FB Instagram Twitter Youtube Linkedin وظيفة واحدة لا تكفي؟ | أكاديمية اعمل بيزنس
 
الرجوع الى المدونة

وظيفة واحدة لا تكفي؟

وظيفة واحدة لا تكفي؟

في السنوات الأخيرة بقى في ناس كتير رجال وسيدات الطبيعي بتاعهم إنهم بيشتغلوا أكثر من وظيفة وده لأسباب متنوعة منها إنهم محتاجين يكسبوا فلوس أكتر علشان يقدروا يعيشوا بشكل طبيعي في ظل الظروف الاقتصادية الصعبة أو لأنهم خايفين يفقدوا وظيفتهم بسبب ميل كتير من الشركات لخفض عدد العاملين بيها وحجم مصاريفها، وفي ناس تانية بتعمل ده بهدف إنها تتعلم حاجات جديدة عليها علشان تقدر تفتح مشروعها الخاص.

ومع اختلاف الدوافع اللي خلت ناس كتير يشتغلوا مؤخرًا في أكثر من وظيفة هنلاقي إن الموضوع ده على قد ما بيمثل تحدي ليهم أو عنصر ضغط عليهم بسبب العمل في مجالات وأماكن مختلفة على مدار اليوم الواحد إلا أن في فوائد كبيرة جدًا هما بيكتسوبها، وده دفع البعض إنهم يدعوا لفكرة أن كل فرد لازم يكون عنده مهنتين على الأقل بيشتغلهم علشان يقدر يكتشف الطاقات اللي موجودة جواه ويستثمرها بشكل أفضل.

ونقدر نقول إن من أبرز مميزات الجمع بين أكتر من وظيفة، هي:

 

- التمتع بالأمان المادي والاستقرار:
العمل في أكثر من وظيفة بيتيح للفرد تحقيق دخل أعلى وبالتالي الإحساس بالأمان المادي والاستقلال، ده غير كمان شعورك بالاستقرار بشكل أكبر عن ما بتكون بتشتغل وظيفة واحدة لأن أنت هنا بتكون مطمئن إنه في حال توقف إحدى الشركات عن العمل مش هتضطر إنك تقعد في البيت علشان هيكون عندك وظيفة تانية ودخل تاني ثابت.

 

- تحقيق حلمك الخاص:
في ناس كتير مش بيشتغلوا الوظائف اللي هما اتمنوها أو اللي كانوا بيحلموا بيها لكنهم مستمرين فيها لأنهم فاتحين بيوت وخايفين يعملوا أي مجازفة، علشان كده بيكون واحد من الحلول المطروحة بالنسبة لهم هو الجمع بين وظيفتين واحدة متعلقة بدراسته ومجال خبرته وبيحصل فيها على مرتب كبير والتانية مرتبطة بميوله وحلمه الخاص وممكن يكون دخلها قليل بس بتحققله قدر كبير من السعادة.

 

- اكتشاف ذاتك وتنمية مهاراتك:
لما بتشتغل في أكتر من وظيفة بيكون عندك فرص أكبر إنك تعرف نفسك وتتعلم وتنمي مهاراتك، فمثلًا بتكون أكثر قدرة على تنظيم وإدارة وقتك لأنه بيكون مطلوب منك إنك تعمل حاجات كتيرة ومختلفة في مدة زمنية محددة، كمان بتكون أكثر إبداعًا من الآخرين بسبب الخبرات المتنوعة اللي بتاخدها وده بيزود وزنك في أي شغل بتقوم بيه وبيسمحلك تطلب عائد مادي أكبر، ده غير إنك بتطور مهاراتك في التواصل مع الآخرين خاصة إن أنت بتتعامل مع ناس كتير ومن خلفيات وثقافات متنوعة.

 

- التشبيك مع أشخاص من دوائر مختلفة:
عكس أي حد بيشتغل في وظيفة واحدة وبيشوف نفس الناس يوميًا، الشخص اللي بيشتغل أكثر من وظيفة بيقدر ينتمي لدوائر مختلفة وده بيسمحله بالتعرف على أشخاص كتير والتشبيك معاهم وتكوين شبكة علاقات متنوعة ودي حاجة بتفرق معاه للأحسن في مشواره المهني على المدى البعيد خاصة إنها بتسهل عليه فتح مجالات جديدة يقدر يستفيد منها هو والآخرين.

 

- القضاء على الملل:
بيعاني معظم الناس اللي بيشتغلوا وظيفة واحدة من مشكلة تكرار نفس المهام يوميًا وبالتالي بيحسوا بالملل وبيفقدوا قدرتهم على الابداع، لكن لما بتشتغل في أكتر من وظيفة بيكون دائمًا عندك فرص أكبر للاستمتاع باللي بتعمله لأن بيطلب منك مهام مختلفة وبتتعامل مع مسؤوليات متنوعة وده بيخليك متحمس وعندك دافع إنك تقدم أحسن حاجة عندك.

 

- الحصول على وظائف وفرص أفضل:
كل ما كان الشخص بيمتلك مهارات كتير في مجالات مختلفة وبيجيد تنفيذ مهام متنوعة، كل ما كان عنده فرص أعلى في الحصول على وظائف أفضل مش بس جوه بلده لكن كمان على الصعيد الدولي ودي حاجة بقت متاحة جدًا بفضل المواقع العالمية اللي بتتيح للناس العمل عن بعد بشرط امتلاكهم للخبرات والمهارات المناسبة لتأدية الوظائف المطلوبة.

 

- فرصة لتأسيس مشروعك الخاص:
مع مرور الوقت على عملك في أكتر من وظيفة بتبدأ تحس إنك بتميل لمجال معين وإن الخبرات الكبيرة اللي أنت اكتسبتها ممكن تسمحلك إنك تعمل مشروعك الخاص، وده من غير ما تعرض نفسك للمخاطرة برضه لأنك هتبدأ تأسسه بالتوازي مع عملك في وظيفتك الأساسية.
 

شارك المقال :