FB Instagram Twitter Youtube Linkedin سيطر على وقتك بطريقة الطماطم "البومودورو" Pomodoro | أكاديمية اعمل بيزنس
 
الرجوع الى المدونة

سيطر على وقتك بطريقة الطماطم "البومودورو" Pomodoro

سيطر على وقتك بطريقة الطماطم

"هو الشغل ده ما بيخلصش ابدًا".. الجملة دي أكيد كلنا يا إما سمعناها أو قولناها قبل كده، بس حد يعرف ليه؟، في الخمسينات كان في مؤرخ إنجليزي اسمه "نورثكوت باركنسون"، اكتشف قانون سماه قانون باركنسون، واللي بيقول "إن أي مهمة هاتمدد وتكبر عشان تملى الوقت المتاح ليها" ومع مرور السنين القانون ده أثبت صحته في مجالات كتير، طيب يعني إيه الكلام ده؟

باركنسون كان يقصد ان لو عندك مهمة عاوز تعملها أو شغل مطلوب منك فعادة هايأخذ كل الوقت اللي انت مخصصه ليه وفي الغالب كمان هايزيد، وده لأن كل ما الوقت زاد ها تلاقي الشغل زاد واتفرع وأخد كل الوقت، فعشان كده لا الشغل بيخلص ولا أنت بتعرف تخلصه في وقته ولا بتعرف تعمل أي حاجة تاني في حياتك غير الشغل، طيب نعمل إيه؟

في أواخر الثمانينات كان في عالم إيطالي اسمه "فرانشيسكو سيريلو" ابتكر طريقة عبقرية في إدارة المهام وسماها طريقة "البومودورو" Pomodoro أو الطماطم بالإيطالي، وسبب التسمية الغريبة دي هي إنه كان بيستخدم منبه على شكل طماطم، الطريقة ديه بتقوم على مبدأ بسيط هو أن كل ما الوقت اللي المفروض الإنسان يركز فيه زاد كل ما الجودة قلت، وعشان كدة سيريلو ابتكر الطريقة ديه بهدف إنه يحافظ على جودة الشغل/التركيز، عشان المهام تخلص صح ومن غير أخطاء وكمان أسرع.

الطريقة بتقوم على إنك لو عاوز تعمل شغل/مهمة أو تذاكر أو تتعلم أي حاجة تاني فأنت محتاج تقسمها على أقسام (زي شرائح الطماطم) وتعمل كل قسم مدته 25 دقيقة وبعدها 5 دقائق راحة إجبارية تقوم تعمل فيهم أي حاجة تاني وترجع تكمل لـ 25 دقيقة تانية وبعديهم برضوا 5 راحة إجباري وبعد كل أربع أقسام ((25+5) ×4) تأخذ استراحة من 20-30 دقيقة تفصل فيهم وتتأكد من جودة الشغل/المهمة اللي خلصتها وبعديها تبتدي تكرر الموضوع وتبدأ من جديد بقسم جديد (25+5) وده مع وجود منبه سواء علي تليفونك أو اللاب اللي بتشتغل عليه أو حتى منبه جنبك يرن كل 25 دقيقة.

وعشان تعمل الطريقة ديه أنت لازم تعدي على كذا مرحله، تبتدي بالتخطيط أو تسجيل الأعمال اللي مطلوب تعملها وبعديها تقسم الشغل/المهمة حسب الأولوية ومدة الإنجاز لأقسام تأخذ منك 25 دقيقة بالضبط لكل قسم، بعديها فيه المتابعة وده لأن مدد الراحات إجباري لأنها مهمة أكتر من الشغل نفسه، وفي كمان مرحلة التسجيل يعني أنت محتاج تسجل خلصت إيه من خطه الشغل وإيه لسه وإيه أخذ وقت أقل أو أكتر من المخطط وكمان إيه الحاجات اللي عطلتك ومدتها، وزي أي خطة لازم يكون فيها جزء للمراجعة يعني بعد كل مجموعة خلي في 5 دقائق مراجعة على الشغل اللي خلص وتتأكد إنه زي ما أنت مخطط.

طبعا أول سؤال هاتقوله "وليه كل اللخبطة دي ما أسهل أذاكر/اشتغل ساعتين على بعض وأخد ساعة راحة مرة واحدة؟" والإجابة ببساطة إن الإنسان بيكون في أعلى تركيز ليه أول ما يبدأ أي مهمة وبعد كدة بيقل مع الوقت، وعشان كده الطريقة دي قائمة على الفواصل كل مدة صغير بحيث يفضل في أعلى تركيز ليه لأطول فترة ممكنة فالمهام تخلص صح ومن غير أخطاء وكمان أسرع.

نيجي لتاني سؤال "طيب لو مش عارف أقسم واتابع وأسجل كل ده اعمل إيه؟" الأساس انك تعرف أن كل حاجة بتيجي بالتدريب يعني خد قرار وابدأ تقسم شغلك/مهامك وتتأكد إنك ملتزم بوقت الراحات وهاتلاقي الموضوع اتحسن مع الوقت والممارسة ده غير إن في أكتر من تطبيق على الموبايل أو الكمبيوتر ممكن يساعدوك زي (Countdown Clock / Focus Booster /Flowkeeper Pomodoro for Mac / Pomodoro for Andriod/ iTomato /Pomodoro Focus Booster) ودول فيهم اللي مجاني بالكل و فيهم اللي بقيمة بسيطة 99.$ .

في مقولة شعبية بتقول إن " أهم من الشغل تزبيط الشغل" ودا اللي بنسميه إدارة الموارد، واللي هو جزء مهم جدا من علوم الإدارة، والوقت هو أهم مورد محتاجين نتعلم إزاي نديره ونطلع منه أفضل نتائج، وسواء في الشغل أو براه كل ما خلصت أسرع وأفضل وأكتر كل ما ها تلاقي وقت عشان تطور نفسك وكمان وقت لحياتك الشخصية والعائلية وحتى الرياضية أو الكروية وأي حاجة تاني نفسك تعملها، وهو ده العائد الحقيقي من نظرية البومودورو أو الطماطم بالإيطالي لإدارة الوقت والمهام.

شارك المقال :