FB Instagram Twitter Youtube Linkedin من الإنبوكس.. أنا اكتشفت ليه مديري بيكرهني | أكاديمية اعمل بيزنس
 
الرجوع الى المدونة

من الإنبوكس.. أنا اكتشفت ليه مديري بيكرهني

من الإنبوكس.. أنا اكتشفت ليه مديري بيكرهني

رسالة من الإنبوكس:

 

أنا بشتغل في شركة من 3 سنين، وكل فترة شغلي ما كانش فيه أي مشاكل معايا، أنا عارفة إني شاطرة في شغلي، كل مديريني قالولي كده وكلهم أكدولي إنهم بيعتمدوا عليه جدا في الشغل، حتى علاقتي بمديري الأخير لسه كويسه رغم إنه خلاص استقال.
بعد استقالته الشركة ما أعلنتش عن وظيفة المدير داخليا، أعتقد إنهم كانوا عايزين حد عنده بالفعل خبرة كمدير.

أنا كنت مهتمة إني أقدم للوظيفة ديه، بس ما عملتش كده لأني ما عرفتش أسأل مين؟ لكن عرفت من صديق يعرف حد عندنا في الإتش أر إنهم عملوا مقابلات كتير لمرشحين للوظيفة ديه، وكانوا بيختاروا بدقة شديدة جدا.

وفعلا اختاروا مديرة جديدة، بقالي معاها 4 شهور، كان باين عليها أول ما جت إنها من النوع المتحفظ، ومكانليش تواصل معاها تقريبا، بس أنا عارفة شغلي كويس، فماكنش عندي مشكلة في عدم التواصل ده.

بس من حوالي 3 أسابيع لاحظت إنها بتتعامل معايا بشكل سيئ، يعني مثلا احتجت مرة معلومة مهمة عشان أعرف أتصرف مع عميل، ولما روحت وخبطت على مكتبها، ردت والباب مقفول وسألتني "عايزة إيه؟"، فطلبت منها لما تفضى تتواصل معايا، ورغم كده تجاهلتني تماما وما اتصلتش، ولما قابلتها تاني يوم على سلم الشركة وسألتها قالتلي بعد ما جاوبتني: حولي بعد كده تتصرفي لوحدك، أنا مشغولة!!

ومن ساعتها بقت معاملتها معايا أسوأ فأسوأ، لدجة إنها بقت تهينّي وتحرجني قدام الشركة في الاجتماعات.

 

تاني يوم في استراحة الغدا، زميل ليه قالي أنا عارف ليه المديرة بتكرهك، عايزة تعرفي ليه؟
وقالي الكلام التالي: صاحب الشركة قعد مع المديرة، وانتقد أدائها، وقالها إنه عايز ينقلها لمنصب تاني، واختارك إنت عشان يبدأ يدربك تبقي مكانها، وبلغها بإنه هيتلكم معاكي الأسبوع الجاي.

دلوقتي أنا فرحانة فعلا بالترقية اللي هاخدها، بس إيه إلي كان ممكن يحصل لو ما عرفتش السبب؟ كنت هتصرف إزاي لو ما كنتش فهمت ليه مديرتي بتكرهني؟

الرد:

 

أولا مبروك على الترقية، والمغامرة الجديدة اللي هتخوضيها في شغلك.
من الواضح أن مديرتك ماكنش عندها الشجاعة والجرأة الكافية عشان تتعامل مع خبر نقلها لمنصب تاني، وخبر تولي واحد من موظفيها لمنصبها، كان لازم تحدد لها عدو توجهه ليه غضبها وتوترها، وكنت إنتي الاختيار الأسهل.

إنت دلوقتي كل اللي عليكي تعمليه إنك تجهزي نفسك وتستعدي للمنصب الجديد، وتبقى متأكدة إن عندك إجابة للأسئلة ديه:

1- هل المنصب الجديد لمديرتك هيبقى تحتك، بمعنى إنها لازم ترجعلك وتسلمك تقارير شغلها؟ لو كده فمنصبك الجديد هيبقى أكثر صعوبة، بعد ترقيتك اتكلمي مع مدير الشركة عشان يشوف ليها منصب تاني ماتكونيش فيه إنتي مديرتها المباشرة.

2- هل هيكون من ضمن صلاحياتك تعيين موظف يعمل شغلك الحالي؟ لأنك مش هتقدري تأدي دور المدير، وتسدي في شغلك السابق برضه.

3- بما إنه تم اختيارك كالأفضل في المنصب الجديد، اتكلمي عن حقوقك زي المرتب والإجازات وغيره، اطلبي كمان كل الصلاحيات اللي هتخليكي فعّالة ومؤثرة وقادرة إنك تعملي شغلك كما يجب.

 

وافتكري كويس إنك كل مانجحتي وتقدمتي في مسيرتك المهنية، كل ما زاد عدد الكارهين والأعداء اللي هيهاجموكي، إنت عليكي إنك تأدي شغلك وتوضحي وتبيني للناس حقيقتك الكويسة، وهتلاقي الناس الكويسة والمجتهدة بتقرب منك وبتعملوا سوا شغل كويس.
أتمنى ليكي كل الخير، وبالتوفيق

شارك المقال :