FB Instagram Twitter Youtube Linkedin مفاهيم مغلوطة .. ليه الممثلين ولاعيبة الكورة بياخدوا ملايين؟ | أكاديمية اعمل بيزنس
 
الرجوع الى المدونة

مفاهيم مغلوطة .. ليه الممثلين ولاعيبة الكورة بياخدوا ملايين؟

مفاهيم مغلوطة .. ليه الممثلين ولاعيبة الكورة بياخدوا ملايين؟

كتير بنلاقي على السوشيال ميديا والقعدات على القهاوي وحتت تانية واحد يطلع كده ويقول "دول واكلينها والعة"، بياخدوا ملايين على الفاضي، وأنا درست 16 سنة وبعد كده اتخرجت واشتغلت وطول حياتي مش هعمل ربع اللي بياخده لاعب في سنة أو ممثل في فيلم.

الحوار ده بنسمعه كتير وفي معظم الأحيان اللي قاعدين بيوافقوا أو بيشوفوا أن الموضوع مش منطقي أن واحد بيلعب كورة يكون بيعمل فلوس أحسن من دكتور أو مهندس أو مدرس، بس الموضوع دايما ليه جانب تاني لازم نشوفه، تعالى اقولك بقى وأرد عليك في السؤال بتاع أخينا اللي زعلان.

موضوع الأجور ليه جوانب ومعايير كتيره جدا على أساسها كل واحد بيكون ليه سعر، أو بمعنى أدق وقته ليه سعر في السوق، ومن المعايير ديه مثلا: الندرة.. وده يعني حضرتك يكون عندك مهارة أو حاجة تقدر تعملها محدش تاني يقدر يعملها أو بنفس مستوى الاتقان.

ممكن نلاقي ده في بعض الجراحين مثلا اللي عندهم خبرة في جراحات دقيقة زي المخ أو القلب وغيره ودول بنلاقي أجورهم عالية جدا لأن عندهم مهارة وخبرة كبيرة في مجال ناس كتير محتاجينه، وده بنلاقيه طبعا في مجال تاني زي الناس اللي بتعلب رياضة معينة زي كورة القدم أو التنس .. ودول بياخدوا مقابل كبير جدا وده لأنهم قاعدوا سنين من عمرهم يتدربوا وسافروا وحرموا نفسهم من حاجات كتير مش كل الناس تقدر عليها بالإضافة إلى انهم بيمتلكوا مهارة طبعا بتخليهم متميزين.

المقابل ده لازم تاخد بالك أنه بيبقى كبير لأن في مخاطرة كبيرة الراجل ده عملها في حياته وهي أنه اختار شغلانة مستقبلها ممكن ميكنش مستقر زي الوظايف العادية.. كمان بيبقى عمر الشغلانة أو التخصص بيكون قصير، يعني لما تشوف لاعب الكورة بيلعب كام سنة وأد ايه بيكون معرض لإصابة بشكل مفاجئ واللي ممكن تقعده في البيت لازم نعرف أن المقابل لازم يبقى بالحجم ده.

وممكن نلخص المعايير ديه في التالي:

 

1- العرض والطلب:
الشغل والمرتبات بتحكمهم في أغلب الأحيان نفس قوانين العرض والطلب اللي بتحكم أي سوق، يعني المرتبات في سوق العمل بتكون فيها حالة من التوازن بين احتياجات الشركات والمتاح من المواهب والمهارات في سوق العمل، فلو في وفرة من الموظفين في مجال معين متوسط المرتب ليهم ها يكون أقل كتير من تخصصات الشركات محتاجاها لكن مش متاحة كتير سوق العمل ها يكون مرتب الموظف منهم عالي جدا لأن بيكون عليه طلب عالي.
وده ممكن نقوله ببساطة نلخصه في كلمتين، فيه كام واحد يعرف اللي بتعرف تعمله ومطلوب كام واحد زيك.

 

القيمة المضافة:
العائد على الاستثمار أو (ROI -Return On Investment) يعني كل جنيه هايدفعه بيعمل أرباح كام، وبنفس الفكرة كل ما الوظيفة كان العائد منها للمشروع أعلى كل ما كان مرتبها اعلى سواء كان بشكل مباشر يعني مسؤول المبيعات لمنتج بمليون غالبا مرتبه أعلى من مسؤول مبيعات لمنتج بألف جنية بس أو بشكل غير مباشر زي مثلا مدير مسؤول عن فريق عمل بيدخل ملايين ومسؤول تعينات لشركة عندها نسبة دوران عالي للعمالة، وكل دول بيخلقوا عائد للمكان اضعاف الراتب اللي بياخدوه.
لما مثلا منتج السينما بيجي يختار الممثلين بيبقى عنده حسابات، هل الممثل ده عنده شعبية عشان يقدر يعمل إيرادات تحققله أرباح.

 

3- التخصص:
كل ما كان مجال الشغل محتاج معرفة بشكل محدد وتفصيلي في مجال من المجالات الشغل، فالشخص اللي عنده المعرفة دي ها يكون دخله اضعاف باقي الناس، يعني مثلا لو الشركة محتاجة محامي بيتعامل مع التحكيم وصياغة العقود الدولية أو محاسب متخصص في التعامل مع البنوك والاعتمادات المالية والمستندية أو مهندس متخصص في تركيب وتشغيل إصدار جديد من ماكينات الإنتاج كل دول ها يكون مرتباتهم أعلى كتير من باقي الموظفين في نفس مجال شغل لكن من غير نفس التخصص.

 

4- الخبرة:
الخبرة هنا يعني المعرفة المتراكمة مع الزمن وفي الشركات معناها إنك تكون عملت المهام الوظيفية دي قبل كدة، والشركات غالبا بتطلب الخبرة في الوظائف المهمة عندها لأنها بتقلل وقت الدخول في تفاصيل العمل ووقت استيعاب التطورات المستمرة وكمان بتسمح بستخدام موارد الشغل بفعالية أكبر يعني في كل الحالات بتخلق دخل أعلى بتكاليف اقل نسبيا، فكل الموظف ما خبرته زادت كل ما مرتبة زاد بشرط انها تكون مرتبطة بقيمة مضافة عاليا للمشروع.

والخلاصة.. متبصش لحد في رزقة  لأن الشخص ده مؤكد عنده اللي بيتقدر عليه، واشتغل على نفسك ومهاراتك عشان تقدر توصل للي أنت عاوزه وتحقق مستوى الدخل اللي يرضيك، وأتمنى الخير لكل الناس.

شارك المقال :