920033973
16342
article

كيف تصدر منتجك للخارج

September 16, 2019    

لو انت مبتدئ في مجال التصدير ومش عارف تّمشي مشروعك إزاي عشان تنجح، وعايز تتعلم إيه المطلوب منك بالظبط، أو إيه المفروض تركز عليه وتعمله وإنت في بداية بيزنس التصدير... يبقى هتحتاج البوست بتاع النهاردة.

بس مهم قبل ما نبدأ البوست تبقى عارف إن التصدير مش مشروع الشركات الكبيرة ورؤوس الأموال الضخمة وبس، إنت ممكن لو هتبدأ مشروع صغير تشتغل في مجال التصدير، أكيد هتحتاج لفلوس طبعا، بس الخبرة في المجال ده أهم بكتير.

يعتبر بيزنس شركات التصدير مهم جدا لأنه أحد أهم أسباب النمو الاقتصادي للبلد، وكل ما زادت صادرات أي بلد كل ما ارتفع مستواها الاقتصادي، وده لأن التصدير هو بيع وتسويق المواد أو المنتجات إلي بلدك بتتميز بيها، وبتحتاجها الدول التانية بره.

نيجي بقى لمجموعة من العوامل لازم تحاول إنها تكون متوفرة عندك على قد ماتقدر، لأن ليها دور كبير في نجاحك في مجال التصدير:

1- العلم.. لازم تكون قاري ودارس كويس المجال ده، ومصطلحاته، والمستندات المطلوبة منك.. إلخ.

2- علاقات جيدة مع العيلة والأصدقاء وخاصة بره مصر، لأنك لو بتبدأ البيزنس ده لأول مرة، بنسبة كبيرة هتعتمد في البداية على علاقاتك ومساعدة المقربين ليك لحد ماتكّون علاقاتك من جوه البيزنس.

٣- رأس المال إلي تبدأ بيه، وطبيعي إنك تزوده لما تكبر وأرباحك تزيد، بس إنت محتاج رأس مال تبدأ بيه في الأول.

4- دّور عن مستوردين، واتفقوا بوضوح على كل شروط التعامل بينكو، وطبيعي في بداية البيزنس وإنت لسه مالكش علاقات كتير تستعين بأصدقاء أو زملاء عندهم خبرة، وبعد كده بعلاقاتك هتقدر توسع الدايرة ديه كل ما البيزنس بتاعك يكبر.

5- تحدد هدفك من الشركة، يعني هتصدر منتج عادي زي الأقلام الرصاص مثلا، وهنا هتقابل منافسة كبيرة لأن فيه شركات كتير بتعمل ده، ولا هتدور وتعمل أبحاث تشوف إيه المنتج إلي عليه طلب وماحدش بيصدره وتاخد الاتجاه ده وتكون ليك المبادرة الأولى.

لو نجحت توفر من العوامل قدر ما تقدر، يبقى جينا للمرحلة إلي بعدها، وهي خطوات تأسيس شركة التصدير:

أولا: استخراج البطاقة الضريبية والسجل الضريبي:
وتقدر تخلص الورق ده من مأمورية الضرايب الموجودة في منطقتك، والأوراق إلي لازم تستخرجها هنا هي: أصل البطاقة وصورة منها، عقد إيجار موّثق من مصلحة الشهر العقاري وصورة منه.

ثانياً: القيد بالغرفة التجارية:
لازم تقّيد شركتك بالغرفة التجارية، وتقدر تعمل ده عن طريق التوجه لأقرب غرفة تجارية ويبقى معاك الأوراق ديه: أصل البطاقة الضريبية وصورتين منها أو كعب الاستلام لو كنت لسه ما استلمتهاش، أصل البطاقة وصورتين منها، عقد إيجار موثق من الشهر العقاري وصورتين منه.

•ثالثاً: القيد في السجل التجاري:
تقدر دلوقتي تروح لمصلحة السجل التجاري وتقدم طلب إصدار سجل تجاري خاص بيك والمستندات اللازمة هي: أصل البطاقة الضريبية أو الكعب بالإضافة لصورتين منها، البطاقة وصورتين منها، شهادة القيد بالغرفة التجارية.

رابعاً: القيد بسجل المصّدرين:
عشان تضمن القيد بسجل المصدرين تقدر تروح لمقر الهيئة العامة للرقابة على الصادرات والواردات، ومقرها في شارع رمسيس جمب نقابة الصحفيين، ويبقى معاك المستندات ديه: البطاقة الضريبية أو الكعب وصورتين منه، السجل التجاري وصورتين منه، شهادة الميلاد وصورتين منها، فيش وتشبيه موجه للهيئة العامة للرقابة على الصادرات والواردات، شهادة الخدمة العسكرية وده بالنسبة للرجالة.

خامساً: القيد بمصلحة الضرائب على المبيعات:
وتقدر تعمل ده عن طريق مصلحة الضرائب على المبيعات الموجودة في منطقتك وتتقدم بطلب قيد، والمستندات المطلوبة هي البطاقة الضريبية وصورة منها.

سادساً: عمل حساب بنكي بإحدى العملات الاجنبية مثل اليورو والدولار:
والأوراق المطلوبة لفتح حساب بنكي: بطاقة هوية – سجل تجاري – بطاقة ضريبية.

وبكده تبقى أسست شركة التصدير بتاعتك، والمفروض دلوقتي تبدأ تشتغل، وتصّدر المنتجات المصرية لبره.. إزاي؟

إعمل الخطوات ديه:
1- دّور كويس عن الأسواق الموجودة في الدول العربية أو الأجنبية إلي ممكن تتعامل معاها، ويكون منتجك مناسب لقوانين وطبيعة السوق إلي هتصدرله.

2- ادرس السوق الخاصة بالبلد إلي هتصدر ليه، ويفضل الاستعانة بخبراء في الخطوة ديه عشان تحصل على نتائج دقيقة.

3- دّور عن شركة تتعامل معاك وتصدر من خلالها، عن طريق الإنترنت أو أصدقاء ليك مقيمين في البلد ديه، أو تروح بنفسك وتختار الشركة، ولازم طبعا تعرض عليهم عينة من المنتج تتوافر فيها مقاييس الجودة المطلوبة.

4- الاتفاق النهائي على كمية البضاعة إلي هتصدرها، وهنا بقى بيكون الاتفاق النهائي بينك وبين الشركة إلي هتستلم منك المنتج إلي هتصدره، وبتكتب عقد الاتفاق النهائي بينكو بكل التفاصيل والشروط.

آخر جزء هنتكلم عنه في بوست النهاردة هو أبرز المنتجات المصرية وأفضلها للتصدير عشان لو قررت تدخل بيزنس التصدير تبقى فرصتك في النجاح أكبر.

وهنا هتلاقي مصر متميزة جدا في عدد من المنتجات الزراعية وأبرزها البرتقال المصري، ومهم هنا يكون مطابق للمواصفات، يعني خالي من الأسمدة والمبيدات، وكمان هنلاقي البطاطس والفروالة والخرشوف.

وبعيدا عن المنتجات الزراعية هنلاقي مصر متميزة جدا في تصدير المنتجات الجلدية سواء أحذية أو شنط، وكمان الكابلات والأجهزة الكهربائية، والملابس القطنية.

بيزنس التصدير مش لازم يكون تابع لشركة كبيرة، وفي ناس كتير ممكن تبدأه من البيت، بس مهم تكون عندك خبرة كويسة، وتدرس كويس، ومافيش أي مشكلة إنك تستعين بخبراء في التصدير عشان تقدر تنجح في المجال ده.

 


مقالات مشابهة

المزيد

الأكثر قراءة

المزيد
 هل يجوز للأجنبي تأسيس شركات في مصر؟: المستندات المطلوبة وطريقة التقديم
 هل يجوز للأجنبي تأسيس شركات في مصر؟: المستندات المطلوبة وطريقة التقديم

نظرًا لرغبة الحكومة المصرية في تشجيع مناخ الاستثمار

كيفية إعداد الميزانية العمومية: البنود والطريقة والأهمية
كيفية إعداد الميزانية العمومية: البنود والطريقة والأهمية

كثيرًا ما نقابل مصطلح الميزانية العمومية لكننا نتعامل

تعلم محاسبة المقاولات من الصفر حتى الاحتراف
تعلم محاسبة المقاولات من الصفر حتى الاحتراف

تعد محاسبة المقاولات واحدة من أهم فروع علم المحاسبة

كيف تصدر منتجك للخارج
كيف تصدر منتجك للخارج

لو انت مبتدئ في مجال التصدير ومش عارف تّمشي مشروعك

7 فروق جوهرية تساعدك في تحديد الفرق بين شهادة IFRS ودبلومة IFRS؟ 
7 فروق جوهرية تساعدك في تحديد الفرق بين شهادة IFRS ودبلومة IFRS؟ 

عندما نتحدث عن مجال المحاسبة المالية ولاسيما

دليلك الشامل لفهم عناصر المزيج التسويقي السبع marketing mix 7ps
دليلك الشامل لفهم عناصر المزيج التسويقي السبع marketing mix 7ps

في عالم يأفل فيه نجم 15% من الشركات الناشئة في فترة

كل ما ترغب في معرفته عن تعريف العطاءات وأنواعها في عالم المال 
كل ما ترغب في معرفته عن تعريف العطاءات وأنواعها في عالم المال 

في عالم المال، ستجد هناك 3 مصطلحات تتكرر باستمرار،

مصادر التمويل للشركات: كيف تختار جهة التمويل المناسبة لك؟
مصادر التمويل للشركات: كيف تختار جهة التمويل المناسبة لك؟

عندما يأتي الحديث عن بقاء الشركة ونموها، فإن المال

أهم 5 أسباب لفشل الشركات في مصر
أهم 5 أسباب لفشل الشركات في مصر

ماهي أهم 5 أسباب لفشل الشركات في مصر... أولاً الشراكه ....