لماذا اعمل بيزنس

مع كل بوست أو مقال بكتبه بيجيلى منه ردود ومناقشات بتفيدنى وبتطور معلوماتى ومع كل بوست بكتبه بارجع لكتب ومراجع إدارية برضة بتطور إللى بكتبه لو أضفت لذلك ماجستير إدارة الأعمال اللى درست فى 12 كتاب كل كتاب أكتر من 1000 صفحة يبقى عدد البوستات اللى ممكن نكتبها أو تقراها هاتزيد عن 100 ألف بوست ومقال .

.. طيب وبعدين ؟ يعنى هو لما أى حد يقرا ألف مقال عن البيزنس يقدر يفتح بيزنس؟

أنا هارد عليك وأقولك لو انت اتفرجت على 100 ألف ماتش هاتبقى حريف فى الكورة ؟؟

البيزنس علم وممارسة لازم تتعلم وإنت بتشتغل وتشتغل وإنت بتتعلم وكل ما تشتغل هاتتعلم وكل ما تتعلم هاتشتغل

الموضوع مش فزورة ... الموضوع كله إنى قررت أعمل صفحة على الفيس علشان أقدر أوصل العلم اللى إتعلمته من الدراسة والممارسة لأكبر قدر من الناس إللى بتشتغل فى مراحل مختلفة أو ناوية تشتغل لرفع مستوى الوعى الإدارى اللى كلنا محتاجينله علشان نتقن شغلنا ونحسنه ومخدنهوش فى المدرسة ولا فى الأفلام والمسلسلات اللى بنتفرج عليها ليل ونهار زى ما الغرب بيعمل فى المدرسة وبرضه فى الأفلام ..... ولا فاضيين نقرا ولو فاضيين المحتوى العربى فقير جدًا فى الإدارة ومعظم المكتوب موجه للمتخصصين ولا فاضيين أو معانا فلوس ندرس فى معاهد أو جامعات

طيب الحل إيه ؟؟ أنا شخصيًا بقدم جزء من الحل إللى كنت محتاجه في وقت من الأوقات وملقيتش حد يوصلهولى فقررت إنى أقدمه للى بعدى كصدقة جارية أو رد جميل العلم إللى ربنا بعتهوللى مش ده المهم .....

المهم إنك تعرف إن كل اللى بيتكتب على الصفحة دى هو جزء من دورك المطلوب علشان تشتغل لأنى شفت ناس وصلت للعلم إنهم كانوا زمايلى فى الماجستير وفاشلين فى الحياة العملية أو مش ناجحين النجاح الكافى .... كل إللى بطلبه من المتابعين للصفحة إنهم يفهموا إن الصفحة ممكن تبقى عامل مساعد ومهم للنجاح إنما العامل الأساسى والمهم برضه متوقف عليك إنت وإنت بس .....

يعنى باختصار علشان تستفيد من الصفحة دى :-

أولًا لازم تبقى عارف إنها جزء من الحل وليس كل الحل .

ثانيًا إقرا كل يوم وطبق إللى بتقراه غير كده هاتبقى معلومات عامة.

ثالثًا فيه طلب تانى هاطلبه من المتابعين للصفحة (متخافشى مش هاطلب فلوس ) أنا بس طالب إننا نساهم فى نشر الصفحة وده عن طريق دعوة الأصدقاء للصفحة