920033973
16342
article

مميزات أجازة الابوة

December 03, 2019    

ليه تدي الرجالة إجازة ابوة مدفوعة الأجر؟

أعلنت شركة فودافون مع بداية شهر نوفمبر إن كل الموظفين بتوعها في جميع أنحاء العالم – من ضمنهم مصر- هيكون متاح لهم الحصول على إجازة أبوة مدفوعة الأجر بالكامل مدتها 16 أسبوع، والإجازة دي جزء من السياسة العالمية اللي ابتدت فودافون تتبناها والمصممة لمساندة كل العائلات في تقضية وقت أكتر مع أطفالهم حديثي الولادة من غير ما يكونوا خايفين من تأثير ده على حالتهم المادية أو الوظيفية.

المتعارف عليه إن عادة الأمهات هما اللي بيحصلوا على النوع ده من الإجازات، لكن الجديد اللي بتقدمه فودافون إن الإجازة دي هتكون مقدمة كمان للرجال بحيث أن أي موظف هيستقبل طفل جديد أو هيتبناه أو هيحصل عليه من خلال أم بديلة، هيكون عنده مرونة في إنه ياخد إجازة ممكن توصل ل16 أسبوع إجازة مدفوعة الأجر وده في خلال أول 18 شهر من الحصول على الطفل.

ومش بس كده كمان، الموظفين اللي هيرجعوا من إجازة الأبوة دي هيكون عندهم الحق في الشغل بس لمدة 30 ساعة أسبوعيا مدفوعة الأجر بدل من الشغل 40 ساعة لمدة 6 شهور كمان.

إجازة الأبوة اللي بتقدمها فودافون هتكون متاحة على نهاية مارس 2021 لكل الآباء بغض النظر عن نوعهم أو ميولهم أو مدة خدمتهم في الشركة وده لكل المناطق والأسواق ال24 اللي فودافون بتقدم خدماتها وعملياتها فيها سواء في أفريقيا أو الشرق الأوسط أو أوروبا أو الولايات المتحدة.

فودافون من خلال الخطوة دي بتدعم السياسة الصديقة للعائلة FAMILY-FRIENDLY POLICY اللي بتمتلكها، وهي مثال لازم يتم الاحتذاء بيه في ظل إن كتير من الآباء والأمهات على مستوى العالم بيعانوا من عدم وجود السياسات دي اللي ممكن تساعد في تحقيق التوازن بين العمل والحياة الأسرية، والحقيقة إن الاستثمار في السياسيات دي هيقدم فوائد كتيرة للموظفين والشركات والاقتصاد بشكل عام ومنها على سبيل المثال:

• سياسة فودافون المحايدة دي على سبيل المثال هتساهم في زيادة عودة السيدات للعمل بعد إجازة الأمومة لأنها بتساهم في توزيع أدوار الرعاية والمسئوليات بين الأب والأم وبالتالي ممكن تقلل من احتمالية تسرب النساء من العمل وكمان الفارق اللي بيحصل في المرتبات بسبب ابتعاد السيدات عن عملهم لفترة طويلة هيقل.

• في دراسة اتعملت من باحثين بجامعة دالاس الأمريكية على 150 منظمة في كوريا الجنوبية في الفترة من 2005ل2009 وده عشان يشوفوا تأثير وجود سياسة صديقة للعائلة على أداء الشركات وكانت النتيجة إن وجود سياسة صديقة للعائلة لها تأثير قوي على زيادة إنتاجية الموظفين في الشغل.

• ده غير إن تقديم سياسة صديقة للعائلة في الشركة هيساعد في زيادة الاحتفاظ بالموظفين وانخفاض نسب التغيب عن الشغل وتقليل تكاليف عمليات التوظيف والتعيين، ده بالإضافة إنها هتمكن الآباء العاملين وخاصة الأمهات من التقدم في حياتهم المهنية واللي في المقابل هتساعد في زيادة اندماج الموظفين في الشركة ورفع معنوياتهم وولائهم اتجاهها.

• كمان وجود سياسة صديقة للعائلة هيخلي الشركة قدرتها أكبر على المنافسة من خلال قدرتها على جذب كل المواهب ليها دون استثناء أو تمييز وده بالتأكيد هينعكس على تحسين صورة العلامة التجارية للشركة في نظر الموظفين وكمان العملاء.

• وعلى المستوى الاقتصادي، فوجود خدمات رعاية للطفل والعائلة ده هيمكن المرأة من إنها تحافظ على مشاركتها في سوق العمل وفي مستقبل عيلتها وكمان في عالم الاقتصاد والأعمال، فعلى حسب تقرير McKinsey لسنة 2015 فالمشاركة المتساوية للمرأة في القوى العاملة ده هيضيف حوالي 12 تريليون دولار على الاقتصاد العالمي بحلول العام 2025.

وعشان تضمن إن بيئة العمل في شركتك صديقة للعائلة، فمنظمة اليونيسيف بتنصح بمجموعة طرق ممكن تعملها وتقدر من خلالها تخلق بيئة عمل صديقة للعائلة وهما:

1. لازم تضمن إن مفيش أي تمييز بيحصل ضد المرأة بناء على حملها أو أمومتها أو تحملها لمسئولياتها العائلية، وإن الحاجات دي ميكونش لها تأثير على وظيفتها أو أجرها أو فرص الترقي الوظيفي بتاعها، يعني مثلا مترفضش تعين واحدة عشان أم أو تسرح موظفة عشان حامل.

2. اسمح بوجود إجازة رعاية طفل مدفوعة الأجر عشان الأب والأم يقدروا يقضوا وقت مناسب مع طفلهم حديث الولادة.

3. سهل على الأمهات إرضاع أطفالهم من خلال السماح بوجود بريك مدفوع الأجر للرضاعة وتخصيص أماكن يكون سهل للأمهات إرضاع أطفالهم فيها.

4. ادعم وجود حضانة لرعاية الأطفال جيدة ومناسبة ماديا للآباء بحيث إن الأطفال دول يقدروا يحصلوا على تعليم مبكر ويطوروا المهارات اللي هيحتاجوها عشان يوصلوا لأقصى إمكانياتهم، وقانون العمل المصري عندنا بيدعم النقطة دي بحيث انه بيلزم أصحاب العمل اللي بيشغلوا اكتر من 100 عاملة في مكان واحد بأنهم ينشئوا حضانة للأطفال أو يتفقوا مع دار حضانة تهتم برعاية أطفال العاملات دول.

5. خلي فيه مرونة في مواعيد العمل من خلال تطبيق سياسة العمل من المنزل مثلا وغيرها من السياسات المرنة.

6. بالإضافة للالتزام بكل القوانين، بيفضل تحسين ظروف العمل من خلال توفير أجور تتناسب مع تكلفة معيشة الأسرة.

7. تشجيع كل ممارسات التربية الإيجابية مع الموظفين من خلال تطوير حملات توعية وتدريب بتركز على أهمية تنمية الطفولة المبكرة.

8. نشر وترويج السياسات الصديقة للعائلة مع كل الموردين والموزعين وكل شركاء العمل اللي بتتعامل معاهم.

الخلاصة كون إن شركتك أو مشروعك يقدم سياسات صديقة للعائلة زي فودافون ما بتحاول تعمل، اعرف إن ده ممكن يساعدك في تحسين إنتاجية الموظفين واندماجهم وكمان في قدرة الشركة على جذب كل المواهب ليها دون استثناء وتحفيز والاحتفاظ بالعنصر البشري المتميز جواها.

 


مقالات مشابهة

المزيد
كيف تتغلب على مشكلة التحرش في أماكن العمل
كيف تتغلب على مشكلة التحرش في أماكن العمل

التحرش في أماكن العمل.. جرائم مسكوت عنها إحساس القلق

وظيفة 24 ساعة
وظيفة 24 ساعة

الوظيفة بدوام كامل أو الـ full-time ببساطة عبارة عن اتفاق

5 ساعات شغل يوميا ..هل ممكن تبقى كفاية؟
5 ساعات شغل يوميا ..هل ممكن تبقى كفاية؟

موظف بيصحى ستة الصبح يلبس بسرعة، وينزل جري عشان يلحق

السلامة النفسية لفرق العمل.. ضرورة مش رفاهية
السلامة النفسية لفرق العمل.. ضرورة مش رفاهية

ساعات بيحصل لناس كتير مننا في أماكن شغلهم إنه يكون

الأكثر قراءة

المزيد
مراحل ترقي الـ HR: من HR Coordinator ل HR Director
مراحل ترقي الـ HR: من HR Coordinator ل HR Director

تعتبر وظيفة الـ HR واحدة من الوظائف المطلوبة بقوة في

أفضل 6 أفلام عن البيزنس لرواد الاعمال
أفضل 6 أفلام عن البيزنس لرواد الاعمال

يمكن الهدف الأساسي اللي بيخلينا نشوف فيلم أو مسلسل هو

التعليم في الصغر كالنقش على الحجر
التعليم في الصغر كالنقش على الحجر

طول الوقت كنا بنسمع من أهلنا مقولة بتقول “التعليم

شركات تنافس اوبر وكريم
شركات تنافس اوبر وكريم

بتعتبر شركة اوبر وكريم من الشركات الناجحة فى السوق

"ماكدونالدز" و"برجر كينج".. الصراع على عرش البرجر

في مايو اللي فات، قدمت سلسلة مطاعم "برجر كينج" 5 وجبات

ليه كورسات أكاديمية إعمل بيزنس أون لاين ؟
ليه كورسات أكاديمية إعمل بيزنس أون لاين ؟

    لاحظنا تزايد أسئلة الأعضاء بخصوص إن ليه

اسباب فشل الشركات الناشئة
اسباب فشل الشركات الناشئة

عالم ريادة الأعمال عالم كبير شبيه بالمدرسة أو الجامعة

تطبيقات مهمة للبزنس
تطبيقات مهمة للبزنس

تطبيقات مهمة للبزنس.. على موبايل أي رائد أعمالمن

بطريقة سهلة ... ازاي تكتب إميل احترافي 
بطريقة سهلة ... ازاي تكتب إميل احترافي 

    كتابة إميل بشكل احترافي بتعتبر من الأساسيات