فلاوله.. اتجِ الله.. نشم النمل.. قلبى ع الفستان يا ريتان.. إيش هالطعامة يا ريتان

الكلمات دى هى أكتر كلمات منتشرة علي السوشيال ميديا حالياَ وكل الإنتشار ده طبيعي ومفيش أى نوع من أنواع الإعلانات، طيب الحكاية بدأت منين؟

"أشرف الجبرى" مواطن سعودى قرر ينشر يومياته الكوميدية مع أولاده من خلال السوشيال ميديا ولما إتسأل عن السبب قال انه حابب إن ثقافة التعامل المرح مع أولاده تنتشر بين كل الأباء والإبناء، وبعد 4 شهور بالظبط بقى أشهر ترند علي السوشيال ميديا ببلاش.

إزاى عيلة ملسوعة جداَ بقت ترند فى 4 شهور؟

1- طبيعة المحتوى

أكتر محتوى سهل الإنتشار هو المحتوى الكوميدى أو المحتوى اللى بيلمس جوانب إنسانية فى حياتنا اليومية وده اللى نجحت فيه عائلة ملسوعة جداَ من خلال فيديوهات قصيرة ذات طبيعة مرحة جداَ.

2- المحتوى المتجدد

لو تابعتنا حسابات "عيلة ملسوعة جداَ" هنلاقى إن المحتوى بتاعها متجدد بصفة مستمرة، يعنى مش هنلاقي يوم بيعدى من غير فيديو جديد ليهم.

3- التفاعل المستمر

عيلة ملسوعة جداَ مش بتعتمد بس علي الفيديوهات المسجلة لكن كمان بيطلعوا Live من خلال إنستجرام و بيهتم الأب انه يتابع التعليقات ويرد عليها والتفاعل ده بيخلي الجمهور مهتم أكتر.

4- الطابع القصصى

دايما الناس بتفتكر القصص و بيفتكروها دايماَ وده طابع أغلب الفيديوهات اللي بتقدمها عيلة ملسوعة جداَ والدليل إن كلنا عرفنا في فترة قصيرة إن ريتان دايماَ بتنسى الشنطة والزمزمية وأحيانا الكرافتة.

كل اللى فات ده كان مجموعة من الأسباب اللى خلت "عيلة ملسوعة جداَ" ترند لمدة 4 شهور متواصلة وفى إعتقادنا ان الترند ده هيستمر بسبب طبيعة محتواها.

من وجهة نظرنا دى الأسباب اللى خلت "عيلة ملسوعة جداَ" ترند قوى.. دلوقتى دوركم تقولولنا هل الترند ده هيستمر ولا لا؟