FB Instagram Twitter Youtube Linkedin مهارات الموظف الناجح ج4 | أكاديمية اعمل بيزنس
 
الرجوع الى المدونة

مهارات الموظف الناجح ج4

مهارات الموظف الناجح ج4

نادراً ما تكون الخطابة العامة جزء أو أساس الوصف الوظيفي في معظم المهن، بس الموظفين اللي بيجهزوا كلامهم بشكل جيد ومتميزين في طريقة كلامهم وتعبيرهم عن أفكارهم يلاقوا تقدير كبير من أصحاب العمل والمديرين، كمان الموظفين دول فرصتهم أحسن انهم يحصلوا على مناصب قيادية وأدوار مهمة ليها علاقة بالتواصل داخل المؤسسة أو خارجياً مع العملاء، وأي شخص شغلته تشمل تواصل أو تدريس أو إقناع هيقدر يقوم بعمله أفضل وأكتر فاعلية لما يبقى عنده مهارة الخطابة العامة.

ليه أصحاب العمل يقدروا مهارة الخطابة العامة ؟ لأن الخطابة العامة مش بس إنك تقدم خطب ومحادثات عامة، ده بيجي في طريقتك في عرض البريزنتيشنز أو في مواقع التدريب أو لما تدي خطاب تحفيزي، أي استشاري، مدير، ممثل مبيعات، مدرس، وغيرهم كتير شغلهم بيبقى دايماً قائم على انهم يتكلموا أمام عدد كبير وبطريقة مهنية.

الموظفين اللي بيبقى عندهم فن الخطابة العامة والفاعلية في طريقة كلامهم بيكونوا في وضع ممتاز في شغلهم لأن بيتحطوا في مكانه ان دايماً كلامهم هيبقي مميز وهادف، مثلاً الموظف اللي عنده ضعف في الخطابة قصاد الناس لما بيجي يعرض منتج حتى لو هو منتج كويس بس طريقة كلامه مبتشدش اللي قصاده، لكن الموظف اللي قوي في خطابته بيقدر يضيف جاذبية للمنتج بطريقة كلامه.

معظم الأدوار في أي مستوى مهني يتطلب قدر من الخطابة العامة عشان يقدروا يتموا مهام زي تقديم نتائج الشغل، تقديم اقتراحات، تدريب موظفين جدد، وقيادة الاجتماعات.

هنوضح دلوقتي في نقط إيه الصفات اللي لازم تبقى عندك عشان يكون فعلاً عندك مهارة الخطابة العامة.

- تعبير واضح : لازم تكون بتسمع بوضوح وبتتكلم بصوت عالي بما فيه الكفاية، واستخدام قواعد اللغة كويس مع تجنب العكازات اللفظية زي لما مثلاً وانت بتتكلم تقف فى نص الكلام تقول "اممم."

الخطابة العامة تعتبر أداء تمارسه فلازم تعد ليه وتتدرب عليه قبلها، ومش ضروري انك تكون حافظ الكلام اللي هتقوله بالنص ممكن ترتجل إلى حد ما بس لازم يكون المادة اللي هتتكلم فيها تكون مألوفة ليك عشان متقعدش تقف كتير في نص الكلام أو تكرر وتتعثر في كلماتك، كمان محتاج تكون قادر على حساب سرعة نفسك في الكلام بحيث انك تخلص في الوقت المحدد لا بدري ولا متأخر.

- جاذبية أسلوب العرض التقديمي : يشمل نبرة الصوت، ولغة الجسد، وتعبير الوجه، والتوقيت، والأسلوب الصح ممكن يحول مادة الحديث المملة لحوار مثير للاهتمام وجذاب.

- تقديم احتياجات الجمهور: عشان تصيغ حديث ناجح وتقدم أسلوب عرض مناسب لازم تكون قادر على تقييم احتياجات جمهورك وهما بيميلوا لإيه.

مثلاً بعض الجمهور بيبقوا عايزين شرح تفاصيل فنية أكتر وبعض لا، بعض بيستمتع بالفكاهة وبعض لا، حتى بعض النكات تنقع تتقال وسط بعض من الناس والباقي لا.

- مهارة الباور بوينت : مش لازم تبقى بس فاهم الجوانب التقنية لاستخدام البرنامج، بس لازم يبقى عندك القدرة والحس الفني انك تعمل شرائح في البرنامج تكون شكلها جميل وسهلة الفهم، ممكن تستعين بحد معاك يقدر يشكل الشرائح دي.

- مهارة التكوين : لازم تكون قادر على بناء محادثات عقلانية ومتماسكة وسهلة الفهم وتغطي جميع النقاط، وسرد القصص والفكاهة يساعد بس محتاج تعرف إزاي تستخدمهم.

من المهم انك تستخدم صفات زي دي ككلمات رئيسية في سيرتك الذاتية، أحياناً أصحاب العمل بيقوموا بالبحث عن الكلمات دي وسط كمية السير الذاتية اللي بتجيلهم لتسهيل عملية الفلترة، بعدها استخدم ال cover letter في إنك تسلط الضوء على بعض المهارات الخاصة بيك ذات صلة مع انك تذكر أمثلة من مواقف سابقة اتجسدت فيها الصفات دي خلال مقابلات العمل.

أهم شيء انك لما تيجي تسلط الضوء على ان عندك مهارة الخطابة العامة اتأكد انك تتجاوز كلمة "مهارة الخطابة العامة"، لازم تدخل في تفاصيل أنهي جانب من الخطابة العامة انت كويس فيه مع تقديم أمثلة.

وربنا يوفق الجميع

شارك المقال :