10 حاجات بيخفيها المدير الذكي عن موظفيه

المدير الشاطر هو اللي بيعرف يكسب الموظفين بتوعه ويكون علاقة ودودة معاهم في صالح بيئة الشغل، ودي بتحتاج نوع من اللباقة أو نقدر نعتبرها من المهارات الإدارية اللي بتحتاج نوع من الانفتاح والمرونة.

لكن في نفس الوقت الانفتاح والمرونة ممكن يكلفوه كتير؛ وده لأن بعض المديرين ممكن يتكلموا مع الموظفين في حاجات تضر بيئة الشغل؛ بالتالي لازم المدير يكون عنده ذكاء وعارف الأمور اللي ينفع يتكلم فيها مع الموظفين والأمور اللي لازم يمتنع عنها حتى لو بشكل ودي.

وده اللي أكده مجموعة من الباحثين في موقع "TalentSmart" في دراسة عن المديرين كشفت عن إن 90% من المديرين الأكفاء هم اللي بيمتلكوا بنسبة عالية من الذكاء العاطفي اللي بيخليهم يعرفوا إيه اللي ينفع يتقال للموظفين في مكان الشغل وإيه اللي مينفعش يتقال!

بالتالي فيه مجموعة من الأمور الشائعة اللي مينفعش المدير يتكلم فيها مع الموظفين بتوعه أيًا كانت العلاقة ما بينهم عشان ممكن يترتب عليها مشاكل كتير، وده اللي هنوضحه ليكم في البوست ده:

1. "ياعم إذا كان المدير نفسه مش طايق الشغل !!"
كلنا بنعاني من مشاكل في شغلنا وفيه مننا اللي مش طايق الشغل ومستني أول فرصة عشان يسيبه لكن مينفعش بأي حال من الأحوال إن المدير يصرح بكرهه للشغل للموظفين بتوعه حتى لو على سبيل الهزار وفي ساعة صفا؛ لأن أبسط نتيجة ممكن تتربت على ده إنه يقلل من معونايتهم.

2. "مديرنا ده ملوش عزيز!!"
مش من اللباقة إنك تصرح بعدم كفاءة موظف قدام زمايلة أو تقلل من أداءه، لأنك أولًا مش هتستفيد حاجة لما زمايلة يعرفوا إنه مش كفء، بالعكس أنت هتأثر على ثقته في نفسهم، وثانيًا الضرر هيعود عليك وهيتاخد عنك انطباع وحش نتيجة الآراء السلبية اللي هيكونها الموظفين عنك.

3. "حبيب مديرنا وصل "
من الأخطاء اللي ممكن يقع فيها أي مدير هو إنك تصرح للموظفين بتوعك بحبك أو كرهك أو إعجابك سواء بزميل ليك في المستوى الإداري أو في المستويات الإدارية الأعلى منك أو حتى أحد الموظفين، وده لأن الكلام ممكن يتنقلهم، ويسببلك مشاكل مهنية أو حتى تحفظات في التعامل ما بينكم.

4. " وده بياخد مرتب كبير ...على إيه أنا مش عارف!"
مينفعش تعرف الموظفين دخلك الشهري أو دخل أي حد من زمايلهم؛ لأن ده عمومًا مش فصالح الشغل، وحتى لو كانت العلاقة بينهم كويسة وعلاقتهم بيهم قوية وفيه ترابط ما بينكم؛ فمن المستحيل – في أي مؤسسة -إن الرواتب تتوزع لكل الموظفين بمثالية، والموضوع ده بالذات لا يخلوا من المقارنات، واللي هتكون نتيجتها بيئة عمل سلبية وضغائن.

5. "بصُ بيطبل عشان الترقية !!"
مينفعش تعرف أي موظف بتطلعاتك للحصول على منصب أو لقب ما جوه الشركة أو إنك عايز تزود مرتبك، وعلى الرغم من إن سعيك للترقية أمر مشروع إلا إنه ممكن يحطك في مواضع شك وارتياب كتيرة في نظر موظفيك انت في غنى عنها.

6. "من ساعة ما اتناقشت معاه في السياسة امبارح وهو حاطتني فدماغه!!"
إن الموظفين يعرفوا معتقداتك الدينية والسياسية ده ممكن يخليهم يغيروا تصوراتهم عنك، وكمان ممكن اللي مختلفين معاك في الآراء ينفروا منك خصوصًا لو كنت مُصر عليها وبتدافع عنها، ده غير الصراعات والنقاشات الحادة اللي ممكن تحصل في الشغل لو تطرقنا للمواضيع دي، وأي تصرف منك هيكون ليه مدلولات دينية أو سياسة بالنسبالهم!! والنتيجة ...بيئة عمل غير صالحة.

7. "بص يباشا ده طلع هلاس أوي":
وده موضوع في غاية الخطورة؛ لأن الموظفين بيكونوا انطباع عنك من حساباتك على السوشيال ميديا؛ وإن كان ده خطأ شائع لكنه موجود للأسف، وممكن الشخصية الهولامية اللي انت راسمها في الشغل دي تنهار بسبب صورة أو كومنت غير مناسب -بالنسبة لموظفيك-، وعلى الرغم من إنها أمور بسيطة بس بتسيب انبطاع مش قليل، عشان كده يُفضل إن المديرين ميفصحوش عن تفاصيل حياتهم الشخصية على السوشيال ميديا، ويتعاملوا من خلال لينكدإن.

8. "ياعم اللي فيه طبع ميغيروش ...سيبك انت"
أحيانًا بعض المديرين ممكن يحكوا عن ماضيهم للموظفين على سبيل الهزار، وده بيترك انطباع سلبي عنه، وحتى لو كان الموقف ده من 20 سنة مثلًا إلا إن البعض ممكن يفتكر أنك ما زلت بترتكب نفس الأفعال دلوقتي.

9. " يا جدعان دمه سم !!"
أحيانًا بعض المرح في مكان العمل أمر صحي وبيخلق بيئة عمل مرغوب فيها لكن أحيانًا القلش ممكن يتجاوز المسموح، فلازم تكون حذر، وكمان انت متعرفش خلفيات كل واحد من الموظفين بتوعك وممكن قلشة بالنسبالك تكون في غير موضعها وياخدوها على محمل الجد.

10. " عايز يمشي في أقرب فرصة فعلًا الشغل هنا صعب أوي"
إنك تبلغ التيم بتاعك بميعاد تركك للوظيفة ده نغمه، وإنك تعرفه إنك بتفكر تسيب الشغل وتدور على شغل تاني ده نغمه تانية، في الحالة الأولى ده أمر محبذ " يا جماعة أنا هنتقل لمنصب تاني او بوزشن تانيه مع أول الشهر)، لكن في الكيس التانيه انت بتنقلهم رسالة مفادها إن الشغل مش على هواك وبتدور على شغل تاني.

في النهاية دي بعض الأمور الشائعة اللي ممكن تضر بيئة الشغل في حالة إن المدير أفصح عنها للموظفين، قولولنا من وجهة نظركم إيه الأمور اللي شايفين إنها مينفعش تتقال للموظفين وممكن تضر ببيئة الشغل!