FB Instagram Twitter Youtube Linkedin من الانبوكس.. أقول لمديري أنا عيان عشان أعمل إنترفيو في مكان تاني | أكاديمية اعمل بيزنس
 
الرجوع الى المدونة

من الانبوكس.. أقول لمديري أنا عيان عشان أعمل إنترفيو في مكان تاني

من الانبوكس.. أقول لمديري أنا عيان عشان أعمل إنترفيو في مكان تاني

 

 
رسالة من الإنبوكس: 
النهارده كلمني صديق بيشتغل في وكالة من وكلات التوظيف، عايزني أروح بكرة أعمل إنترفيو في شركة كويسه من الشركات اللي بتتعامل مع الوكالة بتاعته.
 
ولما قلت لصديقي إني مش هعرف بكرة أخد إذن ساعتين من شغلي لأني خلصت أذونات الشهر ده خلاص، قالي اتصل الصبح بشركتك وقولهم إنك عيان ومش هتقدر تيجي الشغل النهاردة!!
 
بالنسبالي ده تصرف غير أخلاقي، وشايف إنه مش أمانة مني إني أكدب، أنا فعلا مش عارف أعمل إيه؟ أنا بحب مديري وبحترمه جدا وهو بيعاملني بشكل رائع، مش عايز أكدب أو أتظاهر إني مريض عشان أروح الإنترفيو.
 
الرد:
ماتعملش كده لو ده هيخليك متضايق ومش مرتاح، ومن غير المقبول إن صاحبك يتوقع منك إنك تتصل تقول إنك عيان، عشان تروح إنترفيو خاصة بشغله ومعدل إنتاجه في شركته.
 
صاحبك لازم يشرح للشركة اللي عايزة تعملك إنترفيو إنك مرشح ممتاز للوظيفة، لكن إنت بتشتغل حاليا وبتحترم مديرك وشركتك، ويخلي معاد مقابلتك الشخصية بعد مواعيد شغلك يعني الساعة خمسة مثلا.
 
ولو سألت هتلاقي كتير من مسئولي التوظيف بيعملوا كده عشان يعرفوا يعملوا مقابلات شخصية للناس اللي بالفعل بتشتغل في شركات تانية.
 
إحنا عندنا في الشركة بنعمل ده، وبنطوّع الظروف عشان نعمل إنترفيو لمرشحين موهوبين وبنكون فعلا مهتمين إنهم يبقوا معانا في شركتنا، الموضوع مش كبير ولا صعب، لو الشركة مهتمة بالمرشح بتعدل المواعيد وترتب معاه عشان يتفقوا على معاد إنترفيو مناسب للجميع.
 
قول لصاحبك يشوف مرشح تاني للوظيفة ديه لو مش هيقدر يقول للشركة تغير معاد الإنترفيو بتاعك، لو مش هيقدر يقولهم كمان إن كل الشركات بتعمل ده.
 
إنت موظف شاطر ومطلوب في السوق بالاسم، والشخص الناجح في شغله زيك مش مضطر أبدا إنه يتظاهر بالمرض عشان ياخد وظيفة كويسة.
 
افتكر دايما الكلام ده: ثق بإحساسك، ولو مش مرتاح لتصرف ما.. ماتعملهوش، وساعتها هتلاقي نفسك مرتاح ومستوى الإجهاد والتوتر عندك أقل، وهتكون أكثر نجاحا في مسيرتك المهنية.
أتمنى لك كل الخير، وبالتوفيق

شارك المقال :