للأسف تجربة إنك تترفد أو تتسرح من شغلك بتبقى تجربة سلبية وقاسية ممكن تسببلك أزمة كبيرة خصوصا لو حصلت بشكل مفاجئ ومكنتش محضر نفسك ليها، لأن في أوقات بيبقى واضح زي الشمس إنهم خلاص هيمشوك من الشغل فتلاقي مديرك مثلا عمال يتلكك على كل حاجة بتعملها، وأوقات تانية بتلاقي نفسك بره الشركة فجأة وبدون مقدمات.

وعشان متمرش بالتجربة دي بيبقى من المهم جدا إنك تعرف العلامات اللي ممكن تفهمك إنك قربت تترفد من شغلك، لأن معرفتك دي ممكن تساعدك في إنقاذ ما يمكن إنقاذه زي إنك تشتغل أكتر وتبتدي تاخد بالك من النتائج والأرباح اللي بتحققها، بس السؤال دلوقتي إيه هي العلامات اللي تعرفك إنك قربت تترفد من شغلك؟

في البوست ده هنقولك على بعض العلامات اللي لو لقتيها اعرف إنك خلاص في خطر وقربت تترفد من شغلك ومنها:

• تتقيم بشكل سلبي لمرة أو أكتر: إنك تحصل على تقييم أداء سلبي ده مش معناه إنك خلاص هتترفد، بس لو التقييم السلبي ده جه بالتزامن مع تقييمات تانية سلبية فاعرف هنا إنك واقع في مشكلة، ولو تقييمك كان سلبي عشان عندك نقص خبرة أو محتاج تدريب أكتر فده معناه إن في فرصة للإصلاح، أما لو لقيت عبارات زي " انت مش مناسب لثقافة الشركة" أو " شخصيتك وأسلوبك مش متوافق مع فريق العمل" اعرف إنك قربت تمشي من شغلك.

• مديرك حاطط عينه عليك: لو فجأة وعلى غير المعتاد لقيت مديرك بيطلب منك تقارير عن ازاي بتقضي ساعات العمل بتاعتك أو طلب منك ملفات العملاء بتوعك والعروض اللي كنت قدمتهالهم قبل كده، فده ممكن يبقى مؤشر ليك على إنك خاضع للمراجعة المكثفة، مع العلم إن التركيز الزيادة معاك ده ممكن يبقى شيء إيجابي برده زي إنه هيحصلك ترقية أو هتاخد علاوة.

• شغلك بيتوزع على زمايلك: لو فجأة لقيت إن المهام بتاعتك عمالة تقل وشغلك بيتوزع واحدة واحدة على زمايلك بدون أي سبب واضح وعقلاني، فغالبا مديرك مش هيكون بيعمل كده عشان متعاطف مع ضغط الشغل اللي عندك، لأنه ببساطة مش هيضغط موظف أو أكتر بمهام تانية فوق شغلهم عشان يريحك، والسبب الحقيقي ساعتها بيكون إن الشركة بتخطط لمرحلة ما بعد رفدك، هما مش عايزين شغلك يفضل واقف لغاية ما يجيبوا حد غيرك.

• مش حاسس بضغط سواء أديت حلو أو وحش: لو عادة مديرك بيكون من النوع اللي دايما تلاقيه واقف فوق راسك وفجأة مبقاش مهتم بجودة أو كمية الشغل اللي بتعمله، فده ممكن يكون معناه إنك قربت تقع، وبالرغم من إن الخطوة دي ممكن تحصل في حالة لو مديرك بقي واثق في جودة الشغل وشايف إنك تقدر تتحمل المسئولية من غير ضغط منه إلا إنه هيعمل الخطوة دي بعد مناقشتك، إنما لو ده بقي حاصل فجأة اعرف إنك في خطر.

• يتم إقصاءك من الشغل: لو فجأة مبقاش متاح ليك إنك تطلع على معلومات وبيانات مهمة بتساعدك على إنك تؤدي شغلك بشكل جيد، وكمان مبيتمش دعوتك للاجتماعات المهمة ومبيتمش ذكرك في الايميلات الرئيسية، طبعا الحاجات دي ممكن يكون في أسباب كتير وراها، لكن بالتأكيد واحدة من الأسباب دي إن مديرك مبقاش يثق فيك ولا في قدراتك وبالتالي ممكن يكون بيعمل كده عشان يخلي موقفك ضعيف وقت ما ياخد القرار برفدك.

• إنك ترتكب خطأ فادح: أو حتى مجموعة أخطاء صغيرة، في الاخر الشركات مش بتحسبها بكم الأخطاء على أد ما بتحسب الخطأ ده بيساوي فلوس وخساير اد ايه، ومهما كانت علاقتك ممتازة مع زملايك أو مديرك، في النهاية الشركة مش هتسمح بوجود أداء ضعيف ممكن يؤثر على أرباحها.

• كل معاملات مديرك معاك بقت كتابية: لما تلاقي إن معاملة مديرك اتغيرت ومبقاش معترف بأي نتائج بتحققها حتى لو مبهرة وابتدى فجأة يوثق كل همسة بتحصل بينك وبينه بشكل كتابي، فاعرف إنه في الحالة دي بيجهز الملف بتاعك للHR، وبننصحك لو الموقف ده حاصل معاك دلوقتي أتأكد إن كل رسايلك وتقاريرك بتظهر الاحترافية اللي انت بتتمتع بيها.

• زمايلك بيعاملوك بشكل مختلف: ساعات زملايك بيكونوا هما المؤشر الأول على إن في موقف هيتاخد ناحيتك، هما أكيد مش هيعرفوا إن هيتم رفدك قبلك انت شخصيا، بس غالبا ردود أفعالهم هتكون بتمثل ردود أفعال بقية الشركة على شغلك، فلو حسيت إنهم مبيحاولوش ياخدوا منك المشورة وبيتجنبوك، ده ممكن يكون معناه إنهم مش بيثقوا في نصيحتك أو مش مقتنعين بكفاءة وجودة شغلك.

• امتيازاتك ابتدت تختفي: الامتيازات اللي الشغل بيقدمهالك حاجة مهمة جدا، فلو حسيت إنها ابتدت تختفي وتنقص وبقي عالفاضي والمليان يتخصم منك أو بيطلب إنك تاخد إجازة، كل دي ممكن تكون مؤشرات سلبية ليك إنك وقتك في الشركة ابتدى يخلص.

الرفد من الشغل أكيد تجربة سلبية ولكن مرحلة ما قبل الرفد هي الأسوأ، وأفضل حاجة ممكن تعملها في الحالة دي هو إنك تكون مستعد، وبدل ما تقعد تبكي على اللبن المسكوب، لازم تسأل نفسك كويس إيه للي خلى كل ده يحصل أصلا وإيه اللي كان ممكن تعمله بشكل مختلف عشان متكونش دي النهاية.