FB Instagram Twitter Youtube Linkedin مبادرة مصر تبدأ لدعم رواد الاعمال | أكاديمية اعمل بيزنس
 
الرجوع الى المدونة

مبادرة مصر تبدأ لدعم رواد الاعمال

مبادرة مصر تبدأ لدعم رواد الاعمال

لاحتضان ودعم رواد الأعمال .."مصر تبدأ" (1)

زي ما ناس كتير بتكون فاكرة إن جبل الثلج حجمه صغير لأن ده اللي هما شايفينه إنما الحقيقة إن الجزء غير المرئي منه كبير جدًا، هنلاقي كمان إن في مجال تنمية وتمويل الشركات الصغيرة والمتوسطة في عدد كبير من الشباب ما يعرفوش غير جهات قليلة لكن الواقع بيقول إن في شركات كتير بيقدموا خدمات متنوعة لرواد الأعمال علشان كده هنعمل سلسلة عن الشركات والبرامج اللي بتهتم بالاستثمار في المشروعات الناشئة.

في الحلقة الأولى هنكلمكم عن مبادرة "مصر تبدأ" اللي بتقدم برنامج مجاني لاحتضان ودعم رواد الأعمال في مختلف مراحل تطوير شركاتهم الناشئة، وده معناه إنك تقدر تقدم معاهم لو عندك مجرد فكرة لمشروعك، أو حتى نموذج مبدئي يعني عندك منتج أو خدمة أولية لسه ما نزلتهاش في السوق، أو عندك خدمة مبدئية نزلتها السوق، أو أطلقت المنتج أو الخدمة بتاعتك وهي فيها مميزات كافية يقدر العملاء يستخدموها، أو شركة ناشئة بتسوق وبتبيع منتجاتها وخدماتها في السوق.

البرنامج بيركز على الأفكار والمشروعات الناشئة اللي بتخدم القطاعات المؤثرة في المجتمع (زي: التعليم، والشمول المالي، والرعاية الصحية، والطاقة النظيفة، والزراعة، والمجتمعات المهمشة، وإدارة المخلفات، ووسائل النقل)، وبيساعد أصحابها إنهم يحولوها من فكرة مجردة لفكرة مؤهلة لدخول السوق والتواجد فيه بقوة، وإنهم كمان يكونوا جاهزين لجذب المستثمرين.

وده من خلال تدريب مكثف للفرق المشاركة بيكون مدته 3 شهور بيكون فيه أنشطة لتوجيه الفرق وتدريبها على يد خبراء متخصصين، ده بالإضافة لتقديم جلسات لبناء قدرات الفرق وتخصيص موجهين وخبراء محترفين لكل فريق في مجال عمله ووفقًا لاحتياجاته علشان يقدروا يحولوا الخطط اللي هما حطينها لواقع عملي.

طيب نتكلم بقى عن خطوات التقديم للبرنامج، أولًا بيتم الإعلان عن فتح باب التقديم للبرنامج على الموقع الإلكتروني للمبادرة وصفحاتها على وسائل التواصل الاجتماعي، بعد كده بيكون متاح لرواد الأعمال إنهم يملوا الاستمارة الموجودة على الموقع واللي ممكن تلاقوها على اللينك ده (http://www.startegypt.com/ar/arsheet).

بعدها بتيجي خطوة فرز الطلبات والتواصل مع اللي تم اختيارهم وتنظيم مقابلات معاهم علشان يتعرفوا عليهم بشكل أعمق وليه عايزين يؤسسوا شركاتهم ومدى معرفتهم بالسوق اللي عايزين يدخلوه وإيه هي المشكلة اللي هما عايزين يحلوها، وعلشان تقدر تعدي الخطوة دي اتأكد إن فكرتك مستوفية الشروط دي:

- فكرة واضحة وليها نموذج أولي، بمعنى إن رائد الأعمال يكون عارف طريقة تنفيذها وعنده خطة واضحة ومنطقية لتنفيذها.

- تكون ليها تأثير إيجابي على المجتمع، وتابعة لفرع من الفروع الثمانية اللي بتدعمها المبادرة واللي قولناهم فوق.
- تكون فكرة مبتكرة وبتحل مشكلة ملموسة.
- يكون فريق العمل اللي شغال عليها مكون من 2 أو أكثر.
- يكون المشروع هادف للربح بجانب خدمته للبيئة والمجتمع.

لو فكرتك مطابقة للمواصفات دي هتقدر تدخل البرنامج التدريبي، وهيكون عندك فرصة كبيرة للاستفادة من مدربين مصريين وأجانب، وكمان ممكن تبدأ تشبك وتتعاون مع مستثمرين في المجال الخاص بمشروعك بعد ما تكون قدرت تبلور فكرتك بشكل أفضل وبالتالي تتنقل بيها لمراحل أعلى ومتقدمة.

وكمان لو فكرتك كانت مميزة بيكون متاح لك في حفل التخرج أو منتدى "مصر تبدأ" السنوي إنك تدخل مسابقة من 5 مراكز بياخد فيها المركز الأول مبلغ 100 ألف جنيه، والمركز الثاني مبلغ 50 ألف جنيه، والمركز الثالث مبلغ 20 ألف جنيه، والمركز الرابع 10 آلاف جنيه، والمركز الخامس 10 آلاف جنيه.

ونقدر نقول إن من أبرز مميزات المبادرة دي هي إنها مجانية وغير هادفة للربح وإنها بتوفر بدل مواصلات لسكان الأقاليم علشان تشجع الشباب على التقديم فيها وتحويل أفكارهم لمشروعات ناشئة، وكمان هي بتحط رواد الأعمال على الطريق الصح لأنهم بعد ما بيخلصوا البرنامج بيكونوا مؤهلين إنهم يتعاملوا مع شركات الاستثمار في المشروعات الناشئة على اختلاف أشكالها واللي بتوفر ليهم تدريبات متقدمة وتمويل علشان مشروعاتهم تكبر وده كله في مقابل الحصول على نسبة من شركاتهم الناشئة، وده اللي هنتكلم عنه في الحلقات الجاية.

 

شارك المقال :