FB Instagram Twitter Youtube Linkedin كيف تتخلص من صداع إدارة الموارد المالية لمشروعك؟ | أكاديمية اعمل بيزنس
 
الرجوع الى المدونة

كيف تتخلص من صداع إدارة الموارد المالية لمشروعك؟

كيف تتخلص من صداع إدارة الموارد المالية لمشروعك؟

التمويل والتخطيط المالي والمحاسبة من أكتر الحاجات اللي بيخاف منها معظم رواد الأعمال لأنهم مش بيعرفوا يعملوها كويس، وفي نفس الوقت مش بيكون معاهم ميزانيات ضخمة علشان يعينوا فريق عمل متخصص في المجالات دي أو يستعينوا بخبراء فيها، ودي حاجة ممكن تتسبب في تأخير ظهور مشروعاتهم للنور أو حتى فشلها.

الوضع ده كان سائد لحد فترة قريبة، ولكن بدأ يتغير بالتدريج والفضل في ده يرجع للتكنولوجيا اللي قدرت تسهل كتير من المهام اللي بيعملها رواد الأعمال من خلال مجموعة من تطبيقات الموبايل بتسمح ليهم بتوفير وقتهم ومجهودهم وإنجاز مهامهم المالية بدقة وبأقل تكلفة.

ولأن دلوقتي بقى في تطبيقات كتير ومتنوعة متخصصة في الجزئية دي بقى في احتمال إن إحنا نتلخبط ونختار تطبيق غير اللي إحنا محتاجينه، علشان كده هنكلمكم عن أنواع التطبيقات المالية اللي ممكن يستفيد منها رواد الأعمال وهنقدملكم نماذج منها، وهي:

تطبيقات تقدم خدمات مصرفية
النوع ده من التطبيقات عادة بيكون تابع للبنك اللي رائد الأعمال بيتعامل معاه، وبيتيح له إنه يدير شؤونه المالية الشخصية والتجارية بنفسه من غير ما يرتبط بمواعيد البنك أو إنه يروح لفرع من فروعه، لأنه بيخليه يتابع كل البيانات المتعلقة بحسابه وبيسمح له كمان بتنفيذ معاملات مختلفة زي تحويل الفلوس أو سداد البطاقات الإئتمانية أو الفواتير من أي مكان وفي أي وقت.

في مصر، عدد من البنوك الخاصة (زي: البنك التجاري الدولي، وبنك قطر الوطني، وكريدي أجريكول، وبنك إسكندرية، وغيرها...) بيتيحوا الخدمة دي لجمهورهم، والبنوك الحكومية (زي: بنك مصر، والبنك الأهلي المصري، وبنك القاهرة) كمان بدأت تطور أدائها وخدماتها علشان تقدر تقدم لعملائها الخدمات المصرفية من خلال تطبيقات المحمول.

تطبيقات تقدم خدمات محاسبية
بيغني النوع ده من التطبيقات رائد الأعمال عن إنه يتتبع الفلوس اللي بتخرج وبتدخل مشروعه الناشئ يدويًا، لأنها بتقدم له خدمات محاسبية كتير زي ضبط الميزانية في كل مرحلة من مراحل المشروع، وإدارة الحسابات المستحقة الدفع والحسابات المدينة، وكمان إدارة المخزون، ومن التطبيقات المفيدة في الجزئية دي هنلاقي:

- تطبيق "Quickbooks":
بيعتبر من أفضل التطبيقات المالية وأبسطها في نفس الوقت لأنه بيخلي الشركات الصغيرة تعرف تنظم نفقاتها، وتتحكم في تدفقاتها النقدية، وبيسمح للقائمين عليها إنهم يحصلوا على تقارير فورية عن الوضع المالي لمؤسساتهم، ده غير كمان إنه بيقدم إدارة محاسبية للضرائب والجرد، وتتبع الفواتير وكشوف المرتبات.
https://quickbooks.intuit.com/global/

- تطبيق"Wave"
بيتميز التطبيق ده بإنه بيقدم برامج مالية مجانية للشركات اللي بيشتغل فيها 9 موظفين أو أقل، وبيتولى البرنامج إنه يقوم بمهام المحاسبة من خلال مساعدة أصحاب المشروعات على تتبع النفقات والمبيعات، وإدارة الفواتير، وقبول المدفوعات، وتتبع حسابات القبض، وإصدار كشوف المرتبات، وإنشاء التقارير المحاسبية.
https://www.waveapps.com/

- تطبيق "InDinero"
لما بتيجي تستخدم التطبيق ده بتدخل كل المعلومات المالية الخاصة بحساباتك البنكية وبطاقاتك الإئتمانية، وهو بالتبعية بيعمل مزامنة وبيوفر لك لمحة شاملة عن المبالغ اللي بتتصرف وتوقيتها والبنود اللي بتصرفها فيها، وبيقدم كمان تحليلات وتنبؤات بخصوص الاتجاهات المالية للمشروع ودي حاجة بتساعد رائد الأعمال على إدارة شئونه المالية ومنع حدوث أزمات بشأنها.
https://www.indinero.com/

- تطبيق "Zoho Books" 
بيهتم التطبيق ده بمساعدة المشروعات الناشئة من خلال إنشاء وإرسال الفواتير، وتتبع النفقات، وعمل التقارير، ومزامنة الحسابات المصرفية، ده غير كمان إنه بيحتوي على أداة للمساعدة في إدارة المخزون من خلال تحديث كمية العناصر وقيمتها لما بتتباع أو تتجدد، وده بيسهل على رائد الأعمال معرفة المخزون اللي عنده بالضبط وممكن كمان يضبط الأداة دي علشان تنبهه لشراء السلع لما يقل المخزون بتاعها للمستوى اللي هو محدده.
https://www.zoho.com/us/books/

- تطبيق "Xero"
من التطبيقات السهلة اللي بتساعد القائمين على الشركات الناشئة على إنهم يتحققوا من صحة التدفقات النقدية الخاصة بمشروعاتهم، ده بالإضافة إلى مشاركة البيانات المالية المهمة مع الجهات اللي هما عايزينها بسرعة وسهولة، ده غير كمان إنه بيقدم خدمات المزامنة مع البنوك وإدارة المخزون.
https://www.xero.com/

وممكن في النهاية نقول لرواد الأعمال إن الاستعانة بالتطبيقات دي هتساعدهم في إدارة مشروعاتهم الناشئة من الناحية المالية بشكل محترف، وفي نفس الوقت هتخليهم يركزوا جهودهم ويتفرغوا بشكل أكبر لتطوير المنتجات أو الخدمات اللي بيقدموها.

 

شارك المقال :