اتكلمنا فى البوست الأول من #الاستثمار_فى_كينيا عن مجموعة من المعلومات و

في البوست ده مش هنتكلم عن اجراءت الاستثمار في افريقيا بس هناقش الموضوع من خلال تجارب ناس سفرت وقدرت تنجح عشان يكون في واقعية نقدر من خلالها نستفيد ونتعلم والنهاردة هنتكلم عن تجربة ضياء الدين و محمد عزت واللى قالولنا:

كينيا موجودة في شرق افريقيا وبتعتبر البوابة الرئيسية ومحور اقليمي لدول شرق ووسط أفريقيا وبتمتلك اكبر ميناء بحري، بالاضافة لمظاهر التقدم في العاصمة نيروبي واضحة جداَ لدرجة انك ممكن تفتكر انك في دولة اوربية ومعدل الامان هناك كويس وأهل البلد كويسين في التعامل مع الاجانب والتعامل مع المصالح الحكومية أو البنوك سهل ولو معاك لغة انجليزية هتعرف تخلص امورك بسرعة وللاسف موضوع العمولات ده منتشر في افريقيا عموما مش في كينيا بس عشان تعرف تخلص امورك.

اكبر المستثمرين هناك الهنود وبعد كده الصومالين والفرص الاستثمارية كتير في بعض المجالات سواء الخدمية او الاستهلاكية بس منافسة الهنود في البيزنس صعبة شوية لانهم متواجدين هناك من زمان بالاضافة لحصولهم على الجنسية.

طيب ازاى أبدأ الاستثمار فى كينيا؟

أى مستثمر عايز يبدأ مشروع في كينيا او في أفريقيا عموما لازم ينزل علي أرض الواقع ويعرف إيه هي الفرص الاستثمارية المناسبة ليه ولخبراته ويفضل لو مجموعة تسافر مع بعض هيكون كويس ليهم وللبيزنس.

ولو انت حابب تصدر منتج من مصر لكينيا فبالتالي هتكون محتاج تعمل دراسة للسوق هناك والكميات اللي محتاجها ووجودك هناك هيساعدك في فهم طبيعة السوق اللي انت هتصدرله لان الدول الافريقية مختلفة في الطباع والعادات عن الدول العربية وبرضوا محتاج تعرف شوية عن الاسواق هناك.

أشهر الاسواق اللي موجودة فى كينيا هو سوق إسيلي وده بيتواجد فيه التجار الصومالين وبيشتهر بحركة كبيرة جدا في التجارة وقوة شرائية عالية وبيعتبر من اكبر الاسواق اللي موجودة في كينيا و مقسم الي 30 مباني تجاري لكل مبني تخصص معين.

وعلشان تعرف ان وجودك مهم فى البلد اللى قررت تستثمر فيها هنحكيلكم عن تجربة نجاح مميزة فى البيزنس على لسان ضياء الدين.

بيحكى ضياء انه قابل مصري في كينيا استغل حاجة بسيطة جداَ وقدر انه يفتح من وراءها بيزنس كبير لانه اكتشف ان كل الكينيين بيفضلوا يكون فى عصير جنب الاكل فالراجل ما كدبش خبر وقام استورد عصير محلي من مصر والموضوع مشي معاه وبقي من اكبر المستوردين للعصير في كينيا خصوصا ان العصير الفرش في كينيا أسعاره غالية مقارنة بالمستورد.

بيحكى ضياء عن فرصة تانية وبيقول ان واحد صحابه طلب منه مادة معينة بتدخل في صناعة الجلود وهي بتيجي من كينيا فبدأ يسأل عن المادة دي لحد ما وصل لأماكن بيعها واسعارها وجرب في حاوية والموضوع مشي وبقي مردوده كويس وبعد كده زود في عدد الحاويات.

وأضاف ضياء تجربة تانية ليه انه اثناء وجوده هناك اخد بعض عينات البهارات وهو نازل لمصر وعرضها علي بعض التجار والناس عجبتهم الحاجة فبدأ مرحلة جديدة وانه يرجع تاني لكينيا عشان يشوف المزارع بتاعت الفلفل وياخد عينات واسعار من التجار وبالفعل قدر يجمع حاوية وبعد كده قدر انه يأسس بيزنس قوي في استيراد الفلفل من كينيا.

طيب تتعامل مع التجار ولا الشركات؟

التعامل مع التجار ولا الشركات دي نقطة مهمة لو حابب تستورد منتج من هناك يبقي لازم تعرف طبيعة السوق والموسم بتاع المنتج ده هيبدا امتي ويخلص امتي، لان في حاجة اسمها مجمعين اللي هما صغار التجار فيفضل انك تتعامل مع تجار لانهم هيوفرولك أسعار أفضل.

نقطة مهمة في صالح المنتج المصري وهي ان إتفاقية الكوميسا بتعفي المنتج المصري من الجمارك عشان كده هما بيفضلوا المنتج المصري بالاضافة ان في منتجات كتير سمعتها كويسة هناك وخاصة المنتج الغذائي زي العصير والمكرونات بس يفضل طبعا يكون ليك مخزن هناك وكمان طريقة تويل البضاعة للعميل مباشرة ده كله بيخلي ليك افضلية عند التاجر انه يتعامل معاك.