920033973
16342
article

علاقات اجتماعية ناجحة في العمل؟

May 20, 2019    

عمرك فكرت قبل كده أنت بتقضي قد إيه من عمرك في الشغل، يعني مثلا لو جينا نحسب في المتوسط 8 ساعات في اليوم على 7 أيام في الأسبوع على مدار 30 سنه هيطلع قد إيه ؟!

بصرف النظر عن الرقم يعني، المقصود هنا إن الحسبة دي بتدينا مؤشرات عن الوقت اللي بنقضيه في الشغل، يعني باختصار الوقت ده هو جزء من عمرنا، فلازم نكون مبسوطين فيه مش بنقضيه كده تأدية واجب واحنا مُجبرين عليه، وطالما وقتك في الشغل ده محسوب عليك من عمرك فلازم تكون مبسوط فيه، مكسيم جورجي بيقول " عندما يكون العمل متعة تكون الحياة مبهجة، أما إذا كان واجبًا تكون الحياة عبودية"!

وأنك تكون مبسوط في شغلك دي بتتوقف على حاجات كتير، من أهم الحاجات دي إنك تكون علاقات اجتماعية ناجحة، لأن ده بيخلي مكان الشغل ممتع، ومبتكنش متكدر وأنت موجود فيه، ده غير إن ده بيساعدك في شغلك، وبيخليك تعدي المشاكل والصعوبات اللي ممكن تواجهك، ولو كنت موظف في شركة مثلا وعرفت تكون علاقات ناجحة مع زمايلك فده معناه إنهم هيكونوا مستعدين يساعدوك في شغلك، وعشان تنجح في كده اتبع الخطوات دي:

 

• قدم المساعدة: 
على قد ما تقدر ساعد زمايلك، ده هيخليهم ينجذبوا ليك، "جرير بريور" رئيس قسم المواهب في مؤسسة "Work day" اللي بتعمل أبحاث عن علاقات الموظفين داخل الشركة بيقول إنه من الأفضل إننا نعلم الموظفين ازاي يجذبوا زمايلهم لأفكارهم، وده ممكن يحصل عن طريق التفاعل معاهم ومساعدتهم، وبالتالي الموظف اللي هيقدر يعمل ده هو اللي هيقدر يخلي الناس تنجذب ليه، وهيكون عنده علاققات ناجحة.

 

• ابدأ بالمجاملة:
والمجاملة هنا مش بالمعني الدارج بتاعها، دي حاجة كده في الإتيكيت معناها "حسن المعاملة" يعني بالبلدي كده ابتسم في وش زمايلك، ولو مريت عليهم مينفعش متسلمش، ولما تتكلم مع زميل ليك بص في عينيه عشان ده بيظهر الاحترام، ولما تنادي عليه نادي باسمه وهكذا.
" لين تايلور" الخبيرة في أماكن العمل بتقول إن عدم النظر في عين الشخص اللي بتكلمه ده مؤشر على عدم الاحترام.

 

• ابدأ اتعرف على زمايلك:
خد المبادرة واتعرف على زمايلك بس متبقاش متطفل! وحاول تخلي التعارف ده في الوقت المناسب يعني مثلا مينفعش يكون زمايلك بيتكلموا في موضوع ما وتدخل في النقاش وانت لسه متعرفهمش، وده محتاج سينس.

 

• استغل الأنشطة والأحداث: 
زي الرحلات اللي بتعملها الشركة للموظفين أو الحفلات وغيرها، ده هيساعد تقرب من زمايلك وتقدر تخلق حالة من الود وتكون علاقات ناجحة.

 

• شاركهم في الأكل: 
لو كنت بتقعد تفطر لوحدك في الشغل حاول تفطر مع زمايلك وتتشاركوا في الأكلات، ده هيختصر عليك وقت كبير جدا وهيقربك منهم بسرعة، وهتقدر تطور علاقتك بيهم بسهولة.

 

• اعزمهم على خروجات: 
لو فيه أحداث معينة بتحب تحضرها زي ماتش كورة أو مسرحية أو سينما ولقيت زميل ليك مهتم ممكن تعزمه عليها، ومن هنا هتبدأ تطور علاقتك بزمايلك في إطار الاهتمامات المشتركة ما بينكم.

 

• فاجأهم بحاجات حلوة:
ممكن زميلك يكلمك فيوم عن حاجة بيحبها فاتفاجئة بأنك تجبهالك لو كان ده في المتناول بالنسبالك، وده هيخلي فيه نوع من الاحترام المتبادل والود مابينكم.

 

• ضيف زمايلك على الفيس بوك:
طبعًا لازم ده يتم بالطريقة مناسبة، يعني متروحش أول يوم وتضيف الشركة كلها عندك، ده مش مقبول وهيتفهم غلط، أبدأ بالتدريج ضيف زمايلك.
وعموما مواقع التواصل الاجتماعي بتنقل الخصوصية ما بينكم لمراحل تانيه، وبتقدر تشوف اهتمامات زمايلك وتشاركهم اهتماماتك، وبالتالي ده هيزيد التواصل وهيقربكم من بعض أكتر.

بعد الخطوات دي كلها لو لاحظت إن مفيش نتيجية ومقدرش تطور علاقتك الاجتماعية بزمايلك حاول تراجع نفسك مره تانيه، وتتأكد إنك حاولت، وكمان خليك حريص إنك متفرضش نفسك على زميل ليك؛ لأن ده هيجي بنتايج عكسية، وعمومًا مفيش آلية مضمونة عشان تبني علاقات ناجحة مع زمايلك؛ لأن بعض بيئات العمل مبتساعدش على ده.


مقالات مشابهة

المزيد
ادخر بذكاء: تعرف على أفضل طرق استثمار المدخرات الشخصية 
ادخر بذكاء: تعرف على أفضل طرق استثمار المدخرات الشخصية 

لم يعد الراتب الشخصي كافيًا ليغطي تكاليف المعيشة، ومع

تعلم مهارات فن الالقاء امام الجمهور
تعلم مهارات فن الالقاء امام الجمهور

إزاي تتغلب على رهبة إلقاء خطاب أمام جمهور كبير؟ لو

من الانبوكس.. لو إنت عاطل مش هنقدر نشغلك عندنا
من الانبوكس.. لو إنت عاطل مش هنقدر نشغلك عندنا

رسالة من الإنبوكس:  أنا مديرة الموارد البشرية في

الأكثر قراءة

المزيد
كيف تصطاد الموظف العصفورة
كيف تصطاد الموظف العصفورة

الموظف العصفورة هو نوع من الموظفين تكاد أي بيئة عمل لا

ادخر بذكاء: تعرف على أفضل طرق استثمار المدخرات الشخصية 
ادخر بذكاء: تعرف على أفضل طرق استثمار المدخرات الشخصية 

لم يعد الراتب الشخصي كافيًا ليغطي تكاليف المعيشة، ومع

دليلك المختصر للوظائف والدورات المطلوبة في سوق العمل 2023
دليلك المختصر للوظائف والدورات المطلوبة في سوق العمل 2023

يمر سوق العمل بالعديد من التقلبات المزلزلة، فبين ليلة

المنافسة الشرسة لما تكون شريفة
المنافسة الشرسة لما تكون شريفة

بمناسبة المنافسة الشرسة لما تكون شريفة .... فى سنة 2007

لماذا يستقيل أفضل الموظفين؟ 
لماذا يستقيل أفضل الموظفين؟ 

شركات كتير بتواجه نفس المشكلة وبشكل متكرر، وهي إن

إزاي تتعامل مع مديرك البطيخه!
إزاي تتعامل مع مديرك البطيخه!

إزاي تتعامل مع مديرك البطيخه! جربت تتعامل مع مدير

اللي بيدير الفلوس اهم من الفلوس
اللي بيدير الفلوس اهم من الفلوس

يوم السبت اللى فات اللى هو أجازة طبعاً كنت عايز أشترى

لا تعطنى سمكة ولكن علمنى الصيد
لا تعطنى سمكة ولكن علمنى الصيد

فاكرين المثل اللى بيقول لا تعطنى سمكة ولكن علمنى

أبل ورؤية ستيف جوبز
أبل ورؤية ستيف جوبز

بمناسبة نزول ال I Phone 6 افتكرت تصريح كان قاله ستيف جوبز