ما خاب من استشار

فيه مثل بيقول (صديقك من صدقك لا من صدّقك) المثل ده الواحد بيفتكره لما بقول رأي أو نصيحة لأحد أصدقاء الصفحة ويكون عكس اللي هو بيفكر فيه أو واخد قرار ناحيته وبعد لما بقول رأيي ييجي صاحب السؤال ويبدأ في جدال عنيف علشان أغير رأيي وأقوله اللي عايز يسمعه خصوصاً لما الواحد يبقى شايف مشاكل مستقبلية ممكن يتم حلها دلوقتي والتعامل معاها برؤية قوية وكل الشباب مبدأه إنه يفتح وربنا يسهل ونتعامل بعد كده مع الواقع وأهم حاجة إن المشروع يكسب بالرغم إنه ممكن يقفله وهو بيكسب لعوامل تانيه غير المشروع نفسه

أنا شخصياً قفلت مشاريع كانت بتكسب لأسباب مختلفة كلها كان ممكن تجنبها لو الواحد عنده خبرة أو وهو بيبدأ كان عامل حساب المستقبل زي مثلاً إني قفلت شركة كانت بتكسب في بداية حياتي العملية علشان جالها ضرايب أكتر من 100 ضعف اللي بتكسبه ( كان زمان فيه حاجة اسمها التقدير الجزافي ) رغم إن كان الواحد ممكن يتجنب مشكله زي دي لو بيتعامل مع محاسب قانوني قوي من الأول .

فيه 2002 قفلت مشروع توصيل الانترنت للمحافظات علشان الانترنت أصبح مجاني رغم إني قبل ما أبدأه أخدت صورة قرار من وزارة الإتصالات إن الإنترنت المجاني هيتم تطبيقه بعد سنتين فجأة لقينا قرار جديد بإن الانترنت هيبقى مجاني بعد 3 شهور

في إحدى المرات قفلنا مشروع علشان كنا واخدين المكان إيجار وبالرغم إن صاحبه كان عارضه تمليك لكن القلق إن المشروع ما ينجحش خلانا ناخده إيجار وبعد النجاح الرهيب للمشروع صاحب المكان رفض يجدد عقد الإيجار والمشروع إنتهى

طبعاً مشاكل الشركاء اللي بتقفل كل يوم مشروعات ناجحة لا تخفى على أحد ومحاولة إستئثار شريك من الشركاء بأرباح المشروع أو التحايل لتخفيض نسب باقي الشركاء أو استغلال المشروع أو علاقات من داخل المشروع لتحقيق ربح شخصي كل دي بنشوفها كل يوم ومش محتاجة أمثلة .

في النهاية ياريت نفكر بعمق أكتر وبلاش سطحية زيادة ... الربحية جزء من نجاح المشروع لكن فيه أجزاء تانية ممكن تقفل مشروع بيكسب وأنا قلت أمثلة بسيطة جداً وفيه زيها كتير فأتمنى نتعقل ونسمع كلام أصحاب الخبره اللي حوالينا ونفكر في كلامهم حتى لو مش مقتنعين بيه ونحط إحتمال إن المشروع يكسب ونستعد له كويس