كنت قاعد مع مجموعة من رجال الاعمال المصريين وحد فيهم سألني ليه معندناش بنزينات مصرية أو براند مصري في البنزين غير مجموعة بنزينات مصر أو التعاون فقط وليه مش متاح دخول سوق البيزنس الخاص بالبنزين؟!

رديت عليه وقولتله لان الشركات دي بتمتلك المادة الخام واحتكرتها فبالتالي مينفعش اي حد يقدر ينافسهم حتى لو بتمتلك ارض بموقع متميز مش هينفع تقرر انك تفتح بنزينة من غير ما تملك حقول بترول وطبعاً دة ملوش علاقة ان الشركات دي مش مصرية الفكرة كلها انها بتمتلك المادة الخام سواء في مصر أو خارج مصر..

سهل انك تلاقي مكان مميز عشان تفتح محطة بنزين في اي مكان لكن صعب انك تشتري المادة الخام للبنزين من الشركات اللي بتعمل عملية إنتاج وتكرير البنزين واللي بكل تأكيد هيكون سعر الشراء ليك عالي بالنسبة ليهم لان الشركات بتنتج لنفسها والتكلفة هتكون مش كبيرة زي ماهتشتري منهم وبكدة مش هتقدر تخلق منافسة معاهم بأي شكل!

الراجل فعلا بدأ يقتنع بكلامي وقالي معنى كدة ان موضوع المادة الخام هيمشي على اي شركة عايز افتحها؟

فرديت عليه وقولتله بكل تأكيد.

فرد عليّا شخص تاني وقال انا عايز افتح محل لمنتجات القهوة والبن ومشتقاتهم بس مفيش مادة خام في مصر ومعظم الناس بتستورد وانا معنديش دماغ اني استورد! إيه الحل من وجهة نظرك؟!!

قولتله اللي هيمشي على المادة الخام للبترول هيمشي على اي مادة خام بمعنى إنك مش هتقدر تنجح وتنافسهم غير لما تستورد المادة الخام لان تكلفة شراء المادة الخام منهم هتكون اعلى من استيراده بكل تأكيد وكدة سعرك هيكون اعلى في السوق من سعرهم.. فحاول دايماً انك تفكر في العميل وإنك تقدمله منتج ممتاز بنفس اسعار السوق..

جميل جداً انك تعمل مشروع بس حاول تفكر الاول قبل ماتبدأ في اي حاجة ممكن توقفلك مشروعك أو تبعد العميل عنك سواء كانت المادة الخام أو اي عائق تاني من عوائق البيزنس وتحاول تتغلب عليه بأي طريقة وإلا هتضطر إنك تعيد نظرك في فكرة المشروع..