كل ما سهلت على عميلك عملية الشراء كل ما كان ده أفضل وأحسن ليه

أغلب الشركات بتضع عوائق كتيرة فى عملية الشراء هنلاقى مثلًا مطاعم الtakeaway بتتطلب الاتصال بالتليفون وده بيعتبر عند بعض الناس أمر مرهق نوعاً ما .. طبيعة العميل هنا أنه كسول شوية ودايماً مرهق وتعبان ..

طب ايه البديل اللى يقلل الإرهاق ده ويبقى مناسب للعميل وللشركة ؟

الحل أوجدته شركة توصيل البيتزا للعملاء اسمها "بيتزا ماجيك" ودى موجودة فى "جلاسكو" فى اسكتلندا عن طريق توفير خدمة طلب البيتزا أونلاين عن طريق موقع الشركة .. المنيو موجودة بالكامل على الموقع ويقدر العميل يختار اللى هو عاوزه ويدفع تمنه أونلاين من غير ما يتكلم مع موظف واحد بخطوات سهلة وبسيطة ومن غير صعوبة فى التنفيذ .. طبعاً الخطوة دى كان ليها أثر فى اجتذاب شرائح أوسع وأكبر من العملاء اللى بيطلبوا البيتزا عن طريق التليفون عن طريق توفير مزايا كتير منها :

إن الناس اللى مش بيحبوا يتكلموا كتير فى التليفون ودايمًا مرهقين هيقدروا يطلبوا اللى هما عاوزينه من غير مشاكل لأنهم مش بيتعاملوا مع موظفين خالص ولا بيتكلموا فى التليفون .. غير كمان إن وجود "المنيو" أونلاين هيسهل على الشركة إنها تغيرها وتغير أسعارها من غير ما تتحمل تكلفة طباعتها كل شوية ده غير إن عملية "الأتمتة" من مصطلح ال Automation )يعنى كل وظيفة أو خطوة هتتعمل بشكل أوتوماتيكى بالكامل ) خلت الموظفين يقضوا وقت أقل فى استقبال الأوردرات عن طريق التليفون .

أهم ميزة وفرها الطلب أونلاين هو تقليل نسبة الخطأ عن الطلب بالتليفون واللى بيتطلب من الموظف إنه يكتب الأوردر .. الغلط هنا نسبته تكاد تكون معدومة إلا لو كان العميل نفسه هو اللى طلب أوردر غلط .

الشركة مستمرة برضه فى استقبال طلبات عن طريق التليفون لكن اختيار البيتزا المناسبة عن طريق الإنترنت أسهل كتير وبيناسب شريحة عملاء أكبر .

اللى نقدر نطلع بيه من قصة "بيتزا ماجيك" إنك تدور على راحة العميل وتشوف الأسهل والأكثر راحة ليه عن طريق تصميم موقع وتوفير خدمة الطلب أونلاين منه بسهولة وقابلية استخدام بسيطة ومريحة مع الإبقاء على امكانية الطلب عن طريق التليفون برضه كحل مناسب للبعض الآخر ودلوقتى بقى فى مواقع مصرية كتير بتوفر الحل ده زى موقع Otlob.com وبيقوم بتقديم نفس الخدمة .

شوف ايه اللى تقدر تقدمه لعميلك يسهل عليه حياته مش بس إنه يشترى منك وربنا يوفق الجميع