فيه مهارات كتير لازم تكون موجودة عندك عشان تقول وبمنتهى الثقة "أنا موظف ناجح"، ويمكن من أهم هذه المهارات واللي هنتكلم عنها النهارد’ هي قدرتك على أداء مهام متعددة بنجاح وجودة وكفاءة عالية.

علماء كتير أكدوا إن مخ الانسان لا يستطيع القيام بمهام متعددة في نفس الوقت، وده اللي أكدته دراسة أجراها باحثون في جامعة (سوسيكس) في المملكة المتحدة قالت إن الانسان اللي بنقول عليه ناجح في أداء المهام المتعددة هو موظف بيقدر بسرعة هايلة ينتقل من مهمة لأخرى لدرجة إنه بيعتقد إنه يؤدي مهام متعدد في الوقت نفسه.

وبشكل عام مفهوم الـ Multitasking أو تعدد المهام يعني قدرة الشخص على تأدية مهام متعددة في نفس الوقت، وطبعاً مش سهل إن الموظف يوزع تركيزه على عدد من المهام في الوقت نفسه، وينتهي منها في الوقت المحدد وبالكفاءة المطلوبة كمان، ولكن مع الأسف واقع الحياة العملية يفرض علينا ضرورة تعلم المهارة ديه، واحنا هنا هنقولك شوية نصائح تقدر بيها تبقى موظف ناجح لو طلب منك عدة مهام في نفس الوقت أو في نفس يوم العمل:

- صحيح النجاح في أداء مهام متعددة مش سهل لكن مش مستحيل، وأحد آليات النجاح انك تتدرب على تحديد الأولويات، يعني ترتب المهام المطلوبة منك الأكثر أهمية أولاً ثم المهم وهكذا، بحيث تنجز أولاً مجموعة المهام التي لا يمكن تأجيلها.

- حاول تشتغل المهام المتقاربة في طبيعتها مع بعض أو ورا بعض، لأنك بالشكل ده هتبذل مجهود أقل وتوفر وقت أكتر.

- قسم شيفت الشغل بتاعك وحدد وقت معين لكل مجموعة مهام متشابهة، وسابق نفسك عشان تلتزم بالتقسيم ده، وهتتفاجئ إنك قدرت تخلص كل اللي عليك.

- حط قدام عنيك ورقة فيها المهام المطلوبة كلها، تجنباً لنسيان أي مهمة منهم.

- تخلص من كل وأي حاجة ممكن تشتت انتباهك وتقلل تركيزك، زي الموبايل والفيس بوك والواتس أب، ممكن تفتكر انها حاجات بسيطة ومش بتاخد وقتك، لكن الحقيقة عكس كده، تشتيت انتباهك كل شوية بيخليك تبذل مجهود أكبر عشان ترجع تركز في مهمتك، وبالتالي يستهلك وقت أطول.

- الوضع طبعاً بيكون أسهل لو العمل المطلوب منك انجازه مطلوب من فريق عملك، وبالتالي النجاح في أداء المهام المتعددة يتوقف على كفاءة توزيع المهام على فريق العمل، بحيث يتم تكليف كل فرد بالمهمة اللي هو شاطر فيها، وبالتالي تضمن انجاز كل المهام بكفاءة وفي الوقت المحدد ليها.

- ماتنساش أبداً انك تاخد استراحة قصيرة وسط ضغط الشغل، عشان تشحن طاقتك وترجع تكمل بنفس الحماس.

- أما النصيحة الأهم والأغرب انك تتجنب وضع "المهام المتعددة" طالما مفيش ضرورة لده، وفيه دراسة حديثة أصدرتها جامعة ستانفورد أثبتت إن أداء مهام متعددة في الوقت نفسه بيقلل من جودة الأداء مقارنة بأدائك لكل مهمة لوحدها، وبيقلل كمان من معدل لذكاء، وده الي أكدته برضه دراسة أجرتها "جامعة لندن" وقال الباحثين فيها إن المشاركين اللي قاموا بمهام متعددة تعرضوا لانخفاض مستوى ذكائهم.

عشان كده لو مش مضطر انك تخلص مجموعة مهام في الوقت نفسه، تجنب انك تحط نفسك في الوضع ده بإرادتك.

وربنا يوفق الجميع