920033973
16342
article

في ريادة الأعمال.. "التشبيك" يحب الخفية

May 15, 2019    

"الرزق يحب الخفية" المثل ده لو طبقناه على حياة أي رائد أعمال هنلاقيه حقيقي جدًا لأننا لما نيجي نتابع قصص رواد الأعمال الناجحين هنلاحظ إن واحدة من الأسباب الأساسية للي هما وصلوا ليه هي إنهم كانوا دائمًا بيدوروا على الأشخاص اللي ممكن يقدموا ليهم المساعدة والدعم وده لأنهم فهموا من البداية إن مفيش حد بينجح لوحده وإنهم لازم يتحركوا ويكّونوا شبكة قوية ومحترفة يحاوطوا نفسهم بيها في عالم البيزنس.

علشان كده "التشبيك" بيعتبر من الأدوات المهمة اللي لازم أصحاب المشروعات الناشئة يستعينوا بيها لأنه بيدعم كل جوانب عملهم سواء في التحالفات التجارية، أو التسويق، أو المبيعات ودي حاجة بتخليهم يقدروا ينموا أعمالهم في فترة زمنية قليلة جدًا.

 

طيب إزاي ممكن رواد الأعمال يستخدموا التشبيك كوسيلة لتنمية أعمالهم؟ وإيه الفوائد اللي هتعود عليهم منها؟
في البداية، لازم نفهم إن التشبيك هو أداة بتسمح لأصحاب المشروعات إنهم يعملوا علاقات اجتماعية ومهنية مع الآخرين بهدف تبادل المنافع بينهم وبين بعض، زي مثلًا إنهم يتبادلوا الأفكار والمعلومات والخبرات، أو يدوروا على شركاء أو فرص تجارية جديدة، وعلشان أي رائد أعمال يقدر يخلق حواليه شبكة فعالة ومؤثرة لازم يعمل الخطوات دي:

 

- ادرس مقومات نجاحك:
النجاح في التشبيك بيكون مرتبط دائمًا بفهمك لنفسك ولمشروعك والقدرات اللي بتميزك عن الآخرين، ودي حاجة هتحتاج منك إنك تقرأ كويس قوي في مجالك وتعرف نقاط القوة اللي بتملكها والمشاكل اللي بتواجهها، لأن ده هيسمح لك إنك تعبر عن مشروعك بذكاء ولباقة مع الأشخاص اللي أنت عايز تبني علاقات معاهم.

 

- ارسم خطة لنفسك:
علشان تنجح في جزئية التشبيك لازم تطرح على نفسك الأسئلة دي: مين اللي هحتاج أتواصل معاه علشان أقدر أنجح بشكل كبير؟، ومين هما المجموعات أو الأفراد أو الشركات اللي ممكن يكونوا مفيدين بشكل كبير لشغلي في المستقبل؟، وإيه هي الحاجات اللي هتساعدني على النمو كرائد أعمال؟، وكمان إزاي ممكن أوصل لكل الحاجات دي؟.. بعد كده اكتب إجاباتك وحدد أولويات أنشطة التشبيك بالنسبة لمشروعك وادمجها في جدول أعمالك والتزم بتنفيذها.

 

- اختار الفاعليات التي ستحضرها بعناية:
"الوقت" بالنسبة لأي رائد أعمال يعتبر أغلى حاجة بيملكها، علشان كده مهم جدًا إنك تخصص جزء من وقتك لحضور الفاعليات المهمة في مجال مشروعك ولازم تختار أهمهم بالنسبالك وتتأكد إن الأشخاص الفاعلين اللي حددتهم هيكونوا موجودين علشان تحقق أقصى استفادة ممكنة من الفعاليات ديه.

 

- اعرض المساعدة أولًا: 
لما تحضر الفاعليات المتعلقة بمجال مشروعك واللي بتعتبر فرصة مهمة جدًا للتشبيك مع ناس هيفيدوك في شغلك، ما تبدأش بعرض مشكلاتك على الأشخاص اللي أنت حددت إنهم مهمين لمجال شغلك، لا بالعكس دور على النقاط المشتركة بينك وبينهم وحاول إنك تقدم قيمة ليهم في الأول لأن الطريقة دي هتفتح لك باب لتبادل النصائح معاهم وبالتالي هيكون سهل إنه يحصل تعاون وارتباط وثيق بينك وبينهم.

 

- حافظ على شبكة علاقاتك:
لازم تاخد بالك وأنت بتكون شبكة علاقاتك إنك هتحتاج تخصص جزء من وقتك لإدارتها علشان تقدر تحافظ عليها وتطورها لصالحك، وده من خلال تنظيم فاعليات ودعوة الأشخاص البارزين في مجال عملك أو استضافتهم في عشاء عمل لأن كل ده هيسمح ليك تعرفهم عن قرب أكتر والتشبيك مع الأشخاص المهمين المحيطين بيهم كمان.

 

- اهتم بتحديث شبكة علاقاتك:
مهم جدًا إنك تهتم بتحديث شبكة علاقاتك وإضافة أشخاص جديدة مؤثرة ليها من وقت للتاني، ودي حاجة بقت سهلة في الفترة الأخيرة لأن مواقع التواصل الاجتماعي وخاصة "فيس بوك" و"لينكد إن" و"تويتر" بقت بتتيح فرصة كبيرة للتعرف على كتير من الشخصيات البارزة في المجالات المختلفة، كمان ممكن تنضم للمجموعات اللي متصلة بمجالك وتشاركهم النقاشات وتكون علاقات كويسة مع الأعضاء المهمين فيها.

 

- ساعد الآخرين على تحقيق النجاح:
من الخطوات المهمة في التشبيك واللي كتير من الناس مش بيخدوا بالهم منها هي مساعدة الآخرين على تحقيق النجاح، لأنه زي ما أنت بتكون منتظر من الآخرين مساعدات هما كمان هيكونوا منتظرين ده منك ولازم تعمله بأفضل شكل ممكن لأن جوهر التشبيك قائم على إثراء علاقاتك وعلاقات الآخرين من خلال تبادل المنافع.

لما هتطبق الخطوات دي في فوائد كتير هتعود عليك وعلى المشروع بتاعك زي إنه هيكون عندك فرص أكبر للشراكات وتوسيع أعمالك وإيجاد حلول للمشكلات اللي بتواجهك، كمان التشبيك هيساعدك على بناء سمعة جيدة لشركتك وهيرفع ثقة الناس فيها وبالتالي هيساهم في توسيع قاعدة عملائك، ده غير كمان إنه هيخليك متابع كل التطورات اللي بتحصل في مجال عملك من خلال التواصل مع الخبراء وصناع القرار.


مقالات مشابهة

المزيد
فشل اكتتاب وي ورك
فشل اكتتاب وي ورك

فشل اكتتاب wework .. بداية انفجار فقاعة اليونيكورن؟

رأفت الهجان والبيزنس
رأفت الهجان والبيزنس

‫عايز أرجع مصر يا نديم بيه!!‬ ‫ ‬ ‫ مسلسل رأفت الهجان

تعمل زي سناب شات ولا تكون زي سوق.كوم؟
تعمل زي سناب شات ولا تكون زي سوق.كوم؟

سنة 2017 أعلنت شركة أمازون إنها استحوذت على شركة سوق.كوم

أفضل عشر شركات فى العالم..
أفضل عشر شركات فى العالم..

زمان كان فى مثل مشهور بيقول سهل انك توصل للقمة بس صعب

الأكثر قراءة

المزيد
مراحل ترقي الـ HR: من HR Coordinator ل HR Director
مراحل ترقي الـ HR: من HR Coordinator ل HR Director

تعتبر وظيفة الـ HR واحدة من الوظائف المطلوبة بقوة في

أفضل 6 أفلام عن البيزنس لرواد الاعمال
أفضل 6 أفلام عن البيزنس لرواد الاعمال

يمكن الهدف الأساسي اللي بيخلينا نشوف فيلم أو مسلسل هو

التعليم في الصغر كالنقش على الحجر
التعليم في الصغر كالنقش على الحجر

 دايماً بنسمع مقولة "التعليم في الصغر كالنقش على

شركات تنافس اوبر وكريم
شركات تنافس اوبر وكريم

بتعتبر شركة اوبر وكريم من الشركات الناجحة فى السوق

"ماكدونالدز" و"برجر كينج".. الصراع على عرش البرجر

في مايو اللي فات، قدمت سلسلة مطاعم "برجر كينج" 5 وجبات

ليه كورسات أكاديمية إعمل بيزنس أون لاين ؟
ليه كورسات أكاديمية إعمل بيزنس أون لاين ؟

    لاحظنا تزايد أسئلة الأعضاء بخصوص إن ليه

اسباب فشل الشركات الناشئة
اسباب فشل الشركات الناشئة

عالم ريادة الأعمال عالم كبير شبيه بالمدرسة أو الجامعة

تطبيقات مهمة للبزنس
تطبيقات مهمة للبزنس

تطبيقات مهمة للبزنس.. على موبايل أي رائد أعمالمن

بطريقة سهلة ... ازاي تكتب إميل احترافي 
بطريقة سهلة ... ازاي تكتب إميل احترافي 

    كتابة إميل بشكل احترافي بتعتبر من الأساسيات