البلوك مش موجود بس على السوشيال ميديا، ساعات بتحس إن مخك معموله بلوك ومش لاقي أي أفكار جديدة، وبتبقى مش بتبقى عارف تعمل إيه ولا تجيب أفكار منين، وهنا بيجي دور "العصف الذهني" عشان يكون المنقذ اللي هيفك البلوك ده عن مخك.

العصف الذهني واحد من أكتر الحلول الفعالة اللي بقت تستخدمها الشركات عشان تواجه بيها مشكلة قلة الأفكار المبدعة أو عدم وجودها أصلا، وده من خلال تجميع الأفكار والمعلومات اللي جاية من كذا شخص ومناقشتها، ومنها ممكن تطلع في الآخر حلول أو أفكار جديدة، بس العصف الذهني مش مجرد إنك تحط مجموعة من الناس في غرفة وتطلب منهم يطلعوا أفكار، وعشان كده في نصايح لازم تاخد بالك منها لو حبيت تعمل جلسة عصف ذهني مع الموظفين بتوعك:

- أولا لازم يكون في قواعد محطوطة تنظم بيها الجلسة، زي تحديد وقت الجلسة ومين المسئول عن إدارتها.. إلخ.

- كمان لازم يتم توضيح إيه هي المشكلة الأساسية والصعوبات المرتبطة بيها.

- من المفيد في العصف الذهني كمان إنك توصل لأكبر عدد ممكن من الأفكار بغض النظر عن مدى جودتها، فحاول تركز على الكم مش الكيف.

- وأهم حاجة إن كل شخص مشارك في الجلسة يتاح ليه الفرصة في أنه يعرض أفكاره، وياخد وقت مع نفسه يجمع فيه أفكاره قبل وأثناء الجلسة.

وكانت شركة "تويوتا" من أول الشركات إلي استخدمت العصف الذهني، بعد ما حاولت من غير أي نتيجة إنها تزود مبيعاتها في طوكيو بنسبة 5%.

وده خلاها تفكر تعمل مجموعة للعصف الذهني من جميع الأقسام فيها، وفي النهاية جه الحل من مهندس صيانة اقترح فكرة إن الشركة تعمل جراجات مجانية لأي حد عنده سيارة تويوتا، وبالفعل نجحت الفكرة دي، وكل اللي عنده عربية غير تويوتا بقي يبعيها ويشتري تويوتا عشان يستمتع بميزة الجراج المجاني، والحقيقة إن المهندس ده صوته مكنش هيتسمع لولا جلسة العصف الذهني اللي كونتها الشركة.

وعشان توصل لجلسة عصف ذهني تخرج منها بأفكار مبدعة وحلول فعالة، فيه طرق كتير ممكن تساعدك تعمل كده، واحنا النهاردة هانقولك على شوية طرق منها زي مثلا:

• كتابة الأفكار من غير ما يتعرف مين صاحبها: في الطريقة دي كل واحد مشارك في الجلسة هيكتب مجموعة من أفضل الأفكار اللي وصل ليها على ورقة صغيرة، وبعد كده هيتم توزيع الأفكار دي بشكل عشوائي على الفريق المشارك من غير ما يتعرف مين صاحب الفكرة اللي هيتم مناقشتها وبما إن محدش عارف مين صاحب الفكرة، فكل الأفكارة هيتم التعامل معاها بمساواة.

الهدف من الطريقة دي هي إنك تشجع كل الأشخاص على إنهم يشاركوا الأفكار بتاعتهم من غير ما يحسوا إن حد بينتقدهم أو بيحكم عليهم.

• البحث عن الأفكار السيئة: والطريقة دي في كتير من شركات التسويق والعلاقات العامة بيستخدموها في جلسات العصف الذهني بتاعتهم، وده لأن المجال بتاعهم بيكون محتاج أفكار مبدعة وحلول بشكل دوري، فبيطلبوا من الأشخاص المشاركين في جلسات العصف الذهني بتاعتهم إنهم يركزوا على أسوأ الأفكار اللي في دماغهم بدل من مايحاولوا يجيبوا أفضل فكرة.

الطريقة دي بتكون فعالة لأن أحيانا أسوأ الأفكار ممكن تعرفك على مشكلات كانت خافية عنك مش واضحة ليك، وبتكون حلولها سهلة، ده غير إنك لو حاولت تقلب الفكرة السيئة دي في دماغك ممكن توصل لحل أفضل من كل اللي كنت بتفكر فيه.

• طريقة زهرة اللوتس: زهرة اللوتس زي مانتو عارفين شكلها عبارة عن قلب محاط بأوراق ألوانها جميلة وكل ما بتقطف ورقة منهم هتلاقي غيرها، وهو ده بالظبط الطريقة اللي هتمشي عليها عشان توصل لأفضل فكرة، فمن خلال الطريقة دي هتكتب الفكرة الرئيسية وتحطها في دايرة في النص، وكل ما تلاقي فكرة فرعية هتحطها حوالين الفكرة الرئيسية، وهكذا لغاية ما هتلاقي نفسك بتناقش كل فكرة ممكن يبقى ليها علاقة بالموضوع اللي انت عايز توصل لحل ليه.

• طريقة الحواجز: واللي ممكن تستخدمها بإنك تشيل أي حاجز مفترض إنه يكون موجود في المشكلة اللي انت عايز تحلها، زي التكلفة أو الوقت الضيق مثلا. وممكن برضه تستخدم الطيقة ديه بإنك تحط حواجز وعقبات حتى لو مكنتش موجودة، وكل ده الهدف منه في النهاية هو إنك توسع من طريقة تفكير أي شخص مشارك في جلسة العصف الذهني، وبالتالي يوصل لأفكار جديدة.

الطرق اللي ممكن تستخدمها عشان تزود من فاعلية جلسات العصف بين الموظفين كتير ومتنوعة، كل اللي عليك إنك تختار الطريقة الأفضل اللي ممكن تناسب الشركة بتاعتك، والهدف النهائي لجلسة العصف الذهني هي إنك توصل لأفكار مبدعة تودي شركتك أو مشروعك لمكان أفضل، ومن خلال الطرق دي فانت هتساعد فريق عملك على إنه يوصل للهدف ده.