FB Instagram Twitter Youtube Linkedin كيف تدير رئيسك في العمل؟ | أكاديمية اعمل بيزنس
 
الرجوع الى المدونة

كيف تدير رئيسك في العمل؟

كيف تدير رئيسك في العمل؟

بالنسبة لناس كتير ممكن تبقى فكرة "تدير مديرك" أو "تدير رئيسك في العمل"، فكرة مريبة أو غير مقبولة، لأنه من غير المعتاد عندنا إدارة العلاقات في العمل من أسفل الهرم لأعلاه، يعني البديهي عند أغلب الناس إن المدير هو القائد إلي بيدير الفريق، وممكن برضه نلاقي ناس تفهم المصطلح ده بإنك تتملق مديرك، أو بالبلدي كده "تطبله"، بس برضه مش ده المعنى المقصود.

اللي نقصده بإنك "تدير مديرك" إنك تكون واعي لطريقة التعامل الصح مع مديرك عشان توصل لأفضل النتائج في علاقتك بيه، وفي شغلك، وطبعا أفضل النتايج بالنسبة للشركة إلي بتشتغل فيها.

دلوقتي خليني بقى أقولك على آليات لو نفذتها هتقدر إنك "تدير مديرك" بنجاح:

- افهم مديرك: عشان تقدر تدير مديرك لازم تفهمه كويس، يعني تتعرف على أهدافه وتقّدرها، تتفهم كويس كم الضغوط إلي بيتعرضلها في الشغل، ونقاط قوته وضعفه.. إلخ، لازم تتخلى عن فكرة إن مديرك ده شخص كامل، أو منصب مجرد من أي إحساس إنساني زي القلق أو التوتر.

من غير المعلومات ديه مديرك هيبقى زي الكتاب المقفول، وهتلاقي صدامات كتير وسوء تفاهم بيحصل بينكوا كل شوية.

- افهم نفسك: العلاقة بين وبين مديرك فيها طرفين، عشان كده بعد ماتفهم مديرك كويس، لازم تفهم نفسك، تفهم أهدافك واحتياجاتك، ونقط قوتك وضعفك، وإيه إلي بتحاجه عشان تحس بالتحفيز وتجتهد في شغلك أكتر..إلخ.

- حدد طريقة التعامل بينك وبين مديرك: بعد ماتفهم نفسك وتفهم مديرك كويس، هتقدر تحدد الطريقة الأفضل للتعامل بينكوا، وهتعرف تحدد أسلوب التواصل المثالي وتوقيت التواصل الأفضل، عشان توصل لأفضل النتائج في الشغل.

- اعترف بفضل مديرك: ونأكد تاني.. مش بنقول تنافق مديرك أو تمجده على حاجات مش بيعملها، لكن مش عيب أبدا لما مديرك يعلمك مهارات جديدة في الشغل، ويساعدك تطور نفسك، إنك تعترف بده وتشكره.

- عبر عن شكوتك بطريقة إيجابية: ممكن قوي يكون عندك مخاوف أو شكوى وتكون صاحب حق، بس طريقتك في التعبير مش بس تضيع حقك، لأ كمان تخلي العلاقة بينك وبين مديرك متوترة.

يعني مثلا لو نتيجة أي اجتماع في الشركة مش بتوصل ومش بيعرفها كل الموظفين، وبالتالي ناس بتشتغل وتطور شغلها حسب المطلوب وناس تانية لأ.. ممكن قوي تطلب من مديرك اجتماع فردي، وتقترح عليه:

إيه رأيك نوزع توصيات أي اجتماع على كل الموظفين، عشان نرفع إنتاجية القسم كله؟

وده هيبقى أفضل من إنك تشتكي وتتخانق عشان مش بتعرف نتيجة وتوصيات أي اجتماع، لو تبنيت الطريقة الإيجابية في التعبير عن مطالبك، هتفرق كتير قوي في علاقتك بمديرك.

- وضح أي سوء تفاهم أول بأول: لو مديرك مش واضح عنده شغلك ومجهودك، أو فاهم إن حد بيعمل معاك شغلك وإنه مش مجهودك لوحدك، أو فيه إنجازات بتعملها إنت ومديرك مش واخد باله منها، وبالتالي واخد عنك فكرة إنك مش مجتهد.

لازم أول ماتلاحظ كده تقعد مع مديرك أول بأول، وتوضح أي سوء فهم، عشان الصورة تبقى واضحة عند مديرك وماتبقاش العلاقة بينكوا متوترة، أو فيها أي سوء فهم.

- تجنب التواصل مع مديرك في لحظات الغضب: وإنت منفعل أو متضايق أكيد مش هتقدر تعبر عن أفكارك كويس، وبالتالي هتوصل معنى خاطئ، وكمان ممكن تتجاوز حدود الاحترام لمديرك، حتى لو حاسس إنك مظلوم في حاجة، استنى لما تكون هادي وبعدين اقعد اتكلم.

ونفس القصة برضه لو لقيت مديرك غاضب أو منفعل، تجنب تماما إنك تقعد تكلمه أو تناقشه.

- روح لمديرك بحل للمشكلة: لو بتواجهك مشكلة ماتجريش على مديرك وتصدرله المشكلة، روح واتناقش معاه وإنت معاك على الأقل حل واحد لمواجهة المشكلة ديه.

- تحّمل المسئولية: أكيد مديرك هيتعامل أكتر بطريقة كويسة وبتقدير مع الموظف إلي بيشيل المسئولية، الموظف إلي يقدر يعتمد عليه و هو متطمن، عشان كده خليك فرد مسئول في فريق العمل، وهتلاحظ تحسن كبير في علاقتك بمديرك.

في النهاية خليك عارف إن مديرك ده بني آدم طبيعي، عنده ضغوط وتحديات بتواجهه، هو مش منصب مجرد، وتحسين علاقتك بمديرك مسئوليتك إنت مش مسئولية أي حد تاني، وأي مدير طبيعي ومنصف لو اتعاملت معاه بالآليات إلي قلناها في البوست، هتلاقي علاقتك بيه بقت أحسن ما يكون.

 

شارك المقال :