FB Instagram Twitter Youtube Linkedin شّوق عملائك .. يشتروا منتجك | أكاديمية اعمل بيزنس
 
الرجوع الى المدونة

شّوق عملائك .. يشتروا منتجك

شّوق عملائك .. يشتروا منتجك

فكرة إنك تدي عينة مجانية من المنتج هدية، عشان العملاء يجربوه، ولو عجبهم يرجعوا يشتروا منه تاني .. ديه فكرة قديمة، ولو بصينا حوالينا في السوق هنلاقي شركات كتير عملتها قبل كده، سواء كانت منتجات غذائية، أو أدوات مكتبية، أو إكسسوارات بيت ومطبخ .. إلخ.

عشان كده هنتكلم في بوست النهاردة عن فكرة مختلفة شوية في التسويق لأي منتج أو خدمة، وهي فكرة إنك تشّوق العميل من غير ماتخليه يجرب المنتج بتاعك بشكل كامل، بمعنى أبسط شوية: هتسمح للعميل يجرب بعض مزايا المنتج بتاعك، بس من غير ما يجرب المزايا الرئيسية بتاعته، وبكده تكون أثرت فضوله وشّوقته إنه يدفع فلوس ويشتري المنتج عشان يستمتع بكل مزاياه.

الموضوع ده ممكن يكون سهل في شرحه، لكن مش سهل إنه يتنفذ، مش سهل أبدا إنك تدي عينة مجانية فيها جزء من المزايا تشّوق العميل من غير ما تحط الميزة الرئيسية، ورغم كده فيه شركات نجحت إنها تعمل ده، وخلوني أقولكو أمثلة.

فرقة"Oasis".. ديه فرقة موسيقية من بريطانيا، حبوا في مرة يروجوا للسي دي الجديد بتاعهم بطريقة مبتكرة يزودوا بيها المبيعات، فوزعوا سديهات مجانية مع جريدة "صنداي تايمز" البريطانية، السي دي المجاني كان عليه 4 أغاني بس من الألبوم الجديد.

مش بس كده، ده كمان بعد ما العميل يشغل السي دي كام مرة، هتنتهي صلاحيته ومش هيعرف يشغله تاني.

وبكده هتبقى إنت كعميل اتشوقت جدا لما سمعت جزء من أغاني الألبوم، حتى لو سمعتها كام مرة بس، وده هيخليك طبعا عايز تسمع الألبوم كامل، فهتروح تشتريه.

وعندنا كمان مثال تاني بتعمله شركة مايكروسوفت مع كل إصدار جديد بتنزله من برنامج "ويندوز"، الشركة بتدي لأي مستخدم نسخة مجانية يجربها، بس لما يجي يستخدمها هيلاقي بعض الخصائص مش بتشتغل، وبتظهر ماسيدج للمستخدم إنه لو عايز يستفيد بكل مزايا الإصدار لازم يدفع فلوس عشان يشتريه.

وطبيعي إنت كعميل بعد ما تجرب بعض مزايا الإصدار الجديد، هتبقى حابب تستفيد من كل مزايا الإصدار، وهتبقى اتشديت للمنتج لما جربت جزء منه، فهتدفع وتشتريه.

بس مهم برضه نركز على كام نقطة مهمة لازم تنفذهم عشان نحصل على مزايا تطبيق الطريقة ديه في التسويق:

- اتأكد كويس جدا إن الهدية الترويجية إلي بتقدمها للعميل مافيهاش على كل فوايد ومزايا المنتج إلي العميل هيبقى عايزها وهتخليه يروح يشتري المنتج.

- في نفس الوقت لازم تكون الهدية الترويجية فيها مزايا مغرية للعميل ومفيدة ليه، وتساعده إنه يحكم بشكل إيجابي على المنتج وجودته.

- كمان مهم قوي إنك تدي الهدايا الترويجية للعملاء المحتملين بس، وإلا هتلاقي نفسك بتهدر فلوس كتير قوي على العينات الترويجية، وما حدش من العملاء بيروح يشتري المنتج، لأنهم مش مهتمين.

حاولنا في البوست ده نعرض طريقة مختلفة في التسويق لأي منتج أو خدمة، ولو حابين تعرفوا أكتر عن الموضوع ده تقدروا ترجعوا لعرض كتاب "100 فكرة تسويقية رائعة مستوحاة من الشركات الرائدة حول العالم- الجزء الثاني" للكاتب جيم بليث، وإلي ترجمناه ولخصناه لعملاء الأكاديمية على موقع إعمل بيزنس.

شارك المقال :