مواقع التواصل الاجتماعي بوابات التوظيف الجديدة

"هل سئمت من الكذب على مديرك وادعاء الأمراض ووفاة الأصدقاء لتحصل على إجازة للسفر؟ هل مللت من تفريغ الهواء من إطارات سيارته أو وضع العلكة على مقعده في كل مرة يرفض الإجازة؟ إليك الحل.. سفرية بتدور على كاتب/كاتبة مغامرين وبيحبوا السفر ينضموا للتيم بتاعها، ولازم لازم يكونوا اشتغلوا قبل كده حاجة ليها علاقة بالكتابة (يفُضل تبقى مجلة أونلاين)، ولازم يكونوا بيسافروا كتير سواء جوه أو بره مصر". كام مرة اتكعبلت في بوست توظيف لطيف زي ده أو حتى جد على مواقع التواصل الاجتماعي وفكرت تقدم فعلًا في الوظيفة دي رغم إنك ما كنتش تتصور إنك ممكن تشتغل بالطريقة دي؟ الحقيقة إن استراتيجيات التوظيف اتغيرت بعد ظهور مواقع التواصل الاجتماعي اللي بقت بتلعب دور مهم فيها مش بس في الشركات الصغيرة لكن كمان في الكبيرة ومتعددة الجنسيات اللي كانوا بيعتمدوا بشكل أساسي على إعلانات التوظيف التقليدية في الجرايد، أو مواقع التوظيف الإلكترونية اللي بتعرض فرص العمل الفاضية في الشركات المختلفة وبتحاول توجد أفضل العناصر لشغلها، أو حتى من خلال عرض الشركات للوظائف الخالية اللي عندها على موقعها الرسمي. وده حصل لأن أغلب الناس بقوا بيتواجدوا على المواقع دي معظم يومهم وبيتفاعلوا مع أصحابهم ويشاركوا أفكارهم ومشاعرهم ومعتقداتهم عليها، وده كله خلاها تبقى نقطة محورية للتفاعل على الانترنت وعلشان كده كان لازم الشركات تروحلها وتستفيد من الثروة البشرية والخبرات والكفاءات اللي فيها، خاصة إن عدد كبير منهم صعب الوصول ليهم من خلال الطرق التقليدية. فهنلاقي إن الشركات ما بقتش بتستخدم مواقع التواصل الاجتماعي للترويج لمنتجاتهم والتعريف بمؤسساتهم وعلاماتهم التجارية بس لكن كمان لتعيين موظفين جدد، ودي حاجة وضحها استطلاع عملته شركة التوظيف الأمريكية "جوبفيت- Jobvite" واللي أظهر إن 92% من القائمين على التوظيف في الشركات هناك بيستخدموا مواقع التواصل الاجتماعي علشان يجتذبوا المرشحين المتميزين خاصة إنهم شافوا إنها واحدة من أفضل الطرق لتحديد الكفاءات والموهوبين. وعادة بيتم التوظيف عبر مواقع التواصل الاجتماعي من خلال نشر العاملين في الموارد البشرية لإعلانات عن الوظائف على الصفحة الرسمية للمؤسسة، وفي الصفحات والمجموعات اللي بيتجمع فيها الباحثين عن شغل واللي بالتبعية بيشاركوها مع شبكتهم الاجتماعية على الانترنت. ومن أهم مميزات التوظيف من خلال مواقع التواصل الاجتماعي هو إنه بيختلف عن الطرق التانية للتوظيف (زي: التوظيف المباشر، والتوظيف الداخلي، والتوظيف الإلكتروني) في إنه بيسمح للقائم على التوظيف إنه يتواصل بشكل مباشر مع كل الباحثين عن عمل سواء كانوا نشطاء أو سلبيين (ودول غالبًا مش بيهتموا بالبحث عن عمل بشكل دوري ومش بيستجيبوا لأي فرصة بسرعة). ده غير كمان إنه بيسمح للقائمين على التوظيف بإنهم يوصل للمرشحين المناسبين من خلال البحث عنهم بنوع اهتماماتهم، وأهدافهم وطموحاتهم لأنفسهم، ودوائر معارفهم ودي مقومات بتخليهم يوصلوا لموظفين على مستوى عالي من الكفاءة. وهنا لازم نوضح إن مميزات استخدام التوظيف من خلال مواقع التواصل الاجتماعي مش معناه خالص إن الشركات بتبطل تستخدم طرق التوظيف التانية لأن الطرق كلها بتكمل بعضها واستخدامها كلها بيخلينا نوصل لأفضل النتائج. ومع اتجاه عدد كبير من الشركات لمواقع التواصل الاجتماعي وبشكل خاص (لينكد إن، وفيسبوك، وتويتر، وإنستجرام) هنلاقي إن نسبة قليلة هي بس اللي نجحت في مهمتها وده لأنها حطت خطتها الخاصة بالتوظيف على المواقع دي بطريقة صحيحة، ودي حاجة تقدر تعملها أي شركة لو اتبعت الخطوات دي: • ابني سمعة جيدة لشركتك على مواقع التواصل الاجتماعي، بشكل يخليها المؤسسة اللي كل الناس عارفينها وعايزين يشتغلوا فيها، وزي ما بتهتم باجتذاب عملائك حاول تلفت انتباه الأشخاص المتميزين اللي شغالين في نفس المجال بتاعك علشان دول لما ينضموا ليك هيساعدوك على بناء مؤسستك بشكل أفضل وعلى نمو أعمالها، وده تقدر تعمله من خلال استعراض بيئة العمل الخلاقة الموجودة في شركتك والمميزات اللي بيحصل عليها الموظفين عندك وقيم وثقافة الشركة بتاعتك وإلى أي درجة هي بتحترم الجميع. • اطلب من الموظفين المشاركة في منصات التواصل الاجتماعي الخاصة بالمؤسسة من خلال اقتراح موضوعات لمناقشتها ومشاركة لحظاتهم السعيدة في الشركة، لأن هذا الأمر سيشجع أصدقائهم ودوائر معارفهم على التفاعل معاهم وتسجيل إعجابهم بالصفحة ومتابعتها. • تابع المجموعات والشخصيات المؤثرة النشطة على مواقع التواصل الاجتماعي واللي تعتبر على صلة وثيقة مع مجال عمل شركتك لأن ده هيساعدك على تكوين شبكة قوية مع أهم الكيانات والشخصيات في مجالك وهيكون سهل عليك تحديد أفضل العناصر واجتذابهم للعمل معاك. • استخدم استراتيجيات مبدعة ومتنوعة للصفحات الخاصة بالشركة بتاعتك على مواقع التواصل الاجتماعي بحيث إن كل واحدة فيهم تكون مناسبة للمنصة وللجمهور الموجود عليها يعني المحتوى اللي هتقدمه على فيسبوك لازم يختلف عن اللي هيتقدم على تويتر وعن اللي هيتقدم على لينكد إن، واهتم بشكل خاص بالمنصة اللي هيكون فيها أعلى درجة من التفاعل. • نظم حملات إعلانية على وسائل التواصل الاجتماعي علشان تعرف تستهدف بشكل دقيق الناس اللي بتشوف صفحاتك عليها واللي هيشوفوا إعلانات التوظيف بتاعتك ويتفاعلوا معاها. وفي النهاية، مهم إن الشركات تعرف إنهم هيحتاجوا وقت علشان يقدروا يطبقوا الخطوات اللي فاتت ويمتلكوا استراتيجية واضحة ومؤثرة للتوظيف من خلال وسائل التواصل الاجتماعي.