تم النشر في November 13, 2022

من الإنبوكس.. اترفدت مرتين - تفتكر هعرف ألاقي شغل تاني؟

كيف يمكنك إنشاء عروض تقديمية مقنعة تبهر زملائك وتثير إعجاب مديريك؟ اكتشف ذلك من خلال دليلنا المتعمق حول العروض التقديمية لتجربة المستخدم.

رسالة من الإنبوكس:

اشتغلت 15 سنة تقريبا، ما اطردتش من شغلي ولا مرة، ولا حتى اتهددت بالرفد، حققت تقدم كبير قوي في مسيرتي المهنية، وبقى عندي خبرة ممتازة من شغلي في شركات كتير كبيرة، لكن من 4 سنين، اترفدت من شغلي!! أيوه اترفدت بمعنى الكلمة، مديري طردني، ماكانش الموضوع تسريح موظفين مثلا عشان تقليل العدد، أنا كنت مصدوم جدا وقتها.

ورغم محاولات كتير لمسئولين في الشركة إنهم يخلوني بس مديري أصر على رفدي، عشان قدرت أعمل شغلي بكفاءة أعلى منه في أداءه لوظيفته.

اتصدمت وقتها واتهزت ثقتي في نفسي، بس رغم كده قدرت ألاقي شغل تاني بعد كام شهر، وكملت فيه 3 سنين ونص، واستقلت عشان سافرت محافظة تانية.

وهناك لقيت الحمد لله شغل تاني، بس للأسف قعدت فيه 9 شهور بس، قبل ما أترفد للمرة التانية في حياتي!!

حصل ده من شهر لما جالي صاحب الشركة وقالي إن الدنيا كده مش ماشية، بس كده!! ماوضحليش أي أسباب تخليني أفهم أنا ليه بيمشوني من الشركة.

أنا جربت الرفد مرتين في حياتي المهنية، ودلوقتي بدور على شغل تاني، بس إلي مريت بيه مخليني قلقان على مستقبلي، خايف ما أعرفش ألاقي شغل كويس، ومش عارف هرد أقول إيه لما أتسأل في أي إنترفيو: سيبت شغلي السابق ليه؟؟

الرد:

أولا.. ما تقلقش، إنت تقدر تلاقي شغل تاني، إنت في مسيرتك المهنية اترفدت مرتين، وده في سنك وخبرتك مايعتبرش قصة كبيرة.

هو بس للأسف كتير من المؤسسات دلوقتي بتقول للموظف إنه اترفد مش تم تسريحه عشان سبب المؤسسة مش عايزة تعلن عنه، وده إلي حصل معاك، إنت كفء في شغلك، وما ارتكبتش خطأ يخلي أي شركة ترفد.

المطلوب منك دلوقتي تقاوم فكرة إن تسمح للي حواليك يحددوا مشاعرك ناحية نفسك.

إنت زي ناس كتير بيتعاملوا مع الطرد من العمل على إنه شيئ مخجل، إنت لو اتطردت لخطأ كبير ارتكبته أو تقصير منك، ممكن هنا نتكلم ونفكر إزاي نتعلم من إلي حصل، بس ده مش منطبق على حالتك.

إلي حصل معاك إنك اشتغلت مع مديرين غير محترفين، صحيح صعب تكتشف شخصية مديرك في الإنترفيو، بس خلينا نبص على الجانب الإيجابي ونقول إن كل مرة بتتعرض فيها لمواقف زي ديه، بتكتسب خبرة أكبر.

لازم تدرب نفسك إنك ما تتأثرش لما مدير غير مهني يمشيك من الشغل، ولما يسألك مديرك الجديد في الإنترفيو سيبت شغلك ليه؟ .. ردك يكون إنك اتسرعت في قبول الوظيفة ديه، وعرفت بعدها إنك أخدت قرار غلط، فقررت تصلحه، والحياة كلها عبارة عن فرص بنتعلم فيها من أخطاءنا.

إن شركتك تمشيك من الشغل، ده مش شيء مخجل، إلا لو إنت من جواك آمنت إنه كده.

رجع ثقتك بنفسك تاني، وتخلص تماما من إحساسك إنك مش كفء، عشان تلاقي شغل جديد، ممكن كمان تلعب رياضة، اقعد خطط لحياتك المهنية، وحدد أهدافك للفترة الجاية.

لازم تعمل ده، عشان تقدر تدخل أي إنترفيو وانت واثق في نفسك، وتحصل على الوظيفة إلي تستحقها، وحط في اعتبارك إنك كل ما تنجح هتلاقي ليك أعداء، مش كل إلي حواليك في الشغل هيحبوا نجاحك.

ماتيأسش ودور على شركة ومدير يستحقوا خبرتك وكفاءتك.

أتمنى لك كل الخير، وبالتوفيق

خصم 50% عند الإشتراك في أكاديمية إعمل بيزنس

نسخ الرابط

أعمل بيزنس