مجموعة هائل سعيد .. إمبراطورية يمنية عمرها 75 سنة ج2

زى أى بداية طبيعية لأى بيزنس واجهت مجموعة هائل سعيد مشاكل كتير وكانت فى ظروف صعبة منها عدم توفر العملة الأجنبية لإستيراد الخامات اللازمة للعمل وكان ده أحد العوامل اللى دفعت المجموعة للإتجاه للعمل خارج اليمن .

تانى مشكلة كانت عدم توفر العمالة الماهرة وخصوصا العمال اللى بيتعاملوا مع المعدات وصيانتها وكانت النتيجة الطبيعية هو تحقيق مجموعة هائل لخسائر كبيرة فكان الإتجاه للإهتمام بالمورد البشرى وتدريب العمال فى شركات أجنبية وتأهيلهم ورفع مستواهم وكمان معرفة ميولهم وتوجيههم ليها بما يتوافق مع احتياجات العمل .

كمان مهم إننا نعرف أن مجموعة هائل سعيد اعتمدت أسلوب فى الإدارة قائم على الاهتمام بالأجيال القادمة من خلال الإهتمام بتوفير فرص عمل لليمنيين وده كانت ناتج من احساس المجموعة الكبير بالمسئولية الإجتماعية غير كمان المشاركة فى البرامج الهادفة لحماية البيئة والأفراد والمجتمعات اللى بتتواجد فيها المجموعة وتقديم المبادرات الإجتماعية فى اليمن من خلال مؤسسة السعيد للعلوم والثقافة.

الحاجة الملفتة للنظر فى قصة مجموعة هائل سعيد الإقتصادية هو وضع المجموعة لخطة توريث ل25 سنة قادمة على الرغم من حساسية الموضوع بالنسبة للمجتمع العربى واللى بعض الأوقات بيوصل للمحرمات لكنهم طرحوا الموضوع للنقاش ورؤيتهم واضحة هو تأهيل أفراد العائلة وتدريبهم بالقدر الكافى لتحمل المسئولية دى والحفاظ على نفس القيم اللى اشتغل بيها الجيل الأول والتانى والتالت .

فى سنة 2013 تم الإحتفال باليوبيل الماسى للمجموعة كأحد أكبرالكيانات الإقتصادية بإجمالى عدد موظفين 35 ألف موظف بصورة مباشرة أو غير مباشرة وبيخدموا أسواق أكثر من 40 دولة فى مناطق الشرق الأوسط والشرق الأدنى وفى قارات أفريقيا وآسيا وأوروبا و المجموعة بتضم 87 شركة قيادية فى مختلف أنحاء العالم .

ده غير إن المجموعة بتمتلك محفظة من الإستثمارات الدولية ووصلت صادراتها من المنتجات الإستهلاكية السريعة الحركة لأكثر من 80 دولة حول العالم ومجموع أصول 10 مليار دولار .

يتبقى إننا نعرف إن أحد أهم العوامل اللى ساعدت على توسع مجموعة هائل سعيد بالشكل الكبير ده كان السمعة الطيبة من خلال الإلتزام فى التعاملات المالية مع الموردين فى التوقيتات المتفق عليها مهما كانت التكاليف وده اللى خلى المجموعة تحصل على تسهيلات وتمويلات من البنوك بشكل ساعدهم على النمو .

وزى ما عبد الجبار هائل سعيد الرئيس التنفيذى للمجموعة بيذكر إن أحد عوامل نجاح المجموعة هى القيم اللى اتربوا عليها زى الصدق والأمانة و الوفاء و التواضع وحسن التعامل مع الآخرين والوفاء بحقوقهم والتسامح وفهم طبيعة العمل .

نتمنى إننا نشوف نماذج عربية وكيانات إقتصادية كبيرة بنفس القوة ونفس حجم النجاح ده وربنا يوفق الجميع