هنتكلم النهاردة عن قصة نجاح لواحد من أكبر مواقع الb2b أو الbusiness to business فى الصين وهو موقع على بابا http://www.alibaba.com/ واللى بتتم عليه صفقات تجارية بين البائعين والمشترين، وبيسهل المعاملات فيما بينهم كوسيط تجارى .

مؤسس الموقع هو ( جاك ما ) وهو مدرس لغة إنجليزية ومعندهوش أى خلفية عن البيزنس أو الكومبيوتر 

أحد العوامل اللى أثرت على نجاحه هو حرصه على تعلم اللغة الإنجليزية عن طريق العمل كمرشد سياحى بدون أجر فى مدينة "هانجشو" على الساحل الشرقي للصين وفضل يعمل كده لمدة 8 سنين وطبعًا كان ليهم أثر كبير فى تشكيل طريقة تفكيره واللى بتقرب من طريقة التفكير الغربية .

لكن من الطرائف فى قصته إنه فشل مرتين فى إمتحان التقديم للجامعة ونجح فى التالتة وبعد تخرجه سنة 1988 من جامعة هانجزهو بشهادة تدريس اللغة الإنجليزية وتم إختياره مع 500 واحد تانيين بعد كده عشان يكون مدرس فى الجامعة .

تعرف فى خلال فترة عمله القصيرة فى أمريكا على مواقع الإنترنت ولفت إنتباهه أكتر هو عدم وجود معلومات عن بلده الصين فقرر إنشاء موقع بتصميمات متواضعة وإنتبه لقوة الإنترنت وتأثيره الكبير فبدأ جاك ما فى الإتجاه لبناء مواقع الإنترنت للشركات الصينية عن طريق الإستعانة ببعض أصدقائه على سرعة إنترنت بطيئة جدًا وبيقول " كنت بدعو أصحابى وأصدقائى وأفراد أسرتى عشان أثبتلهم إن فى حاجة إسمها إنترنت وإنه موجود فعلًا "

البدايات دى دفعته لفكرة إنشاء موقع يكون وسيط بين المصنعين الصينيين وعملاءهم خارج البلاد فعمل إجتماع مع 17 واحد من أصدقائه وقرروا تأسيس موقع على بابا سنة 1999برأس مال 60 ألف دولار .

النوع ده من المواقع كان جديد على البيئة الصينية لكن "جاك ما" نجح فى تقديمه وطبعًا واجه صعوبات تقنية ومالية كبيرة وبلغ مستوى من النجاح إنه من المخطط أن يتم إدراج أسهمه في سوق الأوراق المالية الأمريكية للإتجاه للعالمية وتعزيز مبدأ الشفافية .

هنعرف قصة على بابا وعوامل نجاحه فى الجزء التانى ..