أى فريق عمل وهو بيتكون أيا كان حجمه أو طبيعته بيمر ب 4 مراحل رئيسية ومهم جدًا نتعرف عليهم علشان نعرف نكون فريق عمل أو حتى لو احنا جزء من فريق العمل نتعلم نتفاعل صح .

أولا مرحلة الإنشاء Forming ودي بتبقي عاملة زى الخطوبة كدة الكل مؤدب الكل إيجابي البعض بيبقي متوتر لأنه مش عارف هايعمل ايه كويس والبعض متحمس لبداية جديدة .

من المهم إن قائد الفريق يحاول يعرف الفريق على بعضه يحاول إنه يشرح كويس طبيعة الشغل بعد كده لأن مهام الفريق لسه مش واضحه مع الفريق.

ثانيا مرحلة الاقتحام Storming ودي المرحلة اللى معظم فرق العمل بتفشل فيها ودى بيظهر فيها الاختلاف الكبير بين أعضاء الفريق لأن كل واحد جاي من بيئة عمل أو من خلفية ثقافية مختلفة عن التانى وفيها بقى بيظهر إن بعض الناس بيقاوم المهام اللي واخدها والبعض بيحاول ياخد صلاحيات أكبر من المحددة وهكذا ودى مرحلة فيها خناقات وشد بين أعضاء الفريق وقائدهم أو بينهم وبين بعض ولازم المدير أو قائد المجموعة يبقى حازم وفي نفس الوقت بيعرف كل واحد مهامه وبيحفظهاله كويس وبرضه غالبًا علشان الفريق يكمل ويشتغل صح لازم يتم استبعاد واحد أو اتنين فى المرحلة دى علشان مايأثرشى علي الفريق بعد كدة .

ثالثا مرحلة وضع القواعد Norming دلؤقتى الفريق اتعرف ببعضه وبدأ كل واحد يبقى واخد علي التانى شوية وممكن كمان يكون خرج معاه اتغدوا وفطروا سوا وبدأوا يساعدوا بعض ويقفوا جنب بعض ويطلبوا المساعدة من بعض ودى مرحلة وضع قواعد صارمة والبداية على التعرف على الأهداف (فيه فرق بين المهام والأهداف)

رابعا مرحلة الأداء والتألق Performing دى بقى مرحلة تحقيق الأهداف ومرحلة إن الفريق يشيل شغل تقيل من غير ما يشتكى ولا يظهر فيه تضارب فى المهام والفريق فى الوقت ده بيتحرك كفريق مش كأفراد .

المشكلة إن نتيجة الجهل وغياب المعلومة بنلاقى فرق بتتكون وصاحب القرار عايزهم ينطوا للمرحلة الرابعة من غير ما يمروا بال3 مراحل الأولانية وده بيقود للفشل فلازم نبقى فاهمين طبيعة تكوين الفرق وامتى نطلب منها نتائج وامتى تبقى النتائج دى باهرة.