FB Instagram Twitter Youtube Linkedin قصة نجاح ماريسا ماير | أكاديمية اعمل بيزنس
 
الرجوع الى المدونة

قصة نجاح ماريسا ماير

قصة نجاح ماريسا ماير

زي ما إنتم عارفين إن أي شركة مهما كان حجمها كبير أو صغير هي معرضة لمواجهة مشاكل على حسب حجم الشركات دي وده اللي حصل مع شركة ياهو اللي إتأسست سنة 1994 كموقع بيقدم لزائريه خدمة البحث عن المواقع والمعلومات في قاعدة بيانات منظمة ومفهرسة على أسس أبجدية ونوعية وهى خدمة كانت جديدة في الوقت ده .

وفى 2012 اتعرضت شركة ياهو لمشاكل كتير كان أهمهم كيفية دعم نشاطها الإعلاني و عمل إعلانات جديدة وكمان انخفاض حصتها السوقية لصالح العملاقة جوجل بشكل كبير .

فكان لازم ترجع ياهو لوضعها مرة تانية وقامت بتعيين "ماريسا ماير" كمديرة تنفيذية لياهو لمحاولة إنقاذها من الوضع المتأزم ده وعلى فكرة هي كانت مهندسة في جوجل قبل التحاقها بياهو واعتمدت "ماريسا" على 7 استراتيجيات جديدة ساهموا في تحسن وضع ياهو بعد كدة هنشرحهم بالتفصيل :

أول استراتيجية كانت تغيير ال design الخاص بياهو وعلى الرغم إن الفكرة دي كانت مطروحة من سنة 2009 من كل المديرين التنفيذيين اللي سبقوا "ماير" إلا إنهم تباطؤوا في تنفيذ ده وكانت أول حاجة عملتها إنها غيرت شكل الصفحة الرئيسية لياهو واللوجو كمان وبعض الخدمات الخاصة بياهو زى الإيميل وموقع فليكر لرفع الصور وكان من وجهة نظرها إن إعادة تغيير شكل الصفحة الرئيسية بيعبر عن نظرة ياهو للتغيير القادم فى عالم الإنترنت .

تانى استراتيجية إنها حاولت تثبيت مفهوم إن استحدام الناس لياهو بشكل منتظم كل يوم هو عادة عندهم ولأن علم السلوك أثبت إن 40 % من القرارات اليومية اللى الناس بتاخدها فى حياتها هى مش قرارات لكنها فى الحقيقة عادات وهو دة كان هدف ماير إنها تخللى ياهو بكل خدماتها عادة عند الناس من خلال معرفتهم بأخبار الرياضة وأخبار المال والطقس والأخبار اليومية وإرسال وإستقبال الإيميلات وكل ده من خلال إستخدام خدمات ياهو المختلفة .

تالت استراتيجية كانت تعيين أعداد كبيرة من المحررين الموهوبين بالإضافة إلى أفضل مهندسين الإتصالات لأنها أول ما بدأت عملها كان موجود 40 مهندس مختص فقط لكن العدد ده إرتفع إلى 400 ما بين مهندسين متخصصين ومحررين على أعلى مستوى زى ديفيد بوج وده كان شغال فى النيويورك تايمز وكمان كاتى كوريك واللى أصبحت مسئولة عن قسم الأخبار الدولية فى ياهو .

رابع استراتيجية هى تطبيق سياسة الإستحواذ على الشركات الصغيرة والمشاريع الناشئة الناجحة ووصل عدد المشاريع دى والشركات اللى استحوذت عليهم ياهو بعد تولى ماير لمنصب المدير التنفيذى إلى 40 شركة ومشروع من خلال تمويلهم أو الإستحواذ الكامل وطبعاً كان من أشهرهم موقع أو منصة تمبلر Tumbler واللى كانت ب1.1 مليار دولار وده كان أكبر عملية إستحواذ من ياهو يجى بعدها تطبيق على الموبايل إسمه summly وده كان تطبيق إخبارى بيرسل ملخص لأهم الأخبار مرتين فى اليوم لمستخدميه .

ولما سألوا مسئول التوظيف بياهو عن سر استقطاب ياهو لكبار المحررين دول جاوب بإننا بنحاول خلق منصة إخبارية ليها طابع اجتماعي بجانب التركيز على أخبار التكنولوجيا وده لجذب المزيد من المستخدمين لزيارة ياهو والمحاولة دي كانت أهم نقطة لتحقيق الاستراتيجية دى وبالفعل زاد قاعدة مستخدمى ياهو 20 % بعد تولى ماير للمهمة .

خامس استراتيجية وهى التوجه لتطبيقات الموبايل وده كان من الأولويات عند ياهو تحت رئاسة ماير لأن نصف عدد مستخدمي خدمات ياهو ( 400 مليون مستخدم ) بيكونوا عن طريق الموبايل والنسبة دي اتضاعفت بعد أكتوبر 2012 وقالت ماير إننا لو ما قدرناش نطور خدماتنا عشان تتوافق مع مختلف المنصات ومنها الموبايلات وضعنا التنافسي والمالي هيتأثر بالسلب بشكل كبير جدا .

سادس استراتيجية كانت إطلاق منتجات جديدة زى yahoo magazine" " مجلة ياهو و "yahoo tech " و ياهو للتقنية و "yahoo advertising" و ياهو للإعلانات و " the Smart TV app" واللى عن طريقه محتوى ياهو بيتم عرضه على التليفزيون الخاص بالمستخدم وكل المنتجات دى الهدف منها هو تقديم خدمات متخصصة لقطاعات واسعة من مستخدمى ياهو .

آخر استراتيجية وأغربهم كانت تكوين صداقات مع المنافسين !! وده كان في تصريح ليها إن ياهو معندهاش موبايل باسمها ولا نظام تشغيل ولا متصفح ولا موقع للتواصل الاجتماعي فإزاى هنقدر ننافس .. وقالت إن الشراكة مع أقوى منافسين ليك هو أمر ضروري للحاق بهم وده كان عن طريق تعاون ياهو مع جوجل وأبل فى أنظمة التشغيل وشراكة ياهو القوية مع فيس بوك .

ماريسا كانت دايمًا شايفة إن المستخدم هو أهم أولوياتها لو فكرت في أي تطوير أو شيء جديد يصب في صالح الشركة والجزئية دي هي اللي بتميز الشركات الكبيرة كمان ماريسا مشهورة بإنها عدوة للروتين وكانت بتنصح أي رائد أعمال بالمخاطرة من وقت للتانى وإنه يقوم بحاجة جديدة معملهاش قبل كدة وهو متأكد من النجاح فيها .

الدروس اللى ممكن نطلع بيها من الاستراتيجيات دي كتير لكننا نحب نعرف إيه أهم النقط اللي استفدتم بيها عن طريق مشاركتنا لآرائكم من خلال التعليقات .

شارك المقال :