FB Instagram Twitter Youtube Linkedin مطعم "السكتة القلبية".. وأفكار خارج الصندوق | أكاديمية اعمل بيزنس
 
الرجوع الى المدونة

مطعم "السكتة القلبية".. وأفكار خارج الصندوق

مطعم

عندك الطموح والحماس إنك تبدأ البيزنس بتاعك ومش عايز تشتغل عند حد تاني أكتر من كده، بس مش عارف أو مش لاقي الفكرة اللي تحقق بيها طموحاتك؟ خايف إنك تختار مشروع ويفشل؟ أو مش عارف توصل أساسا لفكرة المشروع اللي هتبدأ بيها البيزنس بتاعك؟

خلينا النهاردة نتكلم عن الفكرة الناجحة.. إزاي أقدر أوصل لفكرة مشروع ناجحة وأضمن بنسبة كبيرة استمرار البيزنس بتاعي؟

في طرق وآليات كتير ممكن تساعدنا إننا نوصل لفكرة مشروع ناجحة، بس الجوهر الأساسي وسر النجاح الأول هو "الفكرة غير المتوقعة".

بيحصل كتير إننا بنستقبل رسايل عادية من شركات ومؤسسات، مافيهاش أي عنصر جذب، وبالتالي بتمر علينا مرور الكرام من غير ماتلفت انتباهنا أو نفكر فيها، وعشان كده أول حاجة هتساعدني إني أضمن نجاح فكرتي في جذب انتباه العملاء والاستحواذ على اهتمامهم أطول فترة ممكنة هي إن المشروع تكون فكرته جذابه وخارجه عن المألوف، يعني مش عايزين نفكر بره الصندوق زي ما بيقولوا ..إحنا عايزين ننسف الصندوق من الأساس.

ومهم قوي هنا إننا نبقى عارفين إن العقل البشري متبرمج على إنه يلقط الفكرة الخارجة عن المألوف ويلاحظ التغيير، وبالتالي أي فكرة غريبة وجديدة هتحقق عنصر المفاجأة وهتجذب انتباه العملاء بتوعك، وخلينا ندي هنا مثال عملي للكلام ده:

أمريكا مفيش فيها أكتر من مطاعم البرجر، ورغم كده في مطعم قدر إنه يدخل السوق وينافس وينجح، لأن فكرة عرض المنتج وديكور المكان كان غير متوقع.

المطعم ده اسمه السكتة القلبية The Heart Attack Grill، وهو الفعل كسر كل الأنماط التقليدية بداية من إعلانه الصريح إنه بيقدم أصناف أكل مرتفعة السعرات الحرارية عكس الاتجاه المنتشر في الفترة الأخيرة من مطاعم بتتجه لتقديم الأكل الصحي.

كمان بيتيح المطعم ده للناس إنهم يعيشوا تجربة مختلفة في الأكل من خلال إنهم بيلبسوا ملابس نزلاء المستشفى وهما داخلين، والكراسي في المطعم عبارة عن كراسي متحركة، والعاملين بيلبسوا لبس الممرضين، وأدوات الأكل شبه الأدوات الطبية.

وبغض النظر عن غرابة الفكرة، لكنها نجحت قوي في أمريكا، لأنها كانت غير متوقعة ومختلفة تماما عن كل المطاعم التقليدية اللي بتقدم البرجر هناك.

وبالإضافة لعنصر الفكرة غير المتوقعة، في مجموعة آليات تانية بتساعد في الوصول لفكرة ناجحة زي:

 

1- تحول هوايتك لمشروع:
من أنجح الأعمال اللي بيكون ليها مستقبل كويس، لو عندك هواية ومتمكن فيها، تبدأ تطورها وتحولها للبيزنس الخاص بتاعك، لأن حبك للهواية ديه من الأول هيخليك دايما مبدع في شغلك، وعندك قوة إرادة إنك تواجه العقبات وتكمل.

 

 

2- توفير السلعة اللي إنت محتاجها:
لو مرة دورت على منتج أو خدمة ومالقتهاش، فتأكد إنك مش إنت الوحيد اللي محتاج المنتج ده، اعتبر ده بداية مشروع ناجح لمنتج أو خدمة الناس فعلا محتاجلها ومش لاقياها.

 

 

3- حل مشكلة بتواجه الناس:
شوف سوق معين أو مجال الناس بتواجه فيه مشكلة، وخلي مشروعك هو اللي يقدم حل المشكلة ديه.

 

 

4- دور على سوق جديد:
شوف سوق جديد أو ناشئ، محدش قبلك دخله أو بدأ فيه، دايما كونك الأول في مجالك بيديلك ميزة تنافسية حتى بعد ما يظهر ناس تقلد منتجك بعد كده

 

شارك المقال :