920033973
16342
article

مشاكل الشراكة مع الاصدقاء

November 14, 2019    

تعين واحد صاحبك عندك في الشغل ولا لأ؟

لو انت مدير وعندك وظيفة فاضية وبتدورلها على حد وقدامك صاحبك وعشرة عمرك وبتفكر تشغله، فلازم تسأل نفسك الأول يا ترى ده هيكون شيء كويس ولا لأ؟ في حد ممكن يجاوب ويقول طبعا مفيش أحسن من كده وتحس إن أغنية صاحبي اللي كتفه في كتفي بقت شغالة في الخلفية وهو بيتكلم، بس الحقيقة إن الواقع مش كده على طول الخط.

أكيد طبعا إنك تشتغل مع صاحبك أو قريبك هتبقى ضامن إنك هتعرف تتعامل معاه وإنه هيكون سند ليك في الشغل خاصة لو مريتو بظروف صعبة سوا وعارفين طباع بعض كويس، بس الصحوبية وعشرة العمر حاجة وإن العلاقة ما بينكو تتحول لعلاقة مدير بموظف دي حاجة تانية خالص، وعشان كده قبل ما تقرر تعين صاحبك معاك في الشغل لازم تجاوب على شوية أسئلة أهمها هل صاحبك ده هيكون له بصمة وإضافة في الشغل ولا لاء؟

إحنا في كلامنا مش بنحاول نخوفك كمدير إنك تعين حد من أهلك أو صحابك معاك، ولكن بنقولك حط في بالك بعض الاعتبارات قبل ما تقرر تاخد قرار التعيين، ومن الاعتبارات دي:

• لو مش هتعرف ترفضه متعينهوش: لازم تحدد مع نفسك الأول هل لو جت لحظة وحسيته مش مناسب للوظيفة هتقدر تقوله أنا مش هاينفع أشغلك معايا؟، لو مش هاتعرف تقوله لاء، اعرف إن الموضوع ده هيفشل لأن غالبا مش هتقدر تديره بعد ما يبقى في فريق عملك، ممكن طبعا ده يسبب بعض الزعل بين وبين صديقك لكن في النهاية لو قرر يقاطعك فعلا فاعرف إن قرارك كان صح لأنه مع أول قرار منك كمدير له كان هيقلب وشه عليك.

• هل هو مؤهل للوظيفة ولا لاء؟: لو صديقك مؤهل للوظيفة فمفيش مشكلة، بلغه بس إنك بتتوقع منه إنه يبذل أقصى جهده في الشغل، بس لو الوضع بالعكس فخليك متأكد إنك مش هتقدم لشغلك أي خدمة بتوظيفك لأخوك أو صاحبك اللي مش هيعرف يؤدي الشغل المطلوب منه، بالإضافة إنك ممكن تأذيه هو نفسه لأنه هيعاني من ضغوط كتير عليه، ده غير إن عدم كفاءته ممكن تغضب بقية الموظفين عندك لأنهم هايبقوا عارفين إنه متعينش إلا بسبب ارتباطه بيك.

• وظفه عشان محتاجه مش عشان بتعمله خدمة: فلنفترض مثلا إن مراتك قعدت تزن عليك عشان تعين أخوها ولما عينته الولد عمل مشاكل كتير ومبقتش عارف تعمل معاه إيه، هل تمشيه فتزعل مراتك ولا تقعده فتدمر شغلك، الموقف ده كان ممكن ميحصلش لو كنت عينته عشان فعلا محتاجه مش مجرد بتعمل خدمة له ولمراتك، لذلك اوعى تدخل الشغل في الأمور الشخصية وبالطريقة دي هتقدر تبعد عن الدراما الشخصية اللي ملهاش لازمة.

• هل هو جدير بالثقة فيه؟: كل ما كنت قريب من الشخص اللي بتحاول تعينه كل ما هتحس إن مسألة الثقة مش قضية كبيرة يعني خصوصا لما تبقى عارف الشخص كويس، في أحسن الظروف ممكن متبقاش فعلا مشكلة، بس لو انت عارف إن في "مشاكل" متعلقة بالثقة ممكن تظهر في الشخص ده فحاول إنك تتجنب توظيفه، فعلى سبيل المثال ممكن يكون صديقك ده اتقبض عليه قبل كده بتهمة السرقة، وعلى الرغم إنك ممكن تستبعد فكرة إنه هيختلس منك مثلا ولكن بيكون من الأفضل إنك تاخد حذرك منه.

• اختبره الأول: مش شرط عشان فلان صديق جيد ليك ده معناه إنه هيكون موظف جيد، ممكن يكون كسول أو بطيء أو غير أمين، وعشان كده حط لنفسك سيناريوهات مختلفة وأسأله عن شعوره لو المواقف ده حصلت فعلا زي مثلا لو خدت قرار عكس قراره، أو لو اديته رد فعل سلبي عن شغله، أو لو رفضت زيادة في مرتبه، أو لو انتقدته علنا قدام فريق العمل.

المواقف دي كلها ومعرفتك رد فعله عليها هيساعدك على تحديد ازاي ممكن تعامله كمدير وليس كصديق له، ولو حسيت إنك مش هتقدر تتعامل معاه، فمن الأفضل إنك تنهي الموضوع قبل ما يبدأ.

الخلاصة كمدير أو حتى كموظف بتبقى دايما حابب إن بيئة العمل تبقى كلها تعاون وحب وعمل جماعي جيد بين زملائك، وأكيد إنك توظف حد تعرفه ده ممكن يبقى شيء مميز جدا وله فوائد كتير خاصة لو كان الشخص ده أد المسئولية والثقة فيه وكفؤ ومناسب للوظيفة، بس حط في بالك الأول الاعتبارات اللي قولنا عليها واللي ممكن تساعدك تاخد قراراك لو انت بتمر بموقف زي ده.

خصم 50% عند الإشتراك في أكاديمية إعمل بيزنس


مقالات مشابهة

المزيد
7 علامات يستوجب معها الانفصال عن شريك العمل و 7تخبرك أن تبقى
7 علامات يستوجب معها الانفصال عن شريك العمل و 7تخبرك أن تبقى

تتشابه شراكة العمل مع الزواج، فكلاهما ينظمهم إطار من

لماذا تفشل الشركات في إنجاح عمليات الاندماج والاستحواذ
لماذا تفشل الشركات في إنجاح عمليات الاندماج والاستحواذ

تسعى الشركات في كثير من الأحيان إلى الاندماج

أين تحصل على شريك لمشروع
أين تحصل على شريك لمشروع

  الكثير ممن يرغبون في بدء مشروعاتهم يحاولون البحث

الأكثر قراءة

المزيد
توزيع حصص الملكية وتوزيع الأرباح
توزيع حصص الملكية وتوزيع الأرباح

فيه موضوع مهم جدًا لازم يعرفه اللى عايز يعمل مشروع

كيف تختار الشريك في البيزنس
كيف تختار الشريك في البيزنس

تحذير .. 6 علامات هتعرفك أنك هتشارك الشخص الغلط! واحد

صاحب الفكرة وصاحب رأس المال
صاحب الفكرة وصاحب رأس المال

أحيانا بيكون فيه حد عنده فكره وخبره في مشروع معين بس

زى الفريك وعاوز شريك - ج1
زى الفريك وعاوز شريك - ج1

موضوع مهم جدًا ولازم ناخد بالنا منه عند بداية المشروع

الخطوبة أولاً
الخطوبة أولاً

أفضل شراكة حصلت معايا كان فيها 3 شهور خطوبة  طيب هو

زى الفريك وعاوز شريك - ج3
زى الفريك وعاوز شريك - ج3

  محتاجين اننا نوضح بعض النقط الخاصة بالشراكة

أين تحصل على شريك لمشروع
أين تحصل على شريك لمشروع

  الكثير ممن يرغبون في بدء مشروعاتهم يحاولون البحث

زى الفريك وعاوز شريك - ج2
زى الفريك وعاوز شريك - ج2

بعد ماعرفنا عناصر المشروع فى الحلقة الاولى من الشراكة

أول شركة فتحتها
أول شركة فتحتها

أول شركة فتحتها كانت سنة 1998 وكان عندى 21 سنة ونظرًا لقلة