طبعا إحنا اتكلمنا في البوست اللي فات عن استراتيجية كشط السوق أو إنك تاخد اللي على الوش :)

(Skimmingg) ودي طبعاً ماينفعش تطبق في كل المنتجات بنفس الطريقة يعني مثلاً الموبيل مالوش مقاسات ولا موسم معين يعني ينفع تشيل نفس الموبيل في الشتا والصيف إنما مش هتعرف تلبس الجاكت مثلاً في الصيف وهكذا فعلشان فيه سلع وقتها محدود جداً يعني لو ماتباعتشى في وقت معين فبيتم اللجوء لاستراتيجية شبيهة بس بيراعوا فيها المتوسط يعني بتبدأ عالي وبعدين بتنزل في حدود الموسم لكن في نهاية الموسم بتبيع أقل من التكلفة لأن انتهاء الموسم معناه إن السلعه دي هتقعد للسنة اللي جاية ودي كارثة على مستوى ركن الفلوس وكمان مخاطرة إن الذوق يتغير تماماً فمتقدرش تبيعها .... فالحل بيكون بالتسعير بالمتوسط يعني أنا لو عندي جاكت تكلفته 500 ج مثلاً فببدأ الموسم ب 800 ج طبعاً فيه ناس بتشتري علشان التميز وفيه ناس بتشتري علشان ممكن الموديل نفسه يخلص أو المقاس اللي بتلبسه يخلص فبنلاقي ناس بتشتري ب 800 ج وبعد شوية نلاقي قبل ما الموسم ينتهي بفترة نفس الجاكت بيتباع ب 600 ج وقبل إنتهاء الموسم بأسبوعين مثلا يبدأ يتعمل أوكازيون ويتباع في الجاكت ب 400 ج ....

طبعاً الناس بتفتكر إنه بيخسر وفيه ناس بتفتكر التكلفة أقل من كده بكتير لكن هو مش بيخسر لأنه بيبيع بمتوسط هو كسب في الأول 300 ج في القطعة وبعدين 100 ج في القطعة وبعدين خسر 100 ج في القطعة فالآخر المحصلة بتبقى مكسب ..... طبعاً هو بيبيع لحد مايهموش أوي إنه السنة اللي بعدها لابس موديل قديم في سبيل إنه بياخد حاجة كانت بتتباع ب 800 وهي في ال Sale بنص تمنها والبياع بيكسب لأنه لازم يبيع آخر قطعة لأن مكسبه فيها .....

إذن فالإستفادة متبادلة .... طيب إفرض كل الناس انتظرت لآخر الموسم طبعاً مش هينفع لأن الألوان المميزة بتخلص والمقاسات الكبيرة بتخلص والموديلات الجميلة كلها على بعض بتخلص .... طيب فيه نوع تاني من ذكاء التسعير بتلجأ ليه الشركات الكبيرة في السلع الغير مسعرة وهي إنها ترفع السعر جامد جداً لوقت معين لحد زي ما بيقولوا يسمع السعر كويس وبعدها يبدأ ينزل بالسعر لمستوى أعلى من الطبيعي لكن في النهاية لأنك سمعت سعر عالي جداً فبتقول السعر نزل .....

يعني مثلاً لو فيه موديل عربية معينة سعره ثابت عند 100 ألف ج ... فجأة السعر يبقى 130 ألف ج مصحوباً بتقليل البضاعة وده بيسموه تعطيش السوق وبعد ما سعر ال 130 يسمع ينزل ل120 ألف مع إتاحة العربية فالناس كلها تبدأ تشتريها لأن سعرها نزل 10 آلاف ج بالرغم إن سعرها طلع 20 ألف ... وزي لما يبقى فيه زيادة متوقعة في الضرائب مقدارها مثلاً 10 % والناس كلها تستعد للزيادة ففجأة تطلع الزيادة 5% بس

وده طبعاً بيديك شعور بالارتياح لأن الزيادة لم تكن بحجم اللي انت سمعته بالرغم إن المحصلة النهائية إن الضرائب ارتفعت 5%