FB Instagram Twitter Youtube Linkedin شرح عرض البيع الفريد والحصري | أكاديمية اعمل بيزنس
 
الرجوع الى المدونة

شرح عرض البيع الفريد والحصري

شرح عرض البيع الفريد والحصري

"عرض البيع الحصري"... مفتاح النجاح في تسويق منتجك

لو عايز تنجح في الترويج لمنتجك، وتقدر تبيعه للجمهور، اعمل تجربة على نفسك الأول، يعني حاول تبيع منتجك لنفسك، وشوف هتقتنع بيه ولا لأ؟ شوف إيه المميز في المنتج ده وممكن يخليك تختار تشتريه هو بالذات من بين المنتجات المنافسة إلي زيه في السوق؟

ولما توصل لسبب التميز ده، تبقى حطيت رجلك على بداية طريق تطبيق استراتيجية التسويق إلي هنتكلم عنها النهاردة: التسويق باستخدام "عرض البيع الحصري" أو زي ما خبراء التسويق بيقولوا (USP) "unique selling proposition".

يعني إيه عرض البيع الحصري بالظبط؟ أقولكوا:
عرض البيع الحصري هو الحاجة إلي تخلي منتجك مختلف، الحاجة إلي مافيش حد غيرك في السوق بيقدمها سواء كانت جودة أعلى أو سعر أقل أو تجربة أفضل للعملاء أو ابتكار تكنولوجي جديد، يعني بأسلوب تاني هو السبب إلي بتقدمه للعميل وتقنعه بيه إن منتجك مختلف وأفضل من المنتجات المنافسة.

نيجي بقى لأهمية USP... ليه مهم إن صاحب أي مشروع يحدد عرض البيع الحصري في المنتج بتاعه؟
لو ماحددتش عرض البيع الحصري هتلاقي صعوبة في إقناع العملاء المحتملين إنهم يشتروا منتجك، لازم مع دخول المنتج للسوق تقدم للعملاء سبب قوي يقنعهم إن منتجك أفضل من المنافسين، وبيقدم ليهم ميزة مختلفة عنهم، وده هيخليهم ياخدوا قرار إنهم دايما يشتروا المنتج بتاعك إنت.

طيب نيجي بقى لأهم جزء في البوست.. إزاي أحدد الـ USP الخاص بمنتجي؟
1- افهم جمهورك المستهدف:
تطوير USP بيبدأ بجمهورك المستهدف، جاوب على الأسئلة ديه: إيه إلي تعرفه عن جمهورك؟ وليه بيشتروا منتجات معينة من السوق إلي هتدخله بمنتجك؟ ومنتجك بقى هيلبي إيه من احتياجات جمهورك؟
من خلال أبحاث السوق واستشارة الخبراء والزملاء والأصدقاء تقدر تحط لنفسك قائمة بالأسباب إلي ممكن أي عميل يقرر يشتري منتجك بسببها.

2- ما هي الميزة التنافسية الخاصة بك؟
لازم هنا تحدد نقطة أو اتنين تكون شايف إن منتجك أو خدمتك ممكن تكون متميزة فيه.
وتعمل بعدها قائمة لمنافسيك، وتكتب فيها النقط إلي هما متميزين فيها، وشوف المشترك بينهم في القائمة ديه إيه؟ وهل نجحوا فعلا في التميز وتلبية احتياجات الجمهور بتاعهم ولا لأ؟
كده تبقى بدأت تحط أساس قوي تقدر بيه تدخل السوق.

3- ابحث عن توجهات الصناعة:
في الوقت نفسه، إنت محتاج تلقي نظرة وتدور كويس على الاحتياجات إلي ماحدش من منافسيك ركز عليها ولبى احتياج العملاء ليها، وتختار منها المناسب لمجال عملك ولمنتجك.

4- اختبار USP الخاص بك:
اختار عرض البيع الحصري الخاص بيك، وابدأ اتكلم مع خمسة أو عشرة من عملاءك المحتملين، وخد رد فعلهم وتعليقاتهم.
وده هيساعدك إنك تحدد:
- طبيعة البيزنس إلي إنت فيه.
- مين هما عملاءك المستهدفين.
- إيه عرض البيع الحصري إلي فعلا ممكن يخلي منتجك مميز عن المنافسين.

وهنلاقي أمثلة عملية كتير توضحلنا أكتر إيه هو عرض البيع الحصري زي قصة محل " K" للأحذية، وده عبارة عن مصنع صغير في إنجلترا بيصّنع أحذية جودتها عالية جدا، وبيهتم بالجودة أكتر من اهتمامه بمواكبة التصميمات الحديثة للأحذية.

ممكن من النظرة الأولى كده يبان لينا إن الجودة هي عرض البيع الحصري الخاص بمحل K، وإن ديه النقطة إلي لازم يسوقلها عند العملاء، لكن المصنع بشوية أبحاث في السوق وصل لأن العملاء ليهم رأي تاني، وإنهم بيفضلوا الأحذية بتاعته علشان مش بتطلع صوت لما بتمشي بيها وهي جديدة، وإن ده هو الدليل المقنع بالنسبة للعملاء على جودة الحذاء.

ومن هنا بدأ المصنع يركز على عرض البيع الحصري الصح، إلي فعلا يهم الجمهور والعملاء بتوعه، ورّكز عليه في كل الإعلانات والعروض الترويجية بتاعته عشان ينجح إن يجذب لمنتجه مزيد من العملاء المستهدفين.

حاولنا في البوست ده نعرض طريقة جديدة في التسويق لأي منتج أو خدمة، ولو حابين تعرفوا أكتر عن الموضوع ده تقدروا ترجعوا لعرض كتاب "100 فكرة تسويقية رائعة مستوحاة من الشركات الرائدة حول العالم - الجزء الثاني" للكاتب جيم بليث، وإلي ترجمناه ولخصناه لعملاء الأكاديمية على موقع اعمل بيزنس.

 

شارك المقال :