الوظيفة بدوام كامل أو الـ full-time ببساطة عبارة عن اتفاق بيتم بين موظف وشركة عشان يمنحهم جزء محدد من وقته لأداء بعض المهام بمقابل مادي، لكن عمرك سمعت عن وظيفة 24 ساعة في اليوم ؟!

في سنة 2006 في دراسة قام بها معهد "ماساتشوستس" للتكنولوجيا أكدت أن معظم الموظفين بيفحصوا إيملاتهم الخاصة بالشغل كل 8 دقائق حتى في الليالي وعطلات نهاية الأسبوع.

وفي عام 2012 موقع " فوربس" نشر تقرير أكد إن 52% من الموظفين بيستقبلوا معلومات عن شغلهم خارج ساعات العمل الأساسية، سواء عن طريق رسائل البريد الالكتروني أو المكالمات الهاتفية، وكمان 53% منهم قالوا إنهم بيضطروا يقوموا من على الطعام عشان يردوا على مكالمات أو رسائل ليها علاقة بشغلهم!.

التقرير بيفسّر السبب في ده وهو ارتباط الموظفين بموبايلاتهم وإيميلاتهم، لدرجة إنها بقت ملازماهم وبالتالي بقي سهل الوصول ليهم في أي وقت ومن غير أي حدود، وبقوا مُطالبين إنهم يردوا عليها، وده اللي اعتبره البعض "عمل إضافي" خارج ساعات العمل الرسمية؛ حتى وصل الامر إن في 2015 أحد المقالات في جريدة "وول ستريت" بعنوان " هل تستطيع مقاضاة رئيسك لجعلك ترد على إيميل في وقت متأخر من الليل " أثار فكرة تعويض الموظفين ماديًا عن الوقت اللي بيردوا فيه على اتصالات العمل.

دلوقتي ومع التقدم التكنولوجي الموضوع بدأ يزيد عن حده، ومركز "بيو" للأبحاث أشار في تقرير ليه بأن 35٪ من الموظفين قالوا إن التكنولوجيا الرقمية زادت عدد سعات العمل وده طبعًا نتيجة الاتصالات اللي بتتم خارجها، وعلى الرغم من صعوبة وضع نظام داخل الشركة لتعويض الموظفين عن الساعات الإضافية اللي بيقضوها في الرد على المكالمات الهاتفية أو رسائل البريد الإلكتروني خارج ساعات العمل، لكن فيه مجموعة من القواعد ""etiquettes يجب مراعاتها عند الاتصال بهم خارج ساعات العمل وهي:

• وضع الحدود: عالمة النفس" Alexina Baldini" بتقول" لو هتتصل بالموظفين بتوعك خارج ساعات العمل فالأفضل إنك تجتمع معاهم الأول، وتحدد الوسيلة المفضلة لكل موظف في التواصل، سواء كان الموبايل أو البريد الالكتروني، وكمان التوقيت المفضل بالنسبالهم للتواصل، يعني تختار الوسيلة والوقت المناسبين ليهم مش المناسبين ليك.

• كن واقعيًا: "Anne-Marie Orrock" العضو المنتدب لشركة استشارات الموارد البشرية " Canary HR Consulting " بتقول: "مينفعش نتوقع من الموظف إنه يشتغل خارج ساعات العمل، تقصد الرد على الايميلات والمكالمات، ونبرر ده تحت مفهوم الــ cost of greatness، ولو انت كمدير شغلك مسيطر على حياتك فده مش معناه إنك تجبر موظفيك يكونوا زيك!"
وبتضيف: "من الأخلاقيات المهمة عند خطاب الموظفين عن طريق الإيميلات إن المدير يدي للموظف مساحة للرد عليها طالما الموضوع مش عاجل".

• التزم بوعودك: لو كان الاتفاق المُعلن بينك وبين الموظفين بتوعك إنك تكلمهم في الأوقات الحرجة أوالأمور الطارئة فقط فبلاش تكسر القاعدة ديه وتكلمهم في أمور تانيه ممكن يتم مناقشتها في خلال ساعات العمل اليومية.

• لا تتصل بهم بعد التاسعة مساءً: Kate Jones"" عضو الجمعية التشريعية في استراليا كتبت في أحد المقالات ليها على موقع" sydney morning herald" " بعنوان "قواعد الاتصال بالموظفين بعد ساعات العمل" إنه مينفعش نكلم الموظفين في أمور متعلقة بالعمل بعد الـ 9 مساءً -قاعدة عامة -إلا في حالة الطوارئ.

• تجنب حالات الطوارئ قدر الإمكان: لازم تبعد عن الأسباب اللي ممكن تخليك تكلم الموظفين بتوعك خارج ساعات العمل بقدر الإمكان، وده بيتم عن طريق رصد الأمور اللي بتخليك ترجع للموظفين خارج ساعات العمل، بمعني لو النهارده كلمت موظف بالليل عشان تسأله عن إتمام مهمة ما حاول بعد كده تسأله عن اتمامها قبل ما يمشي أو تاني يوم.

• احترم أسرة موظفك: ممكن تتصل بيه فمرة ويرد عليك أحد أفراد أسرته، فمهما كنت متعصب أو مدايق لازم تتكلم بلطف وتلتزم بأقصي درجات الاحترام، وافتكر إن ده وقتهم وانت بتقطعه قبل أي شيء!

• وزع المسؤوليات: يعني لو لاحظت إن فيه موظف دايمًا بتكلمه بشكل متكرر خارج ساعات العمل حاول تعمل خطة وتعيد توزيع بعض المسؤوليات اللي بتضطرك ترجع للموظفين بعد الشغل وتتوزع المهام علي أكتر من موظف بالتساوي بحيث متجيش على أي حد في فريقك.

• إظهرلهم تقديرك: لو بتكلم موظفيك بعد ساعات العمل وكانوا متجاوبين معاك فده مش معناه إنه بقي حق مكتسب ليك، وبالتالي لازم تشكرهم على ده وتوصلهم امتنانك بشكل مستمر.

• كافئهم: حاول تكافئ أو تعوض الموظفين على استجابتهم ليك خارج ساعات العمل سواء عن طريق الاجازات أو تزودهم 10 دقائق في استراحة الغداء، ولو الموضوع استمر ممكن توعدهم بزيادة في المرتبات، وبالمناسبة قانون معايير العمل العادل الأمريكي"FLSA" بينص على ضرورة تعويض الموظفين ماديًا مقابل استخدام الهاتف المحمول لأغراض الشغل خارج ساعات العمل.

• راعي فرق التوقيت: لو كنت مسافر بره واضطريت تتصل بالموظفين بتوعك أو كنت بتتعامل مع موظفين من بلدان تانيه راعي فرق التوقيت الزمني من بلد للتانيه؛ عشان متبعتش ميل لموظف وتطلب منه رد عاجل عاجل عليه ويوصله 3 صباحًا مثلًا!

بشكل عام، عشان الموظف يقدر يوازن ما بين حياته وشغله أو يحقق الــ " work life balance" مينفعش تزعجه بأي اتصالات ليها علاقة بالشغل خارج ساعات العمل – باستثناء بعض الوظايف اللي بتحتاج تواصل بره الشغل وبيكون فيه تعويض في المقابل -وده مش معناه إنه مش قلبه على الشغل أو مش مجتهد ومش بيتنافي مع مفهوم الـ cost of greatness ما دام الموظف بيأدي شغله علي أكمل وجه عشان ببساطة .... الموظف مش تحت أمرك 24 ساعة.

وظيفة 24 ساعة

مقالات مشابهة

مميزات أجازة الابوة

كيف تتغلب على مشكلة التحرش في أماكن العمل

5 ساعات شغل يوميا ..هل ممكن تبقى كفاية؟

السلامة النفسية لفرق العمل.. ضرورة مش رفاهية

الأكثر قراءة

مراحل ترقي الـ HR: من HR Coordinator ل HR Director

أفضل 6 أفلام عن البيزنس لرواد الاعمال

بطريقة سهلة ... ازاي تكتب إميل احترافي

شركات تنافس اوبر وكريم

أهم اختصارات برنامج Microsoft Word

"ماكدونالدز" و"برجر كينج".. الصراع على عرش البرجر

أفضل عشر شركات فى العالم..

تطبيقات مهمة للبزنس

اسباب فشل الشركات الناشئة