كل الأسر المصرية بلا إستثناء إتفرجت علي المسلسل المصري الشهير "لن أعيش في حلباب أبى'' كتير من اللي بيتفرجوا كانو بيعتبروه مسلسل عادي لكن كل المهتمين بالبيزنس قدروا يشوفوا فيه قصة نجاح ملهمة لعبدالغفور البرعي وده اللى هنتلكم عنه النهاردة..

أكتر كلمة بنسمعها دلوقتى من الشباب هى "مش عارف أبدأ إزاى" أو معنديش الإمكانيات اللى تخليني أبدأ لكن قصة عبد الغفور البرعى في عالم البيزنس من القصص الملهمة اللى ممكن تساعد أى حد فى انه يلاقى مستقبله.

عبد الغفور البرعى بدأ رحلة نجاحه فى البيزنس من الصفر من غير أى مساعدات تذكر ده غير إنه واجه مشاكل تانية زى حرمانه من التعليم.

ليه عبد الغفور البرعى رائد أعمال بالفطرة؟

1- بمجرد وصول عبدالغفور للقاهرة راح للمعلم سردينة علشان يشوف إمكانية إنه يبدأ الشغل، وبعد بداية شغله كان دايماَ بيفقكر في قيمة كل حاجة بيستخدمها وده كنا بنشوفه في أحساسه بقيمة أى حاجة حتى الخردة.

2- عبدالغفوركان قدامه هدف واضح وهو انه يكون صاحب بيزنس خاص بيه لكن اللى كان بيمنعه هو عدم وجود الفلوس اللى هتخليه يعمل ده.

3- عبدالغفور اتعلم كل حاجة بشكل كامل وكان دايماَ بيهتم إنه يسأل عن كل حاجة بتحصل في الوكالة علشان يبقى فاهم كل حاجة في المجال اللى قرر يكمل فيه.

4- بمجرد ما كمل مبلغ من وجهة نظره مناسب لإنه يبدأ شغله الخاص ما استناش، بدأ ياخد خطوة ناحية بداية مشروعه وطلب من المعلم سردينة المساعدة في انه يشتري من الخردة ويسدد علي مراحل لانه لسه في البداية.

5- ما إستسلمش لنظرة التجار ليه بإنه كان مجرد صبى عند المعلم سردينة وأجبرهم يحترموه ويعملوا حسابه لإن مشروعه بيكبر مهما واجه مشاكل.

6- بعد نجاحه في الوكاله ما وقفش تجارته أو مشروعه علي كده قرر يفتح مصنع ويشغل فلوسه في حاجات أكبر.

7- كان عنده الجراءة انه يجرب حاجات جديدة حتى لو غيره اتريق عليه زى مثلا قراره بإنه يشتري طيارة.

كل النقط اللى فوق دى أهلت عبدالغفور البرعى انه يكون شخص ناجح وصاحب بيزنس مميز رغم عدم وجود إمكانيات فى البادية ورغم انه واجه صعوبات لكن دايماَ كان عنده رغبة الإستمرار وده اللى خلى مشروعاته تنجح و خليته بلغتنا حاليا Entrepreneur..