FB Instagram Twitter Youtube Linkedin دراسة الجدوى | أكاديمية اعمل بيزنس
 
الرجوع الى المدونة

دراسة الجدوى

دراسة الجدوى

دراسة الجدوى ببساطة 

من أكتر الموضوعات اللى جالنا عليها أسئلة الفترة اللى فاتت هى دراسة الجدوى وعشان كده هنتكلم عليها النهاردة بشكل مبسط جداً كتعريف والعناصر اللى محتاج أنفذها فى دراسة الجدوى .

دراسة الجدوى ببساطة هى تحليل وتقييم بيقوم بيه أى صاحب بيزنس أو مشروع عشان تشوف إذا كنت هتقدر تبدأ مشروعك بنجاح ولا لأ والتحليل ده بيتضمن كل الجوانب اللى ليها علاقة بمشروعك او فكرتك أو البيزنس الى هتقوم بيه زى الأمور القانونية والمالية ( التكلفة المقدرة ) والجانب التقنى والفنى وكل عناصر نجاح المشروع ده غير ان دراسة الجدوى بتسمح لصاحب المشروع إنه يعرف السلبيات اللى ممكن تقابله والايجابيات الموجودة قبل ما يستثمر وقته وفلوسه فى المشروع ده .

وببساطة دراسة الجدوي تنقسم ل 3 أجزاء :

 

1- دراسة تسويقية (سيتم تغطيتها فى سلسلة يعنى إيه تسويق )

2- دراسة فنية.

33- دراسة مالية.

مثال بسيط ..

لو صاحب محلات Fast Food حب إنه يتوسع بالفروع بتاعته فى مناطق جديدة واعدة من وجهة نظره أو عنده نظرة مستقبلية بإن مشروعه هينجح فى المناطق دى يبقى لازم يعمل دراسة جدوى متحدد فيها كل حاجة مش مجرد احساس وعواطف .. يا ترى افتتاح فروع جديدة هيتكلف قد ايه وهل التوسعات دى هتأثر على باقى الفروع مثلاً بإنه يسحب منها العملاء ولا لأ .. هل المناطق اللى هيفتح فيها محتاجة أصلاً لمحلات Fast Food ولا مش محتاجة وهكذا ..

فيه طريقة تانية لعمل دراسة الجدوى عن طريق تقسيمها لعناصر ودراسة كل عنصر على حدة ...

طب ايه هى عناصر دراسة الجدوى ؟

1- الإطار العام للمشروع :

أو بمعنى أدق تحديد شكل البيزنس ده أو الفرص المطلوب تحليلها .. هل هو انشاء بيزنس جديد ولا توسع بشكل معين ولا استحواذ على مشروع قائم بالفعل .. يعنى حدد فى النقطة دى شكل مشروعك ايه لأنك بكده هتكون قطعت نص المشوار لأن عدم تحديد اطار المشروع بدقة من البداية ممكن يسبب حالة من  عدم التركيز عند أصحاب المشروع وكل العاملين فيه .. كتير من المشاريع بدأت بدون تحديد اطار أو شكل محدد لها من البداية وطبعا كانت النتيجة الطبيعية هى فشلها فى تحقيق أهدافها .

2- تحليل الوضع الحالى :

وطريقة تنفيذ المشروع وتحليل المنتج اللى بتقدمه وهل محتاج تعديل بسيط ولا محتاج إنه يتغير بمنتج تانى ( تغيير جذرى ) .. كمان نقط القوة والضعف أو ( المكاسب والخسائر) و المزايا والعيوب .. التحليل ده هيفيدنى مستقبلاً لو حبين انى أطور منتج جديد لأن هيبقى فيه نقط مشتركة مع المنتج القديم وطبعا ده هيوفر الوقت والفلوس اللى هتصرفها على تطوير المنتج ده .

ملحوظة مهمة : يفضل فى النقطة دى إنك تحدد المشكلات فقط بشكل واضح بدون الدخول فى تفاصيل حلها لأنك لو عملت كده هتستنزف كل مجهودك فى حل مشكلات كتير وهتضيع وقت كبير جداً .. الهدف هو تحديد المشكلة فقط بشكل مجرد .

3- متطلبات المشروع :

وهى تحديد كل العناصر اللى بيتطليها المشروع عشان يتنفذ وطبعاً دى بتختلف من مشروع للتانى .. يعنى لو هتبنى مدرسة غير مثلاً إنشاء شركة استيراد وتصدير .. إنت فى الأول محتاج أرض عشات تبنى عليها المدرسة ومحتاج إدارة ومدرسين لكنك فى شركة الاستيراد والتصدير محتاج مقر للشركة ومحتاج متخصص فى الشئون القانونية والمالية ومتخصص فى الإجراءات الجمركية مثلاً .. يعنى كل مشروع له متطلبات مختلفة .

4- التنفيذ :

وهو الحل أو مجموعة الخطوات اللى هتاخدها عشان تلبى المتطلبات دى وكمان ايه البدائل المتوفرة لو فى نقص أو عدم امكانية تنفيذ بعض المتطلبات دى وع الأخذ فى الاعتبار أسباب اختيار طريقة تنفيذ للمشروع والمتطلبات دى عن طريقة تانية ومتطلبات تانية والإجراءات دى عملية وقابلة للتطبيق ولا لأ ؟

5- التقييم :

وتحليل التكلفة الإجمالية للمشروع والحلول الموصى بها وتحديد بدائل مختلفة نقدر نرجع ليها فى حالة تعثر تطبيق أى طريقة لتنفيذ المشروع أو فى حالة عدم توفر بعض المتطلبات .. ده غير تحديد جدول زمنى للمشروع وتحديد تاريخ بدء وانتهاء وحساب التكلفة الإجمالية للمشروع وتجهيز ملخص فيه حساب نسبة العائد على الاستثمار من المشروع .

6- المراجعة :

فى المرحلة دى بنجمع كل عنصر من العناصر اللى فاتت فى دراسة الجدوى وبنعمل مراجعة مع كل الأطراف المعنية بتنفيذ المشروع لسببين : أولهم هو إثبات دقة دراسة الجدوى، والتانى هو اتخاذ قرار بتنفيذ المشروع إما الموافقة عليه أو رفضه أو تعديل بعض النقاط قبل اتخاذ القرار النهائى بالتنفيذ لو تمت الموافقة عليه .. من المهم إن جميع الأطراف توقع على دراسة الجدوى لأنها مهمة جداً مع تقدم المشروع لو اتنفذ ( الأسباب اللى كل اللى ليهم علاقة بالمشروع وافقوا عليها بتكون مكتوبة ).. أو إذا تم رفض دراسة الجدوى (لأن أسباب الرفض بتكون مكتوبة فى الدراسة برضه)

وأخيراً العناصر دى عامة وممكن تطبيقها فى أى مشروع سواء كانت تأسيس شركة أو إنشاء موقع اليكترونى أو حتى إنشاء مشروعات صغيرة .

شارك المقال :