FB Instagram Twitter Youtube Linkedin وداعا للفهلوة.. أهلا بالذكاء التنافسي! | أكاديمية اعمل بيزنس
 
الرجوع الى المدونة

وداعا للفهلوة.. أهلا بالذكاء التنافسي!

وداعا للفهلوة.. أهلا بالذكاء التنافسي!

الفهلوة بمعناها اللي كلنا عارفينه لو استخدمتها في البيزنس ممكن تكسب من وراها مرة أو اتنين بس خد بالك عشان المرة التالتة ممكن تقع ومش هتلاقي اللي يسمي عليك، وعشان كده.. إيه رأيك لو عرفتك على سكة تانية قايمة على معلومات ومنطق وهتوصلك لنتيجة أحسن بكتير من الفهلوة إياها دي؟

الطريقة دي هي الذكاء التنافسي، ولو أول مرة تسمع عن المصطلح ده فهو عملية بيكون الهدف منها ملاحظة وجمع وتحليل المعلومات اللي ليها علاقة ببيئة العمل الخارجية والداخلية لشركتك، وكل ده عشان يتم التوصل لقرارات جيدة تحافظ بيها الشركات على قدرتها التنافسية.

والذكاء التنافسي مش زي ما هيجي في بالك إنه مجرد تحليل للمنافس بتاعك بس، ولكن هو بجانب معرفة منافسك والمساحة اللي بتتنافس فيها، بيعرفك كمان على المستهلكين ومكانهم فين في سوقك المستهدف، ده غير إنه بيساعدك على إنك تتعرف على الأحداث اللي ممكن تؤثر على البيزنس بتاعك والتكنولوجيا الجديدة اللي ممكن تنهي على أي افتراض بتحطه للمستقبل بسرعة كبيرة، وبالتالي هو بيركز على المنافسين والعملاء، وكمان على المنتجات والأسواق والعوامل الاقتصادية والتكنولوجية أو القانونية اللي ممكن تأثر على النشاط التجاري للشركة.

والذكاء التنافسي بيختلف باختلاف الأشخاص داخل الشركة، فبالنسبة لرجل المبيعات ممكن يبقى نصيحة بأفضل طريقة ممكن يستخدمها عشان يعمل عقد مربح للشركة، وبالنسبة للإدارة العليا ممكن يبقى وجود رؤية تسويقية فريدة الهدف منها الاستحواذ على نسبة أكبر من السوق في ظل وجود منافس قوي، وبالنسبة لأي فريق عمل تاني جوه الشركة، فالذكاء التنافسي هيساعدهم على اتخاذ قرارات أفضل وتعزيز مستوى الأداء عن طريق اكتشاف المخاطر والفرص من قبل ما تظهر على السطح أصلا.

غير كده كمان فالمعلومات اللي بيعتمد عليها الذكاء التنافسي بتختلف على حسب الصناعة اللي شركتك موجودة فيها، ومن أمثلة المعلومات اللي ممكن يشملها الذكاء التنافسي بشكل عام:

 

• المعلومات اللي بتعرفك التغييرات اللي بتحصل في تكلفة المنتجات.
• معلومات عن المنتجات الجديدة: إيه هي المنتجات الجديدة اللي هيطرحها المنافسين بتوعك؟
• تقييم وتقدير حجم السوق: من خلال التعرف على حجم السوق والمنافسين الموجودين فيه حاليا. 
• معدلات العرض والطلب: فمثلا هل فيه طلب على المنتجات الجديدة؟ والمعلومات عن معدلات العرض والطلب على منتجاتك مهم جدا لكل أنشطة الشركة بشكل عام.

• أخبار المنافسين: إنك تعرف إيه اللي بيحصل عند المنافسين بتوعك، من خلال متابعة مواقعهم الإلكترونية وصفحات السوشيال ميديا وأي مؤتمرات صحفية بيعملوها عشان تواكب أي تطورات بتحصل عندهم.

 

وفي طرق كتير ممكن تجمع بيها المعلومات الخاصة بالذكاء التنافسي، ومن الطرق دي:
• المواقع الإلكترونية: في مواقع إلكترونية كتير على الإنترنت ممكن توفر للشركات معلومات قيمة عن السوق والعملاء والمنافسين، زي موقع Yahoo Finance واللي بيعرفك دايما على الأخبار المالية والاقتصادية والتغييرات في سوق البورصة، وهو مهم جدا كمان لأنك تقدر تتابع من خلاله أخبار الشركات التانية.

• تحليل ال SWOT: الشركات ممكن إنها تقارن نفسها بالمنافسين بتوعها من خلال إنها تعمل تحليل ال SWOT واللي بيعرفها نقاط القوة والضعف والفرص والمخاطر اللي ممكن تواجهها، والتحليل ده هيكون مناسب جدا لإكسابك ذكاء تنافسي عن المناطق اللي متفوق فيها أو اللي محتاج تحسنها.

وعشان نوضح الذكاء التنافسي بشكل أكبر هنقولكم على بعض الأمثلة في مجالات البيزنس اللي استخدام الذكاء التنافسي فيها بيكون مهم جدا:

• تذاكر الطيران: وتعتبر من أفضل الأمثلة اللي ممكن توضح ازاي ممكن تستخدم الذكاء التنافسي بطريقة عملية، وده هنشوفه في التغيير اليومي تقريبا في أسعار تذاكر الطيران، شركات الطيران بتغير في أسعار التذاكر بناءً على معلومات خارجية متعددة، على سبيل المثال، لو كل المنافسين غيروا أسعار تذاكر الطيران لمنطقة معينة، فهتلاقي نفسك بتغير الأسعار انت كمان بسرعة عشان تلحق تأمن لنفسك هامش ربح أعلى، غير ده كمان ممكن استخدام معلومات العملاء يساعدك في تعديل سعر التذاكر، وده بيكون من خلال تتبع عملاء معينين بيسألوا بشكل متكرر عن رحلات معينة وأسعارها.

• الشركات الناشئة: وهما مثال جيد عن الذكاء التنافسي، ففي الوقت اللي الشركات التقليدية عندها ميزانيات أكبر وموارد تكنولوجية فائقة وبيانات ومعلومات كتير عن السوق والعملاء، إلا إن الشركات الناشئة بتقدر تتفوق عليها من خلال تركيزهم على مجال معين وتتفاعل وتتكيف معاه بسرعة عن طريق استخدام الذكاء التنافسي اللي بيمنكهم من معرفة المشاكل اللي بتواجه العميل وبالتالي تقديم حلول تتفوق على غيرها من الشركات.

موقع Airbnb استغل التكنولوجيا الحديثة على أكمل وجه، لأنه أتاح لعملائه فرصة البحث عن أماكن للسكن وتأجيرها في أكتر من 81 ألف مدينة موزعة على حوالي 192 دولة وبأسعار منخفضة، وبالتالي قدر الموقع إنه يؤثر على مجال الفنادق اللي ممكن متوفرش نفس الميزات دي للعميل بتاعها، ومن هنا فالموقع قدر يستخدم الذكاء التنافسي بأفضل طريقة ممكنة خلت القيمة السوقية بتاعته توصل لرقم يترواح من 53 إلى 62 مليار دولار على حسب تقديرات Morningstar للأبحاث الاستثمارية سنة 2018.

شارك المقال :