920033973
16342
article

رمضان شهر الإنجاز (2)

September 11, 2017    

- اتكلمنا عن ثقافة العمل في رمضان وأسباب إنخفاض الإنتاج في رمضان واتكلمنا عن أسباب الإنخفاض ومميزات العمل في رمضان

ثالثا ما هي الخطوات العملية اللي أقدر بيها أرفع الإنتاج والإنجاز ؟

1- حسن إختيار أوقات العمل ومرونتها :

بمعني إنه مش من الضروري إني أتمسك بعدد ساعات كبيرة يعني بدل 8 ساعات أقول هايبقي 7 ...لأ ممكن نخليهم 6 ساعات للحرص علي راحة الموظفين وكمان لو أقدر يبقي فيه مرونه في الحضور والإنصراف ...بمعني انت مطلوب منك 6 ساعات لو جيت 8 صباحا ممكن تنصرف 2 ...لو جيت 9ص انصرف 3 وبحد أقصي الحضور 10 صباحا مثلا ....أنا عملت كده في الشركة وسمحت لكل قسم اختيار ساعه معينة يعني مثلا قسم التسويق اختار 10 وأقسام تانيه اختارت 9 وأقسام اختارت انها تشتغل مساء Night Shift وهكذا ...

2- ربط وقت العمل بالانتاج :

في بعض أنواع الانشطه ممكن تربط الإنصراف بالإنجاز ...يعني مثلا لو انت حققت تارجت معين في المبيعات ممكن تنصرف حتي لو الساعه 12 ...أو لو انا في مصنع ممكن نحدد عدد وحدات لكل قسم أو مجموعه أو فرد اللي بعدها ممكن نسمح له بالإنصراف .

3- الحضور المبكر من الإدارة :

لو تم الاتفاق إن موعد الحضور 9 صباحا مثلا يبقي لابد الإدارة سواء إدارة عليا أو تنفيذيه أو مشرفين يحضروا لمقر العمل 8:30 وده بيوجه رساله لكل فريق العمل إن إحنا جادين في العمل في رمضان ومش هانقبل إن شهر رمضان يضيع بدون إنجاز واضح .

4- أهداف رمضان :

لابد من وضع أهداف خاصة برمضان ...بمعني إن الأهداف العادية من الممكن إنها تكون غير مناسبة مثلا لو عندي مستهدف بيع ممكن يقل في رمضان بنسبه من 10% ل 25% علي حسب الصناعه ولكن بيتم تعويض الفارق بعلاقة قوية مع العملاء أو تعارف علي عملاء جدد بغرض الشراء (بعد) رمضان لو هما مقررين إنهم لن يشتروا في رمضان ...أو التجهيز للعمل بشكل جديد بعد رمضان أو العمل علي منتج جديد بعد رمضان ....إلخ

5- التحفيز :

سواء التحفيز ده في صورة Bonus زيادة مثلا للموظفين أو Promotion في حالة العملاء ....لابد من تحفيز مميز لرمضان عن طريق مكافأة للموظف أكبر من العادي أو عرض قوي للعميل أكبر من العادي مع التأكيد إنه استثناء وإن بعد رمضان سوف يتم العودة للشكل الطبيعي .

6- تعميم النماذج الناجحه :

لابد من عرض بعض قصص النجاح من داخل الشركه سواء حالية أو سابقة واثبات إن المشكله ليست في السوق أو إن مشكلة السوق ليست العامل الوحيد وإن هناك أشخاص استطاعوا في رمضان النجاح وبقوة وتحقيق مستهدفات عمل عالية وإنجاز واضح .

7- المتابعه الدقيقية :

من ضمن الأشياء التي تؤكد للعاملين أن الإدارة مصممه علي النجاح في رمضان هي المتابعه الدقيقة والقريبة ...يعني لو بنعمل تقرير شهري نخليه مرتين في الشهر ...لو بنجتمع مره في الأسبوع نخليهم مرتين ...ده بيأكد الرسالة إننا مصرين علي النجاح .

8- رفع الوعي :

قبل كل الإجرائات الماضية يجب رفع وعي الناس بأهمية العمل وإن المشكله بنسبة كبيرة ليست في الشهر نفسه لكن في تصرفنا تجاه الشهر .

دول 8 نقاط سعيد إني شاركتهم معاكم وأنا واثق جدا إن كل واحد فيكم يقدر يفكر بطريقة أفضل مني ويخرج بنقاط أفيد للصناعة الخاصة به وكل واحد ياخد ما يناسبه من نقاط ويزود عليهم افكارة الخاصة وربنا يوفقكم كلكم ويكون رمضان شهر إنجاز ليكم وليس شهر كسل


مقالات مشابهة

المزيد

الأكثر قراءة

المزيد
رمضان شهر الإنجاز (2)
رمضان شهر الإنجاز (2)

- اتكلمنا عن ثقافة العمل في رمضان وأسباب إنخفاض

رمضان شهر الإنجاز (1)
رمضان شهر الإنجاز (1)

- المشهور عن رمضان في أوساط العمل والإنتاج أنه شهر