FB Instagram Twitter Youtube Linkedin يعني إيه سيستم؟ .. ج1 | أكاديمية اعمل بيزنس
 
الرجوع الى المدونة

يعني إيه سيستم؟ .. ج1

يعني إيه سيستم؟ .. ج1

كنت في تدريب الأسبوع الماضي وسألت الحاضرين في التدريب على أفضل مطعم بيحبوا ياكلوا فيه فطبعا كل واحد قال مطعم معين وفيه أسماء مطاعم اتكررت اكتر من مره لكن ولا واحد قال ماكدونالدز وكنتاكي من ضمن المطاعم المفضلة ... مع إنها هي الأكثر شهره وطبعا الأكثر ربحا بالرغم إن لا أحد اختارها كمطعم مفضل ؟؟ فيا تري ليه ؟؟؟؟

الإجابة الواضحه واللي الجميع عارفها
أولا: إن النوعية دي من المطاعم بتعتمد على السيستم أو النظام System أو Process واستغنت من زمان علي إنها تنافس في طعم أو جودة الأكل، ممكن طبعا بتحافظ علي مستوي جودة وطعم معين نقدر نقول إنه أعلى من المتوسط لكنها لن تنافس علي الإمتياز لأنها عارفه مسبقا إنها لن تحافظ علي الإمتياز في ظل التوسع الأفقي المحموم وإن عملائها مرتضين بطعم وجودة وشكل خدمة مقابل مبلغ مالي معين مناسب لكن في المقابل بيضمنوا حد أدنى من الخدمة والجودة والانتشار لا يمكن أن ينافسها المطاعم المحلية إلا ما ندر.

ثانياً: كمان مبلغ الربحية من العميل أقل بكثير من المطاعم المحلية لكن بتعوض ده بعدد الوجبات اللي بتخرج في اليوم الواحد وده الفرق بين المطعم المحلي اللي مصمم بنظام ال Tailored Made Product أو التفصيل وبين المطعم العالمي المصمم بنظام ال Ready Made Product أو الجاهز وده الفرق بين النظام والاجتهاد.

مشكلة بتواجه معظم أصحاب البيزنس "عدم وجود سيستم"
فيه متابع للصفحه وهو صاحب بيزنس وهو شاطر جدا في المبيعات وعنده مشكله إنه مطحون شغل والعملاء كلهم عايزين يشتغلوا معاه هو بس وهو بيعمل كل حاجة في الشركة لدرجة إنه حرفيا بيتكلم في الموبايل طول الوقت حتى وهو بيحكيلي مشكلته .. المهم بعد نقاش طويل ومحاولة تحديد المشكلة فين قلتله مشكلتك إنك كصاحب العمل إنت اللي بتبيع للعميل فبالتالي العميل بيحبك وبيتعلق بيك وطبعا كونك المالك للمشروع دي ميزة قوية إضافية فلازم العميل يتمسك بالتعامل معاك إنت محتاج تاخد خطوة لورا وتعين فريق هو اللي بيبيع وهو اللي يخدم العميل بعد البيع.

حلول عشان تعمل سيستم لشركتك
فحكالي إنه فعلا عين طقم ولكن مبيعاتهم كانت أقل من المستوى فاستغني عنهم ...سألته قلتله كانت مبيعاتهم كام في المائة ؟؟ قاللي 20% من العملاء اللي اتصلوا اشتروا ….قلتله كويس وانت مبيعاتك ممكن تبقي كام في المية ...قاللي ممكن أبيع ل 80% من المتصلين ...قلتله ممتاز إنت تقدر تتعامل مع كام عميل في الشهر ؟؟ قاللي 80 عميل وأنا بموت.

ايه النتيجة من عمل سيستم لشركتك
فرديت عليه قلتله لو انت زودت إعلاناتك وعينت طاقم من 5 بائعين كل واحد باع ل20 متصل هيبيعوا ل 100 عميل اللي هو أكتر منك وانت قاعد بتدير وبتكبر في البيزنس بتاعك ...ولو كل شهر قدرت تعين من 3-4 بائعين بعد سنه هايبقي عندك 50 بائع لو كل واحد باع ل 20 متصل يبقي انت عندك ألف عميل كل شهر .... انت الأن بتشتكي من 80 عميل كل شهر ومش قادر تعيش هل فكرت إنك ممكن يبقى عندك 1000 عميل كل شهر ؟؟؟ قاللي طبعا لأ ده أنا كنت أموت لو أخدم ألف عميل.

طبعا هاتموت لو انت فكرت تخدمهم بطريقتك اللي هي One Man Show إنما لو فكرت في النظام اللي هو ال System أو Process هاتلاقي نفسك بتحلم ب 10 آلاف عميل لأنك في النهاية مش هتتعب ولا حد هيتعب كل الموضوع انك بقي عندك وحده Unit بتكررها ...الوحده دي عباره عن 10 بائعين معاهم مشرف مبيعات وكل وحده بتطلع 200 عميل كل شهر وانت دورك زيادة عدد الوحدات والحفاظ عليها ومتابعة أدائها ومفيش حد تعبان ...يعني البائع بيتعامل مع 20 عميل فبيتعامل (بنفس) هادي وبراحه والمشرف بيتعامل مع 10 بائعين وكل 10 وحدات مثلا ليهم مدير مبيعات وهكذا إنما لو فضلت زي مانت هاتفضل بتخدم 80 عميل وهتيجي في النص وهتتعب صحيا ويحصلك مشكلة واليوم اللي هتقعد فيه في البيت معناها إن البيزنس بتاعك قفل ومفيش حاجه لبيتك وولادك.

قصة نجاح كنتاكي في عمل سيستم 
هارلاند ساندرز مؤسس كنتاكي كان عنده مطعم واحد من سنة 1929 حتى سنة 1954 واضطر في النهاية إنه يبيعه ب75 ألف دولار وبعد كده بدأ يفكر إنه من غير المعقول يفضل يطبخ ويدير مطعم واحد طول عمره وفعلا بعد ما عمره أصبح 70 سنه بدأ يشتغل تاني بنظام الفرنشايز وقدر خلال 3 سنين وتحديدا في 1963 إنه يوصل لسلسه عددها 600 مطعم وباع السلسة لجان براون وجاك ماسي مقابل مليار دولار وراتب شهري 75 ألف دولار مدي الحياة .... شايفين الفرق شغل 25 سنه بنظام ال One Man Show جابله 75 ألف دولار وشغل 3 سنين بسيستم جابله مليار دولار وراتب شهري 75 ألف دولار مدي الحياة وهو ده الفرق بين الاعتماد على النظام System وبين الإعتماد على شخصك One Man show مهما كانت إمكانياتك عالية فهي إمكانيات شخص واحد أما السيستم فهو بلا حدود.

 

شارك المقال :