زي ما شركة "جوجل" قدرت تغير حياتنا تمامًا من خلال التقنيات المتميزة اللي بتقدمها لينا، هنلاقي كمان إن تأثيرها الإيجابي بدأ يكبر لأن نجاحها في إدارة فرق عملها بفاعلية خلاها تبدأ تتحول لنموذج ومنهج في الإدارة ممكن الشركات التانية يستعينوا بيه ويطبقوه علشان الموظفين يحسوا بالرضا الوظيفي ويأدوا عملهم بأفضل طريقة ممكنة.

ونقدر نقول إن من بين أسباب نجاح "جوجل" في مجال الإدارة هو اهتمامها بالمديرين وبمعرفة الحاجات اللي بتقف وراء نجاحهم بشكل عملي من خلال الدراسة والتجربة، فهنلاقي إنهم توصلوا إن في عشر سلوكيات لما بيعملهم المدير بيقدر يطلع أحسن إمكانيات ومهارات موجودة في الموظفين اللي عنده، وفقًا لـ"جوجل" السلوكيات دي هي:

- يجيد تدريب فريق عمله

معظم الموظفين بيحتاجوا وبيقدروا قوي المدير اللي بياخد وقته معاهم علشان يقدر يدربهم ويتحداهم علشان يطلع أحسن حاجة عندهم طول الوقت مش بس لما مستواهم يقل، علشان كده بنقول إنه من الأخطاء الشائعة اللي بيعملها المديرين هو إنهم يسيبوا الموظفين يقوموا بشغلهم من غير ما يدوهم أي ردود أفعال أو توجيه لأن ده في النهاية بيضر تطورهم الوظيفي.

- لا يطبق الإدارة التفصيلية

الإدارة التفصيلية واهتمام المدير بشكل مفرط بالتفاصيل والسيطرة على الموظفين يعتبر من الغلطات اللي بيعملها مديرين كتير واللي بتسبب إحباط للموظفين، وعلى العكس هنلاقي إن أفضل مديرين هما اللي بيثقوا في فرق عملهم وفي التقارير المباشرة المقدمة منهم، وبيعرفوا إمتى يقدموا للموظفين النصائح اللي هما محتاجينها وإمتى يدوهم الحرية في التصرف، ده غير كمان إنهم بيدافعوا عن فريق عملهم في الأزمات.

- يطبق بنود السلامة النفسية

مش كافي أبدًا إن أي شركة تمتلك فريق عمل متنوع، وقادة ومديرين جيدين بيسعوا لخلق بيئة عمل تهتم بتحقيق النجاح والرفاهية، لأنه مهم كمان إنها تطبق بنود السلامة النفسية لأن الأفراد لما بيكونوا موجودين في فرق بتتمتع بأمان نفسي عالي بيكون عندهم رغبة أقل في مغادرة الشركة، وبيقدروا يستمدوا القوة من فريقهم ويحققوا عائدات أكبر، ده غير كمان إنه بيخلي فرق العمل أكثر فاعلية بمقدار الضعف.

- يهتم بالإنتاج وتقييم النتائج

الموظفين عادة مش بيحيوا يشتغلوا مع مدير كسلان، وبيفضلوا يكونوا جزء من فريق عمل ناجح ودي حاجة بتحتاج قائد بيهتم بالإنتاج والحصول على نتائج جيدة، ولازم يكون هو نموذج يحتذى بيه في الجزئية دي لأن الموظفين في الغالب مش بيبذلوا كل جهدهم في الشغل إلا إذا شافوا مديرهم حريص على ده وبيعمله كمان.

- يجيد الاستماع ومشاركة المعلومات

بيعتبر التواصل الفعال مهارة أساسية لازم تكون موجودة عند المدير الناجح لكن لازم نفهم كويس إن القادة العظماء بيدوا الأولوية دائمًا للاستماع، لأن كل ما كان المدير بيسمع فريق عمله باهتمام وتركيز كل ما كان قادر إنه يشعرهم بتقديره الشخصي ليهم والتزامه ناحيتهم.

- يدعم التطوير الوظيفي ويناقش الأداء

المدير الناجح بيكون عارف إنه مش مطلوب منه بس إنه يدعم فريقه علشان يطوروا مهاراتهم ويقدروا يتقدموا في حياتهم المهنية، لكن كمان هما لازم يحطوا توقعات واضحة للموظفين ويطلبوا منهم الوفاء بيها، وده علشان يقدروا يحاسبوهم ويقدموا ليهم الدعم اللي هما بيحتاجوه في أسرع وقت ممكن.

- يمتلك رؤية واستراتيجية واضحة لفريق عمله

مهم جدًا إن المدير يكون بيمتلك رؤية وخطط واضحة علشان يقدر ينجز مهامه بشكل صحيح لأن ده هيساعد أعضاء فريقه على إنهم يشتغلوا مع بعض بشكل جيد لأنهم بينطلقوا من نفس النقطة وعندهم أهداف واحدة، وعلشان يقدر المدير يحقق ده لازم يدمج رؤية وخطة الفريق مع الأهداف والاستراتيجية الكبيرة للمؤسسة.

- قادر على إدارة من هم أكثر منه خبرة

معظم الشركات ومن بينها "جوجل" بيبقى عندهم تصور إن الشخص الجدير بمنصب المدير لازم يكون أكثرهم خبرة في المجال التقني، لكن "جوجل" بالملاحظة والتجربة وجدوا إن الجزئية دي مش بالأهمية اللي هما فاكرينها وإنه الأهم إن الشخص يكون عنده مقومات ومهارات تسمح له بإدارة فريق العمل وإنه مع الوقت يقدر يطور مهاراته التقنية ويتعلم منهم كمان.

- يتعاون بشكل فعال مع الإدارات الأخرى

سواء كان المدير موجود على قمة شركة كبيرة أو إدارة صغيرة هنلاقي إن نجاحه بيعتمد بشكل أو بأخر على قدرته على التعاون والعمل مع المؤسسات أو الإدارات التانية، وعلشان يقدر يحقق ده بشكل سليم لازم يكون فاهم كويس قوي الدور اللي الشركة أو القسم بتاعه بيقوم بيه علشان يقدر يعرضه على الطرف التاني ويوضح لهم إزاي التعاون ده هيكون مثمر ومؤثر بشكل إيجابي عليهم هما الاثنين.

- قادر على صناعة القرار

صحيح المدير الناجح لازم يسمع من فريقه ويشارك معاهم المعلومات والمهارات اللي عنده، لكن ده كله ما يمنعش إنه يكون قادر على اتخاذ القرارت المختلفة وإخبار أعضاء فريق عمله بيها والأسباب اللي دفعته لاتخاذها وده كله علشان يفهمهم السياقات المختلفة للشغل والأولويات اللي على أساسها بتتاخد القرارات، ودي حاجة بتحسن عملية صنع القرار في المستقبل لأنها بتخلي الموظفين على اطلاع دائم بشئون الإدارة.