موقع Trademap لمعرفة ودراسة مختلف الأسواق والمنتجات ج2

الآن وبعد إن إنتهينا من عملية التسجيل يمكننا الدخول للموقع بكتابة الإيميل وكلمة المرور لتظهر لنا الصفحة

خلينا نبدأ المرح لو مثلًا عايزين نعرف مصر بتصدر برتقال البند الجمركى للبرتقال (080510) لمين وبكم ؟

نختار Exports ونكتب رقم المنتج هيظهرالموقع اسمه fresh or dried orange ونكتب البلد Egypt وهيظهرلك خانة ثالثة ممكن تختار منها بلد بعينها ( لو مثلًا عايز تعرف مصر بتصدر للسعودية بكم برتقال اكتب  Saudi Arabia) هنسيب الخانة الثالثة فارغة علشان نشوف كل البلاد ونضغط على زر Trade Indicators

ثم نقوم بالضغط على Trade Indicators لتظهر صفحة جديدة

طبعًا فالجزء العلوى هتظهر البيانات إلى أدخلناها إسم المنتج البرتقال (بنوعية الطازج والمجفف) إسم البلد مصر الشريك التجارى دول العالم جميعًا واخترنا ندرس التصدير يعنى ببساطة بنجاوب على سؤال : مصر بتصدر برتقال لدول العالم بأى كمية ؟

هيظهر عندى مجموعة أعمدة فيها أسماء دول وأرقام هنحاول نتعرف عليها كالآتى :

عمود (1) بتظهر قصاد كل بلد علامة + لو ضغطنا عليها بيديلك مستوى أدق من المنتج يعنى فى الحالة دى هيديلك معلومات عن البرتقال الطازج على حدة والمجفف على حده فلو ضغطت على + الى أمام أول دولة وهى روسيا هتظهر الصورة رقم 4 .

إرجع تانى Back للصفحة الأساسية الآن هى المهمة فعمود (2) بيرتبلك الدول إللى بتستورد من مصر برتقال حسب كمية الصادرات وهم بالترتيب روسيا – السعودية – أوكرانيا – الإمارات – وهكذا.

عمود (3) حجم صادرات مصر مع العالم مجتمع وحجم صادراتها مع كل دولة (بالألف دولار) يعنى ببساطة ضيف على الرقم اللى ظاهر 3 أصفار يعنى فالصورة مصر صدرت فى 2013 ( آخر سنة منتهية ) 493,056,000 $ ربعمائة ثلاثة وتسعون مليون دولار يعنى قرابة النص مليار دولار .

وأكثر بلد بتصدرلها مصر هى روسيا بقيمة 115,968,000 $ مائة وخمسة عشر وتسعمائة وثمانية وستون مليون دولار

وبعدها السعودية ب 84 مليون دولار ( وده السبب إننا بنلاقى البرتقال المصرى فالسعودية أكتر من مصر )

عمود (4) وده محتاج تركيز هو ببساطة بيعبر عن الميزان التجارى بين مصر والدول اللى بتصدرلها

الميزان التجارى (عمود 4) = صادرات مصرللدولة – واردات مصر من الدولة ( من البرتقال )

يعنى مثلًا الرقم ده مع السعودية هو نفس الرقم فعمود (3) وهو 81,147 يعنى السعودية مصدرتش لمصر كيلو برتقال حتى :) لإن : 81,147 الميزان التجارى (عمود 4) = صادرات مصر للسعودية (عمود 3) 81,147 – واردات مصر من السعودية (نقدر نخمنه بسهولة) يعنى واردات مصر من السعودية من البرتقال صفر .

(وده لإننا عارفين صادرات مصر من عمود 3 وعارفين الميزان التجاري من عمود 4)

مثال تانى الدولة رقم 6 هى united kingdom هنلاقى إن الرقم 23,637 فالميزان التجارى عمود (4) بينما الرقم فعمود (3) 23,568 وبنفس المعادلة :

23,637 الميزان التجارى (عمود 4) = صادرات مصر لانجلترا (عمود 3) 23,658 – واردات مصر من إنجلترا (نقدر نخمنه)

واردات مصر من إنجلترا = 23,658 - 23,637 = 21 ألف دولار

طبعا الرقم 21 ألف دولار ده غالبًا بضاعة راجعة من مصر لأنه رقم بسيط جدًا

عمود (5) بيعبر عن نسبة كل بلد من صادرات مصر يعنى روسيا بتستقبل 23.5% من حجم صادرات مصر من البرتقال تليها السعودية بنسبة 17.1%

عمود (6) حجم الصادرات من البرتقال للعالم 1,108,895 وعمود (6) بيوضح الوحدة وهى طن كمثال آخر مصر صدرت لروسيا ف 2013: 238,717 طن برتقال .

عمود (8) مؤشر مهم جدًا عن متوسط سعر الطن المباع لكل بلد فمثلًا سعر الطن للروسيا 486 $ بينما للسعودية 391 $ طبعًا ممكن عامل الجمارك يأثر وهو عمود (15) فالجمارك للسعودية صفر بينما لروسيا 3.8 %

موضوع المقال اللى جاى هيكون عن الجمارك لما نكمل شرح الجدول فى الحلقة القادمة إن شاء الله