FB Instagram Twitter Youtube Linkedin خليك أبو تريكة | أكاديمية اعمل بيزنس
 
الرجوع الى المدونة

خليك أبو تريكة

خليك أبو تريكة

مرة والواحد كان بيواجه أزمة حادة جداً في الشغل كنت بزور أحد رجال الأعمال علشان يقوللي على طريقة آخد بيها قرض علشان الشركة ما تقعش فالراجل شافني مهموم جداً وبشتكي بشكل كبير فقاللي أنا مش شايف إيه مشكلتك ؟؟

رديت عليه إن كل دي مشاكل عمال أحكيلك عليها المفروض أبقى عامل إزاي ؟؟ (هو انت معندكش دم في بالي طبعاً)

المهم الراجل حكالى على مشكلة حصلتله خلته فقد كل ما يملك و إتداين بديون ضخمة جداً (زي وضعي ساعتها) ومع ذلك بعد ما قعد في البيت فتره قال في نفسه ما أنا كده كده شكلي هتسجن طيب أتسجن بقى وأنا شغال ولا وأنا قاعد في البيت وفعلاً نزل واشتغل وقتل نفسه في الشغل وفعلاً ربنا كرمه والناس اللي هو مديون ليهم لما لقوا فيه شغل وسداد بدأوا يصبروا عليه وقدر إنه يسدد كل الفلوس خلال سنتين فقط وهو شايف إن ده طبيعة الشغل لازم يبقى فيه صعاب ولو استسلمنا مش هنعرف نكمل وهنبقى فشلة .. انت عارف أبو تريكة ؟؟؟

قلتله طبعاً .. قاللي تخيل أبو تريكة نزل الملعب ومفيش أى لاعب بيدخل عليه وخد الكورة من الجون للجون حد هيشجعه ؟

قلتله لأ طبعاً .. قاللي نجم كرة القدم وهو رايح يجيب جون الناس مش بتوسعله ده فيه واحد بيشده من الفانلة وواحد بيكعبله وواحد بيحاول يوقفه وفي الآخر بيروح برضه ويدخل الجون وده اللي بيخليه نجم رغم إن فيه 11 لاعب عايزين يمنعوه وهو بيحقق هدفه ..

عموماً الراجل ده لم يفدني في موضوع القرض بس أهداني درس مهم جداً وخرجت من عنده عندي طاقة كبيرة ... المشاكل اللي بتحصللى هي اللي بتحصل لكل الناس بس فيه ناس بتستسلم من أول عائق وفيه ناس بتكمل وتعافر لحد ما تخلص ال11 عائق وتحط الجون وهما دول النجوم في أى مجال في الكورة .. في البيزنس .. في الطب .. في الهندسة .

علشان كده لما حد بيشتكيلي كتير من أى عوائق في حياته بحاول أحكيله القصة دي وأقوله خليك نجم .. خليك أبو تريكة

شارك المقال :