سقف الطموح

سنه 94 حصلت على ثانوية عامة بمجموع تقريباً 90% بس كنت جايب 100% فى الرياضة والإحصاء وكمان 6 درجات مستوى رفيع وضايع فى الأحياء مثلاً بس الكلام كان فى العيلة إنى لازم أدخل طب استخساراً فى المجموع و علشان العيلة كلها دكاترة ولها استثمارات فى الطب مستشفى ومركز آشعه والشغل مضمون بعد التخرج وفيه أكتر من حد دكتور في كلية طب يعني الطبيعي إني أدخل طب بس طبعا أنا كان لازم أدخل هندسة مش بس علشان أنا بحب الرياضة لأ وكمان بكره جداً الأحياء وصعب جداً أذاكرها .... المهم دخلت هندسة وكانت ساعتها بتاخد من 84% يعني داخل وانا زيادة 6% يعني المفروض أتفوق فيها وأبقي معيد ... . واحد ابن حلال معرفة كان متخرج من الكلية وجى يخلص ورقة فقابلته قاللي نصيحة غيرت مجرى حياتى فى الكلية تماماً .... قاللى إن مفيش أى داعى إني أتفوق لأن كده كده الكلية مبتعينش معيدين ومش هتعين ومش فارقة بقى تجيب امتياز من إنك تخرج بمقبول .... طبعاً أنا خدت النصيحة على إنها حقيقه مسلم بيها وفعلاً تعاملت مع الكلية إني عايز أتخرج بس فبذاكر علي قد النجاح لدرجة إنى فتحت شركتى الخاصة سنة 98 قبل التخرج بسنة كاملة وده أنا شايف إنه كان غلط ... .وعلشان ربنا يديني درس السنة اللى أنا اتخرجت فيها والسنة اللى قبلها وكمان اللي بعدها تم تعيين معيدين في الكلية يعني كلام صاحبى ده كان غلط خالص وكل اللي حصل إنى أخدت كلامه عذر لعدم التفوق باعتبار إن حتي لو تفوقت مش هتعين معيد فليه أتعب نفسي ؟

سنة 2002 بعد ما فتحت الشركة بأربع سنين قررت إني أنقل شغلي القاهرة خصوصاً إن البرمجيات والإنترنت كصناعة سوقها الأكبر هو القاهرة ودي كانت خطوة مقلقه جدا ليا لأني كأي حد من سكان الأقاليم كانت القاهرة مرتبطة معايا بزحمة وحر وعرق ويوم عايز تخلص فيه علشان تلحق الطريق ولو خدت ملف أو كوبرى غلط ممكن تقعد ساعه تلف علشان ترجع للعنوان اللي انت رايحه وسوق ضخم ملوش أول من آخر ورغم إني بنزل من وأنا عندى 11 سنه أشترى بضاعة بس الأمر عندي كان فيه نوع من أنواع القلق والهيبة والخوف من الفشل .... المهم قابلت صدفة واحد قريبي كان فاتح شركة في القاهرة ولما عرف إني هاخد الخطوة دى شجعني جداً وقاللي كتير من الأسماء اللي انت بتسمعها لما بدوؤا شغلهم كانت إمكانياتهم أقل من كده بكتير فانت فرص نجاحك عالية جداً .... المهم أخدت كلامه برضه على إنه حقيقة مسلم بيها والحمد لله حققت نجاح كبير (من 2002 لحد 2008 لأن بعد كده فشل ذريع هنقول أسبابه فى وقته ) المهم إن النجاح ده كان بأسباب كتير من ضمنها كلام الراجل ده اللي خلاني بشتغل وأنا متطمن إني هنجح كحقيقه مسلم بيها .

المهم اللي عايز أقوله من الحكايتين دول إن الكلام اللي بيوصلك فيه إيجابي جداً وفيه سلبي جداً وانت مش هتقدر تتحكم في الكلام ده ولكن تقدر تتحكم في تعاملك انت الشخصي مع الكلام والنصايح والتجارب الحياتية اللى في حياتك لأن كل واحد له إمكانياته الخاصة وظروفه وتجربته وانت مطالب إنك تتعامل مع الكلام الإيجابي والسلبي وتحلله وتوصل لحقايق .... يعني لو حد بيقولك مصر مفيهاش فرص خالص وأخدت الكلام ده كحقيقه مش هتشتغل بس لو حللت الأمور وبصيت لقيت ناس بتشتغل وتعمل فلوس وتشتري عربيات وعقارات وكتير منهم أقل منك في الامكانيات الشخصية بس مخدوش الكلام علي إنه حقيقة ونزلوا واشتغلوا ووصلوا يبقي في الآخر متلومش حد غير نفسك ... .ممكن تبقي في بيئة سيئة فيها 10% ناجحين و90% فاشلين فانت اللي بتختار في الآخر هتكون من الناجحين ولا من الفاشلين بس لو اخترت متلومش حد غير نفسك متلومش الظروف لأن الظروف علي الكل فليه فيه ناس نجحت وناس فشلت ؟؟؟

وافتكر إن محمد صلاح اللاعب المصري اللى مكسر الدنيا قعد سنين بيركب الساعة 10 الصبح مواصلات علشان يروح القاهرة يتمرن في نادي المقاولين ويرجع بلده في الغربية وهو عنده 13 سنه وملعنش الظروف ولا اشتكي إنه متولدش جنب النادي

في النهاية إحنا اللي بنحط لنفسنا سقف للطموح واحنا اللي بناخد قرار إننا نرفع سقف الطموح فنبقى من الناجحين أو نخفضه وربنا مبيضيعش مجهود حد