FB Instagram Twitter Youtube Linkedin سيب العميل ينتصر عليك | أكاديمية اعمل بيزنس
 
الرجوع الى المدونة

سيب العميل ينتصر عليك

سيب العميل ينتصر عليك

إزاي تكسب زبون جديد
سنة 2004 كان ليا صديق بلدياتي بيشتغل مدير مبيعات شركة كبيرة في السعودية وكان فى اجازه وانا كنت عايش لوحدي في القاهرة فجه يقضي معايا اسبوع يخلص ورق ويتفسح ويشترى ملابس علشان اللبس كان في الوقت ده في مصر ارخص منه في السعودية واللبس بالنسبة له كان مهم جداً والشركة بتديله بدل علشان يصرف كويس لأنه واجهة للشركة.

قبل ماننزل اتفقنا إنه محتاج 6 أطقم يبدل فيهم الطقم عبارة عن بدلة وقميصين وكرافات والميزانية ألفين جنيه للطقم قلتله انا لسه شاري بدله كويسة جداً من محل في سور نادى الزمالك تعالي بقي وانا هظبطك وعملت فيها مرشد سياحى.

استمع لشكاوي الزبون
دخلنا المحل وبدأنا نتفرج وإحنا سامعين نقاش بين أحد البياعين وعميل شكله محترم جداً والعميل طلب مدير المحل وجاله مدير المحل وبدأ يحكيله إنه كان هنا إمبارح وشاري لبس بحوالي 5 ألاف جنيه وبعد ما مشي لقي الكرافات دي اللي هو شاريها ب 75 ج بتتباع ب 50 ج في محل في سور نادي الزمالك برضه و الراجل صعبان عليه إن شكله طلع وحش قدام ولاده إنه زبون للمحل ومع ذلك يتعمل فيه كده وعايز يرجعها .... مدير المحل الجهبذ عمل إيه ؟؟؟

عبارات خاطئة لا تقال للزبون
طبعاً في البداية قاله إزاي تلاقيها بالسعر ده وانا بشتريها ب60 ج (طبعا المحل التاني ذكي إشتري الكرافت ب 60 ج ويبيعها ب 50 ج بخسارة 10 ج مقابل إنه يطلع عليه سمعة إنه رخيص ويكسب في بنود تانيه غاليه زي البدلة أو الجاكيت ....إلخ

المهم مدير المحل بدأ الأول يشكك في رواية الراجل وبعد كده بدأ يتهم المحل التاني إنه بيحرق والراجل طبعا بيقوله وانا مالي إنتهاءاً بقي إنه بدأ يتخانق مع العميل اللي صوته بدأ يعلي ويقوله أنا ممكن ارجعها لك لو فيها مشكله إنما اللي انت بتقوله ده مش مشكله.

المهم الموضوع قلب خناق وزعيق وانا هتصل واقفلكم المحل والتاني يقوله متقدرش واعلى مافي خيلك اركبه كل ده وانا مكسوف قدام صاحبي اللي انا جايبه المحل على أساس إنه اجمد حاجه وعايز اطلع 25 ج من جيبي واديها لمدير المحل وأقوله ياعم رجعله الفرق ده إنت كسبان منه ألف ج علي الأقل !!!!!

طبعاً بعد كل ده صاحبي قفش وده حقه وانا وهو توترنا ورغم إن كان فيه كام بدلة عجبونا خدنا بعضنا ومشينا ورحنا اشترينا البدل من محل في البطل أحمد عبدالعزيز .

إزاي تتعامل مع المرتجعات
كل ده عمال افتكره بما إننا الأيام دي بنتكلم عن سياسة المرتجعات وافكر إزاي مدير المحل قفل دماغه علي 25 ج وخسر 12 ألف ج مبيعات وخسر معاهم 3 زباين محترمين اللي هما أنا وصاحبي والراجل اللي بعد ما كان زبون المحل عايز يولع في المحل ؟؟؟

يعني والله الموضوع عدى عليه ييجي 12 سنة بس كل شوية يبقي عندي فضول وافكر الراجل مدير المحل كان عايز يعمل إيه بالظبط وعايز يثبت إيه وكان بيفكر في إيه ؟؟ ده لو بعت جاب 5 كنز او 6 نسكافيه للزباين اللي بتشتري هيكلفوه اكتر من كده ؟؟ إيه الغباء اللي نزل عليه ساعتها خلاه يعمل كده ؟؟؟ وليه متصرفش بسرعه وقال للعميل مثلا الكرافات ده هديه من المحل ورجعله ال 75 ج اللي تعبينه ؟؟؟

نرجع ونقول إن التعامل مع العملاء فن وذوق وذكاء ورؤية للمستقبل والعلاقة مش منافسه ده بالعكس سيب العميل ينتصر عليك ويحس إنه طالع منك كسبان ومعلم عليك كمان طالما ده هيريحه يا إما متشتغلش في البيع أو الإداره وشوف حاجه تانيه إشتغل فيها

 

شارك المقال :