنتجات جودتها ضعيفة، ده غير إن الشركات من الممكن إنها تبني اسم وسمعة بناء على مستوى الجودة اللي بتقدمها والتزامها بمعايير الجودة والصناعة المتفق عليها.

وبغض النظر عن المجال اللي شركتك بتخدمه سواء كانت شركة استشارية أو منصة تجارة إلكترونية أو مصنع أحذية أو حتى محل ألبان، من المهم إنك دايما تستخدم طرق جديدة تحسن بيها من جودة البيزنس بتاعك، لأن على حسب موقع livechatinc فالإحصائيات بتظهر إن 79% من المتسوقين الشباب بيضعوا قيمة عالية للجودة باعتبارها العامل الأكثر أهمية ليهم عند اختيار علامة تجارية معينة لمنتج أو خدمة عايزينها.

وعشان كده احنا هنتكلم النهاردة على الخطوات اللي أي صاحب بيزنس لازم يقوم بيها عشان يعزز ويحسن من مستوى الجودة اللي شركته بتقدمها:

1. حدد الجودة من منظور العملاء

فهم العميل هو بنفس أهمية رغبتك في تحسين الجودة خاصة لو كنت بتحاول تفضل دايما في مقدمة المنافسة، وده لأن معرفة اللي العملاء عايزينه بالظبط هو مفتاح تحسين الجودة، وانت ممكن تعمل كده عن طريق إنك تحط نفسك مكان العملاء وتعرف إيه الحاجة اللي بيحبوها في منتجك، هل الشكل والمظهر، السرعة والكفاءة، ولا الأمان والضمان؟ بعد كده شوف إيه الحاجة الأهم ليهم وحط أهداف لتحسين الحاجات دي.

2. اتعلم تشتغل بشكل أفضل بأقل الإمكانيات

عالم الأعمال بيعتمد على إنك تكون دايما واسع الحيلة، وده معناه إنك تعرف توصل للي انت عايزه حتى لو كانت الموارد اللي معاك محدودة ودي النقطة اللي كانت سبب نجاح وإبداع كتير من رجال الأعمال، وفيه خطوات بسيطة تقدر من خلالها تتأكد إذا كنت بتعمل كل اللي في وسعك بالموارد المتاحة الموجودة معاك هو عن طريق إنك:

• هل بتاخد وقت طويل لتطوير وتصميم وتقديم منتجاتك وخدماتك؟
• هل بتعمل أخطاء كتير في عملية التصنيع؟
• هل في عدد كبير من الموظفين بيشتركوا في مهمة واحدة مش محتاجة العدد ده؟
• هل اتحققت من وجود عدم كفاءة في نموذج العمل اللي البيزنس بتاعك شغال بيه ولا لا؟

وبمجرد تحديد إجابة واضحة على الأسئلة دي، هتقدر تحدد بشكل واضح الطريق اللي لازم تمشي فيه والأخطاء اللي لازم تصلحها.

3. خلي "العمل الجماعي" أسلوب حياة

إن فريق العمل بتاعك يتمتع بطاقة إيجابية ربما ده يكون الشيء اللي البيزنس بتاعك محتاجه عشان يحسن من جودة اللي بيقدمه، وتعزيز فكرة العمل الجماعي بين الموظفين دي من الحاجات اللي هترفع مستوى إنتاجية البيزنس، لأن التعاون هيسرع من عملية الإنتاج وهيضمن إن الجودة مش هيتم المساس بيها، ولو شوفنا شركات كبيرة زي أديداس ونايك هنلاقي إن سبب كبير من أسباب نجاحهم هو إن العمل الجماعي هو مكون أساسي من نظام عملياتهم، وده عن طريق تشجيع التعاون وبناء العلاقات بين الموظفين.

4. راقب الأخطاء وحل المشاكل

الأخطاء بتحصل ودي حاجة معظم الناس فهماها، لكن المشكلة بتكون في الطريقة اللي هتتعامل بيها مع الخطأ ده وقت ما يحصل، لأنك لو اتعاملت معاه غلط ممكن تخسر عملائك ولو اتعاملت معاه صح النتيجة هتكون إن عميلك هيشعر انك مهتم بيه، وأفضل المديرين هو اللي يقدر يتخيل أسوأ السيناريوهات ويستعد لمواجهتها حتى قبل ما تحصل، الطريقة دي هتضمن إنك هتحافظ على اعلى مستوى من الجودة حتى في وجود بعض المشاكل لأنك كل ما حليت المشاكل أسرع، كل ما زادت سرعة تركيزك على الحاجات التانية اللي هتقدر توصلك لأعلى مستوى من الجودة.

5. استثمر أكثر في إدارة مراقبة الجودة

والاستثمار اللي بنتكلم عنه هنا مش مجرد الاستثمار المالي ولكن كمان استثمار الوقت والمجهود واللي منها مثلا هي إنك:

• تعمل اجتماعات عصف ذهني دورية مع فرق العمل يكون هدفها الوصول لتغييرات إيجابية لإدارة الجودة.
• تعين موظفين أصحاب عقول بتفكر خارج الصندوق يساعدوك في تقديم منتجات وخدمات عالية الجودة.
• تحط جدول لاختبار الجودة على فترات منتظمة تتأكد بيه إن فيه اتساق في مستوى الجودة اللي بتقدمها.

كل الحاجات دي باستثمارك فيها هتظهر بشكل واضح في تحسين جودة المنتجات والخدمات اللي بتقدمها.

6. التدريب

تدريب العناصر الجديدة عندك على القيم الأساسية للشركة وتحديد معيار الجودة المطلوب منهم بالتفصيل وإزاي بيتم قياسه وتعريفهم على أهمية تلبية توقعات العملاء، ده هيخليهم يبذلوا مجهود أكتر وبالتالي تحسين جودة المنتجات والخدمات اللي بتقدمها بشكل عام.

7. التعامل بكفاءة مع ردود الأفعال

واحدة من أهم الطرق اللي تقدر من خلالها تحسن من جودة البيزنس بتاعك هو إنك تحافظ على مستوى تواصل عالي بين وبين عملائك، عشان كده لازم تخلق سلسلة للتواصل مع عملائك تسألهم فيها عن رأيهم في المنتج وتعدل من عرض البيع بتاعك وعملياتك اليومية بطريقة تخدمهم فيها بشكل أفضل.