FB Instagram Twitter Youtube Linkedin "ملائكة الأعمال" ... أفضل من يمول المشروعات الناشئة | أكاديمية اعمل بيزنس
 
الرجوع الى المدونة

"ملائكة الأعمال" ... أفضل من يمول المشروعات الناشئة

تعتبر خطوة حصول أي رائد أعمال على تمويل لمشروعه الناشئ سواء في مرحلة التأسيس أو حتى بعد ما يبدأ..من المراحل الصعبة اللي بتحتاج تحضيرات كتير، علشان كده مهم إن أصحاب المشروعات يختاروا نوع التمويل الأنسب ليهم لأنهم بكده هيقدروا يحصلوا عليه بسهولة ويكملوا حلمهم.

ومن ضمن طرق التمويل المتميزة اللي أثبتت فعاليتها في تقديم الدعم المالي والمؤسسي للمشروعات الناشئة هنلاقي "الاستثمار الملائكي" اللي فكرته قائمة على توفير الخبرات ورأس المال اللازم لتأسيس الشركات في مراحلها الأولى، من غير تقييد رائد الأعمال بالتزامات وضمانات كتير.

وعادة بيكون المسئول عن النوع ده من التمويل أفراد مش شركات وبيطلق عليهم اسم "ملائكة الأعمال" لأنهم مش بيترددوا في تمويل المشروعات الجديدة المبدعة والحصول على أسهم فيها، رغم إن احتمالات فشلها بتكون عالية قوي وبتتراوح ما بين 60% إلى 80%، وده معناه إنهم ممكن يفقدوا الأموال اللي خصصوها للاستثمار في الشركات دي.

ودي حاجة ممكن ناس كتير ما تصدقهاش لكن الحقيقة إنه هو ده فعلًا اللي بيعملوه ملائكة الأعمال، وهما فعليًا مش بيخسروا لأنهم عادة مش بيتبنوا تمويل مشروع واحد بمبلغ ضخم، لا هما بيختاروا عدد من المشروعات الناشئة وبيقدموا لكل واحد فيهم تمويل مناسب وبيكونوا حاطين احتمالية إن بعضهم ممكن يفشل، ومن الناحية التانية هنلاقي إن المشروعات اللي بتنجح بتحقق أرباح ضخمة جدًا ممكن توصل لـثلاثين ضعف اللي اتصرف عليها.

وده بيفسر لينا ليه الاستثمار الملائكي بقى في السنوات الأخيرة مجال ناجح جدًا وبيتم ضخ أكثر من 50 مليار دولار سنويًا فيه على مستوى العالم، ودي حاجة بتنعكس بالإيجاب على الاقتصاد بشكل عام، وريادة الأعمال بشكل خاص لأنها بتشجع الشباب على إنهم يأسسوا مشروعاتهم الخاصة، وده معناه خلق فرص عمل كتير وتعزيز المنافسة والابتكار في السوق.

ونقدر نقول إن الميزة الكبيرة اللي بيتمتع بيها الاستثمار الملائكي بالنسبة لرواد الأعمال هي إنه يعتبر بديل أفضل ليهم من القروض البنكية، لأنه أسهل وأقل خطورة عليهم، علشان القروض بتحتاج ضمانات كتير وفي حال فشل المشروع بيكون مطلوب منهم سداد رأس المال اللي أخدوه لكن ده مش موجود مع ملائكة الأعمال.

ولما بنتكلم عن الاستثمار الملائكي لازم نوضح الفرق بينه وبين رأس المال المغامر، لأن في ناس كتير بتخلط بينهم خاصة إن الاثنين بيستهدفوا تمويل رواد الأعمال وبيتم الوصول ليهم من خلال المؤتمرات والندوات الخاصة بالمستثمرين، لكنهم في الحقيقة هما مختلفين في مجموعة نقاط، هي:

- رأس المال المغامر بيقف وراه شركات ومؤسسات مملوكة لمجموعة من المستثمرين المحترفين اللي عندهم خبرة في عمليات تمويل الشركات وتأسيسها واللي ممكن يكونوا بيستثمروا أموالهم أو أموال غيرهم.

لكن الاستثمار الملائكي بيعتمد غالبًا على فرد واحد بيمتلك ثروة وبيستثمر جزء من فلوسه في المشروعات الناشئة وعادة بيكون رائد أعمال سابق وبيتمتع بحس المغامرة، وعنده رغبة في مواكبة التطورات اللي بتحصل في صناعة معينة أو في توجيه جيل جديد من رواد الأعمال.

- يميل رأس المال المغامر للاستثمار في الشركات الواعدة في مراحلها الأولية والشركات الموجودة بالفعل اللي بتمتلك قيمة سوقية عالية وإمكانيات للنمو في المستقبل وده علشان يقللوا خطر خسارة أموالهم.

أما الاستثمار الملائكي فهنلاقيه بيركز أكتر على تمويل الشركات الناشئة وهنلاحظ إن ملائكة الأعمال عندهم حس مخاطرة أعلى وبيختاروا المجالات اللي بتكون ضمن إطار اهتماماتهم واللي شايفين إنها مُربحة، علشان كده بننصح رواد الأعمال في بداية تأسيس مشروعاتهم إنهم يستهدفوا ملائكة الأعمال، وبعد ما يثبتوا وضعهم في السوق ويحتاجوا يتوسعوا يدوروا على رأس المال المغامر.

- قيمة التمويل المتاح لرواد الأعمال في رأس المال المغامر بتختلف عن الاستثمار الملائكي، وده بينعكس على توزيع عائدات الاستثمار، فهنلاقي إن رأس المال المغامر بيقدم رؤوس أموال أكبر ممكن توصل لملايين الدولارات وبالتالي بيتوقع عائد استثماري بيتراوح ما بين 25% و35% من المشروع، لكن الاستثمار الملائكي بيقدم تمويلات أقل بتكون بالآلاف وبالتالي عائداته بتكون بين 20% و25%.

- من الفروقات الواضحة كمان بين رأس المال المغامر والاستثمار الملائكي هي الدور اللي بيلعبه المستثمر في الحالتين في مقابل تمويله للمشروع، يعني في الحالة الأولى هنلاقي المستثمر حريص على إنه يلعب دور في إدارة الشركة والحصول على مقعد في مجلس إدارتها.

أما في الحالة الثانية هنلاحظ إن ملائكة الأعمال بيفضلوا ياخدوا مناصب إدارية غير تنفيذية أو إنهم يلعبوا دور المرشدين مع رواد الأعمال وده من خلال تقديم اقتراحات ليهم حول أفضل الطرق لإدارة مشروعهم وكمان مساعدتهم في اتخاذ القرارات وتكوين شبكات قوية مع القوى الفاعلة في مجالهم.

دلوقتي وضحنالكم فكرة الاستثمار الملائكي، والفرق بينه وبين رأس المال المغامر، وعرفت إمتى تختار ده أو ده، عشان لو إنت رائد أعمال وبتأسس شركتك يبقى قدامك طريقة تساعدك تكمل حلمك ومشروعك.

شارك المقال :