لو لسه بادئ في مشروعك الأونلاين وبعد ما صممت موقعك الإلكتروني على أكمل وجه وراعيت إن محتوى الموقع يكون مناسب لمحركات البحث، لازم تسأل نفسك إزاي هتعرف تحدد إذا كان موقعك ده ناجح ولا فاشل؟ وهل إنت حاطط معايير ومؤشرات تقولك إنت ماشي على الطريق الصح ولا فيه حاجات غلط بتعملها؟

عشان نكون متفقين من البداية في حالة لو مكنتش حاطط لمشروعك مؤشرات قياس أداء KPIs فإنت بالطريقة دي هتكون خسرت مصدر مهم جدا للمعلومات هيساعدك في تحسين موقعك والمحتوى اللي فيه في المستقبل.

تعالى في الأول نعرف إيه هي مؤشرات قياس الأداء دي؟

مؤشرات قياس الأداء KPIs هي عناصر بتستخدم عشان تقيم بيها مدى نجاح مشروعك الإلكتروني، وهي عملية مهمة بنفس أهمية إعداد الأهداف والخطة الاستراتيجية لمشروعك وشركتك، ومن غيرها مش هتعرف تقيس مدى تقدمك وهتلاقي نفسك بتاخد قراراتك بناء على شعورك وإحساسك الداخلي أو تفضيلاتك الشخصية أو أي افتراضات تانية ملهاش أي أساس.

وعشان كده فمؤشرات قياس الأداء مهمة جدا وخاصة في المشاريع الأونلاين لأنها بتساعد في:

• قياس الهدف: هي اللي هتعرفك إذا كان عملك بيحقق أهدافه الاستراتيجية ولا لأ.

• توفير المعلومات ورجع الصدى: هتوفرلك لمحة بسيطة ومتعمقة وثابتة عن الأداء العام لمشروعك، ده غير إن المعلومات دي بتكون موثوقة وفي وقتها الفعلي وبالتالي هتساعد على إنك تاخد قرارات فعالة.

• تحسين الأداء: مؤشرات الأداء مش هتساعدك بس في تحسين أداء موقعك بس ولكن كمان هتساعدك في تحويل زوار الموقع لعملاء.

• تحفيز المعنويات: لما مؤشرات الأداء الرئيسية تكون جيدة ده معناه إن فريق العمل هيحصل على ردود أفعال إيجابية وتحفيزية لكن لو مفيش قياس للنتائج ده ممكن يؤدي بسهولة للتغاضي عن العمل الجيد.

• الاتساق والاستمرارية: الأشخاص والأولويات والأهداف في الأعمال التجارية ممكن تتغير بمرور الوقت، ولكن مؤشر قياس الأداء الرئيسي لازم يفضل شيء ثابت عشان يتم تحقيق الأهداف الاستراتيجية طويلة الأجل.

ومؤشرات الأداء الرئيسية الخاصة بمشروعك الأونلاين ممكن تكون كتيرة ومتعددة، لكنها ممكن تكون خادعة في نفس الوقت بسبب إنهم كتير، وعشان كده لازم تكون فاهم إنت بتقيس إيه بالظبط وليه وإيه هي الخطوات التنفيذية اللي هتاخدها بناء على المؤشرات دي عشان تحسن من أداء مشروعك ومن تجربة العميل بتاعك بشكل عام.

ومن أهم المؤشرات اللي ممكن تساعدك في قياس أداء مشروعك الإلكتروني وتعرف منها مدى نجاحه هي:

• أعداد المستخدمين على الموقع: ودي بتكون عبارة عن العدد الإجمالي للزيارات على موقعك الإلكتروني، وكل ما كان معدل الزيارات للموقع مرتفع فده معناه إن عدد المستخدمين اللي بيوصلوا لموقعك كبير.

• معدل الارتداد Bounce rate: واللي بيوضح عدد المستخدمين اللي بيغادروا موقعك بعد مشاهدتهم صفحة واحدة بس، والعدد ده لما بيكون مرتفع فإنت هنا لازم تتحقق من سبب مغادرة الزائرين لموقعك، لأنه ممكن يكون مؤشر على إن تجربة العميل سيئة أو إن الصفحة محتواها ضعيف أو ملوش علاقة باللي العميل كان متوقعه منها، ده غير إن التحميل البطيء للصفحة ممكن يؤدي إلى معدل ارتداد مرتفع.

• متوسط حجم الطلب Average order size: وده بيشير للمعدل اللي العميل بينفقه عادة على كل طلب من موقعك، ومتوسط حجم الطلب مؤشر مهم جدا لأنه بيساعدك في تقييم عملية التسويق الإلكتروني واستراتيجية التسعير اللي بتستخدمها بشكل عام، ومعظم الشركات بتقيس متوسط حجم الطلب عندها بشكل شهري.

• معدل التحويل Conversion rate: هي عبارة عن نسبة مئوية بتوضح عدد المستخدمين اللي بيتحولوا من مجرد زيارة الموقع إلى القيام بعملية الشراء، وحساب النسبة دي ممكن يتم عن طريق قسمة عدد الزوار الإجمالي على عدد العملاء اللي قاموا بعملية الشراء.

• القيمة الدائمة للعميل Customer lifetime value: والمؤشر ده هيساعدك في معرفة مدى ولاء العميل لمشروعك على مدار علاقته بعلامتك التجارية من خلال إعادة الشراء منك أو تجديد الاشتراك.

ففي المرة الأولى اللي بيشتري أي شخص منك دي بتكون مجرد تجربة، يبقوا غالبا بيختبروك وعايزين يعرفوا هل فعلا بتقدم اللي بتقوله ولا لأ، وفي المرة التانية اللي بيجي يشتري منك هنا بيكون العميل آمن بيك وعارف إنك بتقدم الجودة اللي قولت إنك هتقدمها، ولكن إن العميل ده يرجع يشتري منك مرة تالتة هنا بتكون اكتسبت عميل بيثق فيك وهيدافع عنك وممكن كمان تلاقيه بيقول للآخرين عن روعة اللي بتقدمه.

• مصدر الزيارات Traffic source: وهو مؤشر بيعرفك إزاي العميل عرف يلاقي موقعك الإلكتروني، وده مؤشر بيكون هام جدا لأنه هيوضح لك إيه هي الوسائل والقنوات التسويقية اللي بتقود العملاء لموقعك، فهل هما جم عن طريق الإعلانات المدفوعة ولا عن طريق بحث المحركات Organic Search ولا عن طريق السوشيال ميديا.

مؤشرات نجاح المشاريع الأونلاين

مقالات مشابهة

تطبيقات مهمة للبزنس

ساعة أبل تنقذ حياة انسان

إزاي تخلق بيئة عمل آمنة وخالية من التحرش؟

صاحبك ... وتحويشة العمر

الأكثر قراءة

مراحل ترقي الـ HR: من HR Coordinator ل HR Director

أفضل 6 أفلام عن البيزنس لرواد الاعمال

بطريقة سهلة ... ازاي تكتب إميل احترافي

شركات تنافس اوبر وكريم

أهم اختصارات برنامج Microsoft Word

"ماكدونالدز" و"برجر كينج".. الصراع على عرش البرجر

أفضل عشر شركات فى العالم..

تطبيقات مهمة للبزنس

اسباب فشل الشركات الناشئة