مافيش حد مش عايز يكبر وينجح في شغله، ويوصل لمركز أعلى، ومرتبه يزيد، ويحس بالتقدير لقيمة الجهد إلي بيبذله في الشغل، وتعتبر "الترقية" أحد آليات أو مظاهر نجاح الشخص وحصوله على تقدير لمجهوده، و إنه يستحق يتحمل دور أكبر في الشركة.

الغريب بقى إننا كتير بنلاقي موظفين شاطرين ومجتهدين بس مش بيترقوا، وبنلاقي ناس أقل منهم في الكفاءة والاجتهاد وهما إلي بيترقوا!!

ده لازم يخلينا نسأل الغلط فين؟ أنا أقولكوا... الغلط بيبقى لسببين:

1- مش أي حد مجتهد أو شاطر يبقى لازم يترقى على طول، فيه شروط أو مواصفات لازم تتحقق في الموظف الأول عشان يستحق الترقية، والترقية قبل استيفاء الشروط ديه بتبقى مش من حق الموظف.

2- ناس كتير تستحق الترقية، بس بتطلبها بصيغة غلط، وده بيخلي الطلب يترفض، والموظف ما ياخدش حقه في الترقية إلي هو يستحقها.

عشان كده هنتكلم في بوست النهاردة عن المواصفات والشروط إلي لازم تحققها عشان تستحق الترقية، وهنعرف كمان الطريقة المثالية إلي تطلب بيها إنك تترقى.

نيجي للنقطة الأولى، قبل ما تطلب ترقيتك في الشغل لمنصب أعلى لازم:

- تكون مبتكر ومبادر، يعني ماتكتفيش بأداء مهمتك زي ما بيتطلب منك وبس، لازم تبادر وتقدم أفكار وطرق مبدعة لتطوير الشغل، وتنظيمه، وتحسين جودة الإنتاج.

- شوف مهارة معينة تخليك مميز عن غيرك واتقنها، عشان يبقى عندك ميزة عن باقي الموظفين تخليك إنت الأحق بالترقية.

- شيل من دماغك إن الترقية تهديد لمنصب مديرك، بالعكس، ساعد مديرك إنه ينجح، لأن كونك هتترقى مش معناها إنك هتنافسه، كمان نجاح مدرك ونرقيته معناها فرصة بتفضى وبتبقى متاحة ليك إنت.

- اتعلم من مديرك مهارات الإدارة وقيادة فريق العمل، بحيث لو مديرك سافر أو خد أجازة تقدر تقوم بمهامه لحد ما يرجع.

- لو عايز تترقى لازم تبذل جهد زيادة في شغلك، وتتحمل مسئوليات جديدة ماكنتش بتعملها قبل كده.

- لازم تتقن إتمام مهامك مش بس في الوقت المناسب، بس بإتقان وجودة أكبر من غيرك.

- دّور دايما على تحديات جديدة، وخلي هدفك باستمرار تنجح في التحديات ديه.

دلوقتي بقى لازم نتكلم عن الطريقة الصح إلي تطلب بيها الترقية، لأنك لو توافرت الشروط ديه عندك وعبرت عن حقك في الترقية بطريقة غلط، مش هتترقى وهتبقى ضيعت حقك.

أولا: اختار الوقت المناسب

إنت عارف شركتك أكتر من أي حد، فلو فيه ظروف استثنائية بتمر بيها الشركة زي أزمة مالية أو خسائر بتعاني منها الشركة مثلا، فده مش الوقت المناسب خالص لطلب الترقية. ماتستعجلش، واختار التوقيت الصح والمناسب عشان تقدم طلبك للحصول على ترقية.

ثانيا: اكتب لائحة بأبرز وأهم طلباتك

بعد ما تختار الوقت المناسب، لازم تجيب كده ورقة وقلم وتكتب أهم المتطلبات أو الأمور إلي عايز تحسنها أو المزايا إلي عايز تاخدها مع الترقية، زي: عايز تغير المسمى الوظيفي ليك؟ زيادة في المرتب؟ تكون إنت قائد لفريق العمل؟ ..إلخ.

بس لازم وإنت بتكتب القائمة ديه تكون فاهم ومتفتح لفكرة التفاوض، مش كل إلي هتطلبه هتاخده، فلازم تتقبل فكرة الوصول لاتفاق وسط يرضي جميع الأطراف.

ثالثا: اتكلم مع مديرك بشكل مباشر

في أغلب الشركات هتلاقي مديرك المباشر هو صاحب القرار الأخير في تريقيتك وزيادة مرتبك أو لأ، عشان كده مش هتستفيد لما تتكلم في قصة الترقية مع زملائك أو مع مديرين تانيين في الشركة.

حدد معاد مع مديرك واديله فكرة مسبقة عن الموضوع إلي هتتكلم فيه، عشان هو كمان يبقى مجهز نفسه للاجتماع ده.

رابعا: ماتنساش تتابع طلب الترقية

بعد ما تقعد وتتكلم مع مديرك، سجل كل إلي اتفقتوا عليه، وابعت بيه إيميل رسمي، واسأل مديرك على أي إجراءات أو إيميلات تاني لازم تبعتها عشان تتم عملية تريقيتك حسب الاتفاق إلي حصل بينكو، وتابع أول بأول سير الإجراءات المتعلقة بالترقية.

خامسا: حط احتمال إن طلبك يترفض

طالما اتأكدت من توافر الشروط إلي تخليك تستحق الترقية، وقدمت طلبك بطريقة لبقة ومهنية، ماتضايقش لو طلبك اترفض.

لأنك طالما طورت نفسك وتستحق تترقى، فالرفض معناه إن طلبك هيتنفذ بس في وقت تاني.

وهنا لازم تكون واضح مع مديرك وتتكلم معاه عشان توصلوا لاتفاق بخصوص الوقت إلي هتاخد فيه الترقية بتاعتك.

خلاصة القول..حسّن سمعتَك المهنية، وطّور شخصيتك ومهاراتك جوه وبره الشغل، اجتهد وتمّيز..واطلب في الوقت المناسب، عشان تقدر تترقى في شغلك.